ONU៖ វិសមភាពរវាងបុរស និងស្រ្តីនៅក្នុងពិភពលោកកំពុងបន្តមាន
នៅក្នុងឱកាសទិវាស្ថិតិពិភពលោកចេញផ្សាយនៅថ្ងៃពុធ ទី២០ តុលានេះ អង្គការសហប្រជាជាតិបានចេញផ្សាយរបាយការណ៍មួយដែលមានចំណងជើងថា « ស្រ្តីនៅក្នុងពិភពលោកឆ្នំា ២០១០ »។ របាយការណ៍បានលើកឡើងអំពីវិសមភាពរវាងបុរស និងស្រ្តីនៅក្នុងពិភពលោក។ យោងតាមរបាយការណ៍ អត្រាចូលរួមរបស់ស្រ្តីនៅក្នុងសង្គម នៅតែមានចំនួនតិចដដែលបើប្រៀបនឹងបុរស ពិសេស តំណែងជាអ្នកដឹកនំាប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា
គឺជារបាយការណ៍មួយដែលបានលើកឡើងអំពីស្ថានភាពបុរស និងស្រ្តីនៅក្នុងសង្គមនាឆ្នំា ២០០៩កន្លងទៅ។ របាយការណ៍បានផ្តោតជាសំខាន់លើវិស័យធំៗ ចំនួន ៤ដែលបង្ហាញពីវិសមភាពរវាងបុរស និងស្រ្តីនៅក្នុងពិភពលោក។
វិសមភាពទីមួយ គឺការទទួលមុខតំណែងជាអ្នកដឹកនំាប្រទេស។ របាយការណ៍បានបង្ហាញថាក្នុងឆ្នំា ២០០៩កន្លងទៅ មានស្រ្តីតែ ៩នាក់ប៉ុណ្ណោះដែលមានតំណែងជាប្រមុខរដ្ឋ ទល់នឹង ១៤៣នាក់ ជាបុរស។ ចំណែកតំណែងប្រមុខរដ្ឋាភិបាលទំាង ១៩២នៅទូទំាងពិភពលោកវិញ មានស្រ្តីតែ ១១នាក់ប៉ុណ្ណោះ។ នៅក្នុងរដ្ឋសភាវិញ របាយការណ៍បានបង្ហាញថា មានតែ ២៣ប្រទេសប៉ុណ្ណោះដែលចំនួនតំណាងរាស្រ្តស្រ្តីមានរហូតដល់ទៅ ៣០%។
វិសមភាពទីពីរ គឺអត្រាចូលរៀនរបស់សិស្សនារី ប្រៀបនឹងសិស្សបុរស។ របាយការណ៍បានបង្ហាញថា ក្នុងចន្លោះឆ្នំា ១៩៩៩-២០០៧ អត្រាចូលរៀនសាលាបឋមសិក្សារបស់សិស្សនារីបានកើនពី ៧៩% ទៅ ៨៦%។ យោងតាមរបាយការណ៍ ទ្វីបអាហ្រ្វិកកណ្តាល និងអាហ្វ្រិកខាងលិចត្រូវបានគេចាត់ទុកជាតំបន់ដែលមានអត្រាក្មេងស្រីគ្រប់អាយុចូលរៀនសាលាបឋមសិក្សជិត ៦០% មិនបានចូលសាលាទេ។ ចំណែកនៅទ្វីបអាស៊ីខាងត្បូង សមាមាត្រនៃចំនួនពលរដ្ឋដែលមិនបានទៅសាលា គឺមានស្រ្តី ៤៩% ទល់នឹង ៣៦% ជាបុរស។ ដោយឡែក នៅអាស៊ីកណ្តាល និងអូសេអានីវិញ សមាមាត្រនៃពលរដ្ឋដែលមិនបានទៅសាលាមានមិនដល់ ២% ផង។
វិសមភាពទីបី គឺការទទួលបានប្រាក់បៀវត្ស។ របាយការណ៍បានបង្ហាញថា ទោះបីជាស្រ្តី និងបុរសមានកំរិតវិជ្ជាដូចគ្នា និងប្រកបការងារស្រដៀងគ្នាក៏ដោយ ក៏ស្រ្តីនៅតែទទួលបានប្រាក់ខែតិចជាងបុរសពី ១០% ទៅ ២០%។ គម្លាតប្រាក់ខែខ្លំាងជាងគេរវាងស្រ្តី និងបុរស គឺមានភាគច្រើននៅក្នុងប្រទេសអាស៊ី។ ជាក់ស្តែងនៅក្នុងប្រទេសអាស៊ីចំនួន ៤នៅអាស៊ីប៉ាស៊ីហ្វិក ដែលស្រី្តទទួលបានប្រាក់ខែជាមធ្យមតិចជាងបុរសរហូតដល់ទៅជាង ៣០% នៅក្នុងការងារដូចគ្នា។
ចុងក្រោយគឺអំពើហិង្សាដែលស្រ្តីបានទទួលនៅក្នុងសង្គម និងនៅក្នុងគ្រួសារ។ អំពើហិង្សាលើរាងកាយ និងផ្លូវចិត្ត។ យោងតាមរបាយការណ៍ អត្រាស្រ្តីដែលបានទទួលរងអំពើហិង្សាយ៉ាងតិចម្តង ក្នុងមួយជីវិតរបស់គេម្នាក់ៗ គឺមានពី ១២% ទៅជាង ៥៩% ដោយយោងទៅតាមប្រទេស ឬកន្លែងដែលស្រ្តីរូបនោះរស់នៅ។ មាន ១២% នៅហុងកុង និងចិន ១៥% នៅក្នុងប្រទេសហ្វីលីព្វីន ២១% នៅឥណ្ឌា និងមាន ២៣% នៅក្នុងប្រទេសកម្ពុជា។
សរុបមកវិញនៅក្នុងពិភពលោកទំាងមូល មានចំនួនបុរសច្រើនជាងស្ត្រី ៧៥លាននាក់។ តែមានតំបន់ខ្លះ ចំនួនស្រ្តីតិចជាងបុរស តំបន់ខ្លះទៀត ចំនួនបុរសច្រើនជាងស្ត្រី។ បើនិយាយពីប្រទេសឥណ្ឌា និងចិនដែលមានចំនួនពលរដ្ឋច្រើនជាងគេក្នុងលោកវិញ គន្លាតរវាងចំនួនបុរស និងស្រ្តីមិនសូវជាខ្លំាងទេ ពោលមានចំនួនស្រ្តីច្រើនជាងបុរសប្រមាណតែ ៧% ប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ