មន្ទីរប៉ង់តាហ្កូនតាមរកអ្នកដែលបានផ្តល់ឯកសារសម្ងាត់ឲ្យទៅSite Internet WikiLeaks
មន្ទីរប៉ង់តាហ្កូនបានប្រកាសកាលពីថ្ងៃចន្ទម្សិលមិញឲ្យដឹងថា គេនឹងធ្វើការស៊ើបអង្កេតរកមុខអ្នកដែលបានផ្តល់ឯកសារសម្ងាត់រាប់ម៉ឺនឯកសារឲ្យទៅSite Internet WikiLeaks ពាក់ព័ន្ធនឹងបញ្ហាសង្គ្រាមនៅប្រទេសអាហ្វហ្កានីស្តង់។ចំណែកឯ Site Internet WikiLeaksវិញ គេមានបំណងនឹងផ្សព្វផ្សាយឲ្យដឹងពីអាកប្បកិរិយាពោរពេញទៅដោយ អសិលធម៌នៅក្នុងពិភពនយោបាយនិងនៅក្នុងពិភពពាណិជ្ជកម្មនៅសហរដ្ឋ អាមេរិក។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
ការលេចធ្លាយផ្សព្វផ្សាយឯកសារសម្ងាត់រាប់ម៉ឺនឯកសារដោយSite Internet WikiLeaks ពាក់ព័ន្ធនឹងបញ្ហាសង្គ្រាមនៅប្រទេសអាហ្វហ្កានីស្តង់គឺជាការភ្លាត់ខុសឆ្គងមួយដ៏ធំធេងពុំដែលកើតមាននៅក្នុងប្រព័ន្ធសន្តិសុខនៃយោធាអាមេរិក។
អ្នកទទួលខុសត្រូវនៃប្រព័ន្ធសន្តិសុខនៃយោធាអាមេរិកបានថ្លែងប្រាប់ថា អ្នកដែលបានធ្វើឲ្យលេចធ្លាយផ្សព្វផ្សាយឯកសារសម្ងាត់៩១ ០០០ឯកសារគឺជាអ្នកដែលមានលទ្ធភាពអាចឈានចូលដល់ទីកន្លែងថ្នាក់សម្ងាត់។ “ហើយយើងនឹងធ្វើការអង្កេតរកតាមចាប់ជនទទួលខុសត្រូវដែលបានធ្វើឲ្យលេចធ្លាយផ្សព្វផ្សាយឯកសារសម្ងាត់រាប់ម៉ឺនឯកសារដោយSite Internet WikiLeaks” នេះជាសេចក្តីប្រកាសរបស់លោកGeoff Morrell អ្នកទទួលខុសត្រូវនៃមន្ទីរប៉ង់តាហ្កូនជាមួយអ្នកកាសែត។
ក្រសួងការពារជាតិអាមេរិកបានថ្លែងឲ្យដឹងទៀតថា ការពិនិត្យសិក្សាទៅលើឯកសារដែលបានផ្សព្វផ្សាយដោយ Site Internet WikiLeaksត្រូវការពេលវេលាជាច្រើនថ្ងៃឬជាច្រើនសប្តាហ៍។ ដូច្នេះនៅពេលនេះគេនៅពុំទាន់ដឹងថា តើឧប្បត្តិហេតុទាំងនោះនឹងធ្វើឲ្យមានការខូចខាតដល់កម្រិតណានៅឡើយ។
មកទល់ពេលនេះ មន្ទីរប៉ង់តាហ្កូនបានបដិសេធពុំព្រមប្រាប់ឲ្យដឹងពីឈ្មោះអ្នកជាប់សង្ស័យឡើយ។ ប៉ុន្តែពុំបដិសេធឡើយពីការមន្ទិលសង្ស័យទៅលើទាហានអាមេរិកាំងម្នាក់ដែលធ្លាប់បានជាប់ពិរុទ្ធពីបទបានផ្តល់ព័ត៌មានឲ្យទៅSite Internet WikiLeaksពាក់ព័ន្ធនឹងបញ្ហាសង្គ្រាមនៅប្រទេសអៀរ៉ាក់។
ចំណែកឯ Site Internet WikiLeaksវិញ គេមានបំណងនឹងផ្សព្វផ្សាយឲ្យដឹងពីអាកប្បកិរិយាពោរពេញទៅដោយអសិលធម៌នៅក្នុងពិភពនយោបាយនិងនៅក្នុងពិភពពាណិជ្ជកម្មនៅសហរដ្ឋអាមេរិក។
គួរកត់សម្គាល់ថា ការផ្សព្វផ្សាយឯកសារសម្ងាត់រាប់ម៉ឺនឯកសារដោយSite Internet WikiLeaks បានបញ្ចាំងឲ្យឃើញនូវភាពឃោរឃៅដែលកើតមាននៅក្នុងបញ្ហាសង្គ្រាមនៅប្រទេសអាហ្វហ្កានីស្តង់ ហើយនិងទំនាក់ទំនងរវាងប្រទេសប៉ាគីស្តង់និងពួកតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ