សភាបានបោះឆ្នោតដកទំនុកទុកចិត្តពីរដ្ឋាភិបាលរបស់លោកនាយករដ្ឋមន្រ្តី Stephen Harper
នៅប្រទេសកាណាដា រដ្ឋាភិបាលរបស់លោកនាយករដ្ឋមន្រ្តី Stephen Harper ត្រូវបានសភាបោះឆ្នោតទម្លាក់កាលពីថ្ងៃសុក្រ ទី២៥ មីនា ២០១១។ ក្រុមគណបក្សប្រឆំាងបានពួតដៃគ្នាបោះឆ្នោតគំាទ្រញត្តិរបស់គណបក្ស សេរីនិយម ដោយសំឡេងគំាទ្រ ១៥៦ ទល់នឹងសំឡេងប្រឆំាង ១៤៥។ ការបោះឆ្នោតដកទំនុកទុកចិត្តពីរដ្ឋាភិបាលរបស់លោកនាយករដ្ឋមន្រ្តី Stephen Harper ដែលនំាឲ្យមានការរៀបចំបោះឆ្នោតសភាមុនកាលកំណត់នៅដើមខែឧសភាខាង មុខ។
ចុះផ្សាយនៅថ្ងៃ៖
សេចក្តីរាយការណ៍របស់ គួច គន្ធារ៉ា
ជាមួយនឹងសំឡេងឆ្នោតគំាទ្ររបស់គណបក្សប្រឆំាងទំាង ៣នៅក្នុងរដ្ឋសភា រដ្ឋាភិបាលអភិរក្សនិយមរបស់លោកនាយករដ្ឋមន្រ្តី Stephen Harper ទើបត្រូវបានសភាបោះឆ្នោតដកទំនុកទុកចិត្ត និងនំាឲ្យមានការរៀបចំបោះឆ្នោតសភាមុនកាលកំណត់នៅដើមខែឧសភាខាងមុខ។ គឺជាការបោះឆ្នោតលើកទី ៤ហើយ បើគេគិតក្នុងរយៈពេល ៧ឆ្នំាចុងក្រោយនេះ។
លោក Michael Ignatieff ប្រធានគណបក្សប្រឆំាងសេរីនិយមបានចាត់ទុកថ្ងៃបោះឆ្នោតទម្លាក់រដ្ឋាភិបាលរបស់លោក Stephen Harper ថាជាថ្ងៃប្រវត្តិសាស្រ្តមួយសម្រាប់លទ្ធិប្រជាធិបតេយ្យនៅក្នុងប្រទេសកាណាដា។ ថ្ងៃប្រវត្តិសាស្រ្តពីព្រោះថា សភាបានផ្តន្ទាទោសលោកនាយករដ្ឋមន្រ្តីពីបទបានរំលោភបំពានលទ្ធិប្រជាធិបតេយ្យកាណាដា។
តាមពិតទៅ ក្រុមគណបក្សប្រឆំាងបានចោទលោក Stephen Harper ថាបានបដិសេធការចំណាយលើគម្រោងកំណែទម្រង់ច្បាប់មួយចំនួន ពិសេស ទាក់ទងនឹងវិស័យតុលាការ និងការទិញយន្តហោះចម្បំាង។ នៅថ្ងៃសៅរិ៍ ទី២៦ មីនានេះ លោកនាយករដ្ឋមន្រ្តី Stephen Harper ត្រូវលាលែងចេញពីមុខតំណែង និងប្រកាសរំលាយរដ្ឋសភាជាផ្លូវការ។
លោក Stephen Harper បានចោទក្រុមគណបក្សប្រឆំាង ថាមានបំណងចង់កោះឲ្យមានការបោះឆ្នោតមុនកាលកំណត់។ លោក Stephen Harper បានសម្តែងការខកចិត្តយ៉ាងខ្លំាង និងថាមានប្រជាជនកាណាដាភាគច្រើនក៏បានខកចិត្តដែរ ពិសេស ពួកគេពិតជាមិនចង់ឲ្យមានការរៀបចំបោះឆ្នោតសភាមុនកាលកំណត់ទេ។
យ៉ាងណាក៏ដោយ ទោះបីជារដ្ឋាភិបាលអភិរក្សនិយមរបស់លោក Stephen Harper បានធ្លាក់ក៏ដោយ ក៏គណបក្សអភិរក្សនិយមអាចនឹងទទួលបានការគំាទ្រជាថ្មីនៅក្នុងការបោះឆ្នោតខាងមុខ។ យោងតាមការស្ទង់មតិ ការប្រេះឆានៅក្នុងក្រុមបក្សប្រឆំាងនឹងអនុញ្ញាតឲ្យក្រុមអ្នកអភិរក្សនិយមទទួលបានសំឡេងភាគច្រើននៅរដ្ឋសភា។ ដូច្នេះ នេះអាចជាព្រឹត្តិការណ៍មួយដែលកាណាដាមិនធ្លាប់ជួបប្រទះទេ តំាងពីការបោះឆ្នោតក្នុងឆ្នំា ២០០៦ មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ