អាជ្ញាធរសន្យាដោះលែងអ្នកទោសនយោបាយ៥២នាក់
រដ្ឋាភិបាលគុយបារបស់លោកRaul Castro សន្យានឹងដោះលែងពួកអ្នករឹងរូសនឹងរដ្ឋអំណាចជាប់ឃុំឃាំង៥២នាក់ដែល ក្នុងចំណោមនេះ៥នាក់នឹងត្រូវចេញពីពន្ធនាគារក្នុងអំឡុងពេល ប៉ុន្មានម៉ោងខាងមុខនេះ អ្នកដទៃទៀតក្នុងអំឡុងពេល៤ខែទៀត។ រាល់ពួកអ្នកដែលត្រូវដោះលែងនឹងចេញដំណើរទៅជាមួយគ្រួសារខ្លួនទៅ កាន់ប្រទេសអេស្ប៉ាញ។គឺវិហារសាសនាកាតូលិកដែលបានប្រកាសពត៌មាននេះ នៅថ្ងៃពុធ៧កក្កដាម្សិលមិញ។ មន្ត្រីសង្ឃកាតូលិកក្នុងប៉ុន្មានខែចុងក្រោយនេះបានដើរតួនាទីជា អន្តរការីក្នុងសំណុំរឿងនេះ។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
គឺជាការចរចាពុំធ្លាប់ដែលមានសោះរវាងអាជ្ញាធរនិងវិហារសាសនាកាតូលិកគុយបាស្ដីពីអ្នកប្រឆាំងមួយក្រុមចាប់ខ្លួនបាននៅឆ្នាំ២០០៣ដោយហេតុសកម្មភាពនយោបាយរបស់គេកាលនៅនិទាឃរដូវខ្មៅនៅទីក្រុងឡាហាវ៉ាន។
រដ្ឋាភិបាលគុយបាចាត់ទុកពួកអ្នករឹងរូសនឹងរដ្ឋអំណាចទាំងនេះថាជាឧក្រិដ្ឋជនសាមញ្ញធម្មតាជាពួកអ្នកស៊ីឈ្នួលបម្រើពួកអាមេរិកាំង។ រឿងនេះបានបំពុលជាយូរមកហើយទំនាក់ទំនងរវាងគុយបានិងសហភាពអឺរ៉ុប។ រឿងនេះត្រូវបានពិនិត្យឡើងវិញកាលពីប៉ុន្មានខែមុននៅពេលដែលពួកអ្នកប្រឆាំងនឹងរដ្ឋអំណាចបានចាប់ផ្តើមធ្វើកូដកម្មអត់អាហារដើម្បីប្រកាសអាសន្នឲ្យមតិសាធារណជនអន្តរជាតិដឹងឮជួយឈឺឆ្អាលផង។
អ្នកទោសនយោបាយOrlando Zapataបានស្លាប់ក្នុងពន្ធនាគារនៅខែកុម្ភៈមុន រីឯអ្នកកាសែតប្រឆាំងGuillermo Farinas ដែលពុំព្រមទទួលទានអាហារសោះចាប់ពី៤ខែមកហើយសព្វថ្ងៃមានសភាពដុនដាបខ្លាំងណាស់។ ឃើញថាគុយបាឋិតក្រោមសម្ពាធហើយការប្រកាសពីការដោះលែងធ្វើនៅពេលដែលលោករដ្ឋមន្ត្រីក្រសួងការបរទេសអេស្ប៉ាញMiguel Angel Moratinosឋិតនៅទីក្រុងឡាហាវ៉ាន។
នេះហើយជាសញ្ញាដែលលោកប្រមុខការទូតអេស្ប៉ាញបានទន្ទឹងរង់ចាំដើម្បីបញ្ចុះបញ្ចូលអឺរ៉ូបឲ្យសម្រួលជាប្រក្រតីឡើងវិញទំនាក់ទំនងរវាងអឺរ៉ូបនិងកោះកុម្មុយនិស្តគុយបា។ នៅឯបរទេសវិញ ពួកអ្នកប្រឆាំងនិយាយអំពីកាយវិការមួយជាវិជ្ជមាន ប៉ុន្តែគេបរិហារការនិរទេសទាំងបង្ខំទៅកាន់ប្រទេសអេស្ប៉ាញ។ ការដោះលែងពួកអ្នករឹងរូសនឹងរដ្ឋអំណាចគុយបាដ៏ច្រើនសន្ធឹកចុងក្រោយបានប្រព្រឹត្តទៅនៅឆ្នាំ១៩៩៨នៅជំនាន់នោះអ្នកទោសនយោបាយ១០១នាក់ត្រូវបានដោះលែងបន្ទាប់ពីព្រះរាជដំណើរទស្សនកិច្ចរបស់សម្តេចប៉ាបJean Paul ទី២។
បន្ទាប់ពីការដោះលែងទាំងនេះមក នៅមានអ្នកទោសនយោបាយ១០០នាក់ទៀតនៅក្នុងគុកគុយបា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ