សមាជនៃបក្សសាធារណរដ្ឋត្រូវផ្អាកក្រោយពីបើកប្រជុំតែមួយរយៈដ៏ខ្លី
គណបក្សសាធារណរដ្ឋត្រូវបើកសមាជប្រជុំជាផ្លូវការរបស់ខ្លួននៅថ្ងៃទី២៧សីហាឆ្នាំ២០១២ដើម្បីតែងតាំងលោកMitt Romney ជាបេក្ខជនប្រធានាធិបតី ប៉ុន្តែសមាជនេះបានត្រូវផ្អាក២៤ម៉ោង ដោយហេតុតែខ្យល់ព្យុះIsaac គំរាមបោកបក់មកលើឆ្នេរសមុទ្រអាមេរិកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ក្នុងរយៈពេលតែប៉ុន្មាននាទីប៉ុណ្ណោះ នៅចំពោះមុខសាលប្រជុំដែលមានពុំទាន់មានមនុស្សមកច្រើនកុះករនៅឡើយ ប្រធាននៃបក្សសាធារណរដ្ឋលោក Reince Priebus បានប្រកាសបើកសមាជប្រជុំជាផ្លូវការ ប៉ុន្តែមិនទាន់បានប៉ុន្មានផង ស្រាប់តែលោកប្រធាននៃបក្សសាធារណរដ្ឋបានប្រកាសផ្អាកកិច្ចប្រជុំសម្រាប់រយៈពេល២៤ម៉ោង ដោយហេតុតែខ្យល់ព្យុះIsaac គំរាមបោកបក់មកលើឆ្នេរសមុទ្រអាមេរិកាំង។ ថ្វីដ្បិតតែខ្យល់ព្យុះIsaac មិនគំរាមបោកបក់មកលើរដ្ឋ Floride ក៏ប៉ុន្តែវាអាចធ្វើដំណើរឡើងមកខាងជើងនៃឈូងសមុទ្រម៉ិចស៊ិក ហើយវាអាចប្រែក្លាយទៅជាខ្យល់ព្យុះសង្ឃរា មុននឹងធ្វើការគំរាមបោកបក់មកលើឆ្នេរសមុទ្រនៃរដ្ឋ Louisane និងរដ្ឋ Mississippi។
កិច្ចប្រជុំមានរយៈពេលខ្លីមែនពិត ប៉ុន្តែវាបានបង្ហើបបង្ហាញឲ្យឃើញពីសារៈសំខាន់នៃកិច្ចប្រជុំពិភាក្សានៅបីថ្ងៃខាងមុខនៅទីក្រុង Tampa។ ប្រធាននៃបក្សសាធារណរដ្ឋបានចាប់បើកឲ្យមានសកម្មភាពនូវកុងទ័រពីរជានិមិត្តរូប ដែលគេបានយកមកដាក់នៅក្នុងសាលប្រជុំ។ កុងទ័រទីមួយបង្ហាញឲ្យឃើញនូវបរិមាណនៃប្រាក់បំណុលសាធារណៈរបស់ស.រ.អា.ដែលមាន១៥ ៩០០ពាន់លានដុល្លារ។ កុងទ័រទីពីរបង្ហាញឲ្យឃើញពីបរិមាណសរុបនៃ ប្រាក់បំណុលសាធារណៈរបស់ស.រ.អា.ក្រោយរយៈកាលនៃសមាជប្រជុំ។ ដូច្នេះ គោលបំណងរបស់បក្សសាធារណរដ្ឋគឺចង់បង្ហាញឲ្យឃើញពីបរាជ័យនៃ “នយោបាយសេដ្ឋកិច្ច”របស់លោកបារ៉ាក់អូបាម៉ា។
គណបក្សសាធារណរដ្ឋនៅមានបេសកកម្មមួយទៀតក្នុងរយៈពេលសមាជប្រជុំបីថ្ងៃរបស់ខ្លួនគឺ ត្រូវធ្វើការកែប្រែរូបភាពបេក្ខជនប្រធានាធិបតីរបស់ខ្លួន។ ដោយហេតុថា សម្រាប់ប្រជាជនអាមេរិកាំងជាច្រើន បេក្ខជនប្រធានាធិបតី Mitt Romney ហាក់មានសមត្ថភាពច្រើនជាងលោកអូបាម៉ាក្នុងវិស័យសេដ្ឋកិច្ច ដើម្បីជួយលើកស្ដារប្រទេស ក៏ប៉ុន្តែប្រជាជនអាមេរិកាំងជាច្រើនយល់ថា បេក្ខជនប្រធានាធិបតី Mitt Romney ហាក់បីដូចជាឃ្លាតចាកឆ្ងាយពីក្តីកង្វល់នៃជីវិតប្រចាំថ្ងៃរបស់ប្រជាពលរដ្ឋអាមេរិកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ