បេក្ខភាពប្រធានាធិបតីពីររូបទទួលសំឡេងប្រកិតៗគ្នា ក្នុងការបោះឆ្នោតជុំទីមួយ
ថ្ងៃនេះនៅប្រទេសកូឡុំប៊ី ប្រជាជនជិត ៣០លាននាក់ ត្រូវធ្វើការបោះឆ្នោតជ្រើសរើសប្រធានាធិបតីជុំទីមួយ។ ក្នុងចំណោមបេក្ខជនឈរឈ្មោះបោះឆ្នោតទាំង៩រូប មានបេក្ខជនប្រធានាធិបតីពីររូប ដែលមានការគាំទ្រខ្លាំងជាងគេ ហើយដែលនឹងអាចទៅប្រកួតប្រជែងគ្នានៅជុំទីពីរនៅថ្ងៃទី២០ មិថុនាខាងមុខទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
តាមការស្ទង់មតិ បេក្ខជនប្រធានាធិបតីពីររូប គឺលោក Manuel Santos នៃគណបក្សអភិរក្សនិយមកូឡុំប៊ី របស់លោកប្រធានាធិបតី ផុតអណត្តិ និងលោកAntanas Mockus នៃគណបក្សបរិស្ថាន និងជាអតីតអភិបាលក្រុង បូហ្គោតា នឹងអាចទៅប្រកួតប្រជែងគ្នាម្តងទៀតនៅជុំទីពីរ ពីព្រោះគ្មាននរណាម្នាក់អាចទទួលសំឡេងគ្រប់គ្រាន់ដើម្បីឈ្នះនៅជុំទៅមួយតែម្តងបានទេ។
នៅក្នុងវិស័យការពារជាតិ បេក្ខជនទាំងពីរ នឹងបន្តគោលនយោបាយដាច់ខាត ប្រឆាំងនឹងពួកឧទ្ទាមកូឡុំប៊ី FARC របស់ប្រធានធិបតីផុតអណត្តិ Uribe ទាំងអស់គ្នា។ បេក្ខជន Antanas Mockus មាននយោបាយច្បាស់លាស់ មិនព្រមធ្វើការចរចាជាមួយពួក FARC ដាច់ខាត ឯចំណែកលោក Santos វិញ លោកជាអតីតរដ្ឋមន្ត្រីក្រសួងការពារប្រទេស និងជាមនុស្សជំនិតរបស់ប្រធានាធិបតីផុតអណត្តិស្រាប់ទៅហើយ ដូច្នេះវាគ្មានអ្វីជាការភ្ញាក់ផ្អើលទេ ដែលត្រូវបន្តនយោបាយដ៏តឹងរ៉ឹង តែមានលទ្ធផលនោះ។
ចំពោះគោលនយោបាយសេដ្ឋកិច្ចវិញ បេក្ខជនទាំងពីរសុទ្ធតែជាអ្នកដែលមាននិន្នាការសេដ្ឋកិច្ចសេរីនិយមបែបថ្មី។ នៅកូឡុំប៊ី គណបក្សបរិស្ថាន មិនត្រូវបានគេចាត់ទុកជាគណបក្សឆ្វេងនិយមដូចនៅប្រទេសដទែទេ។ គោលនយោបាយរបស់ជានយោបាយស្តាំកណ្តាលនិយម។
ដូច្នេះសួរថាតើអ្វីជាភាពខុសគ្នារវាងបេក្ខជនទាំងពីរ ?! បើយោងតាមអ្នកឯកទេសនយោបាយ ភាពខុសគ្នាពិតជាមាន។ ទោះបីជានយោបាយរបស់លោកប្រធានធិបតី Uribe មានជោគជ័យ រហូតអាចឈ្នះឆ្នោតជាលើកទីបីបាន ប្រសិនបើលោកឈរឈ្មោះជាថ្មី តែគណបក្សរបស់លោកដែលពេលនេះ មានលោក Santos ជាបេក្ខជនឈរឈ្មោះ ក៏មានរឿងអាស្រូវ និងបានប្រព្រឹត្តរំលោភសិទ្ធិមនុស្ស យ៉ាងច្រើន។
ទាំងនេះ គឺជាច្រកទ្វារនយោបាយមួយសម្រាប់ លោក ម៉ុកគូស ក្នុងការវាយប្រហារគូប្រជែង តាមរយៈសុន្ទរកថាបដិវត្តន៍ និងប្រកបដោយការគោរពសិទ្ធិមនុស្ស។ រាល់គ្រប់មិទ្ទិញ លោកតែងឲ្យតម្លែទៅលើតម្លាភាពនយោបាយ និងការប្រយុទ្ធប្រឆាំងនឹងអំពើពុករលួយ ដែលធ្វើឲ្យបណ្តាជនកូឡុំប៊ីភាគច្រើនពេញចិត្តយ៉ាងខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ