គុយបាត្រៀមដោះលែងអ្នកទោសនយោបាយចំនួន ៥២នាក់
អាជ្ញាធរគុយបានឹងដោះលែងអ្នកទោសនយោបាយ ៥២ នាក់ ដូចដែលខ្លួនបានសន្យាចំពោះវិហារសាសនាកាតូលិក។ គឺជាចំនួនច្រើនបំផុតនៃពួកអ្នករឹងរូសនឹងរដ្ឋអំណាចដែល រដ្ឋាភិបាលត្រូវដោះលែងចាប់តាំងពីព្រះរាជដំណើរទស្សនកិច្ចរបស់ សម្តេចប៉ាប Jean-Paul ទី២ នៅឆ្នាំ១៩៩៨មក។ នៅគុយបា គ្រួសាររបស់អ្នកទោសទន្ទឹងរង់ចាំការដោះលែងនាពេលឆាប់ៗខាងមុខនេះ។ ម្តាយរបស់អ្នកទោសម្នាក់បានប្រកាសរួចហើយថា កូនប្រុសរបស់គាត់កំពុងតែធ្វើដំណើរតាមផ្លូវឆ្ពោះទៅកាន់រដ្ឋធានី ឡាហាវ៉ាន។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
ស្របតាមសក្ខីកម្មនានាដែលយើងបានទទួលពីគ្រួសារអ្នកទោស ការដោះលែងពុំត្រូវដំអក់យឺតយូរឡើយ ហើយសាច់ញាតិគេរៀបចំខ្លួនជាស្រេចនឹងចេញដំណើរទៅកាន់ប្រទេសអេស្ប៉ាញ។ ជាអាទិ៍ គេត្រូវបានអាជ្ញាធរគុយបាកោះហៅដើម្បីទទួលរងការពិនិត្យអាការៈសុខភាពពីខាងគ្រូពេទ្យ មុននឹងគេចេញដំណើរ។
អ្នកទោសនយោបាយមិនតិចជាង ៥២ នាក់ទេ នឹងត្រូវដោះលែងស្របតាមកិច្ចព្រមព្រៀងចុះរវាងលោក Raul Castro និងវិហារសាសនាកាតូលិកគុយបា។ គេទាំងអស់ត្រូវបានចាប់ខ្លួននៅឆ្នាំ ២០០៣ នៅឱកាសយុទ្ធនាការបង្រ្កាបចុងក្រោយ។ លោកប្រមុខការទូតអេស្ប៉ាញ Miguel Angel Moratinos បានអញ្ជើញទៅកាន់គុយបានៅសប្តាហ៍មុន ដើម្បីផ្តល់ការគាំទ្ររបស់ខ្លួនចំពោះឧត្តមមន្រ្តីសង្ឃកាតូលិក Archevèque នៅទីក្រុងឡាហាវ៉ាន គឺសម្តេចសង្ឃកាតូលិក Cardinal Jaime Ortega ដែលទើបនឹងប្រកាសការចាប់ផ្តើមដំណើរការដោះលែង។
ដំណើរការដោះលែងដែលអាចនឹងមានរយៈពេលជាច្រើនខែ។ អ្នកទោសដោះលែងប៉ុន្មានក្រុមដំបូងនឹងត្រូវគេរង់ចាំទទួលនៅប្រទេសអេស្ប៉ញ ជាហេតុធ្វើឲ្យរដ្ឋការក្រុង Madrid សង្ឃឹមថា នឹងបើកសករាជថ្មីមួយនៅគុយបា។ ដំណឹងនេះត្រូវរដ្ឋការក្រុងWashington ស្វាគម ទុកជាសញ្ញាជាវិជ្ជមានមួយ ប៉ុន្តែគណបក្សប្រឆាំងនៅគុយបា នៅតែសំដែងការមិនទុកចិត្ត « ការនេះនឹងបន្ធូរបរិយាកាសនយោបាយ ប៉ុន្តែរបបនៅតែបន្តធ្វើដូចមុនអ៊ីចឹង» នេះជាការថ្លែងរបស់អ្នកប្រឆាំងធំម្នាក់ គឺលោក Elizardo Sanchez៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ