ធនាគារកណ្តាលអាមេរិកបន្តនយោបាយគាំទ្រសេដ្ឋកិច្ចអាមេរិក
ចុះផ្សាយនៅថ្ងៃ៖
ស្តាប់ - ០៦:០៩
ធនាគារកណ្តាលអាមេរិកាំង បានសម្រេចកាលពីថ្ងៃពុធម្សិលមិញ រក្សាចំនួនសាច់ប្រាក់ដែលត្រូវចាក់បញ្ចូលទៅក្នុងទីផ្សារ។ ជារួម ធនាគារកណ្តាលអាមេរិកត្រូវបន្តចាក់បញ្ចូលសាច់ប្រាក់៨៥ពាន់លានដុល្លារ ក្នុងមួយខែ ទៅក្នុងទីផ្សារ។ តាំងពីឆ្នាំ២០០៨ ធនាគារកណ្តាលអាមេរិកបានធ្វើនយោបាយ ចាក់បញ្ចូលសាច់ប្រាក់ ដើម្បីជំរុញកំណើនសេដ្ឋកិច្ចអាមេរិក ដែលទើបងើបចេញវិបត្តិ។
ការចាក់បញ្ចូលសាច់ប្រាក់ក្នុងទីផ្សារ គឺជាការបោះពុម្ពក្រដាសប្រាក់ដុល្លារបន្ថែម ប្រមាណ ៨៥ពាន់លានដុល្លារ ក្នុងមួយខែ។ គោលបំណងធំនៃការចាក់សាច់ប្រាក់ក្នុងទីផ្សារគឺដើម្បីជំរុញកំណើនសេដ្ឋកិច្ចអាមេរិក ដូចជាបន្ថយអត្រាការប្រាក់ឲ្យនៅទាប និងជំរុញឲ្យអត្រាអតិផរណាកើនឡើង។ លុយដែលគេបោះពុម្ពបន្ថែម នឹងត្រូវគេយកទៅចាក់បញ្ចូលក្នុងទីផ្សារ តាមរយៈការទិញសញ្ញាប័ណ្ណ របស់រដ្ឋ ឬរបស់ក្រុមហ៊ុនឯកជន។ និយាយឲ្យងាយយល់ គឺយកលុយទៅឲ្យរដ្ឋអាមេរិកាំង និងក្រុមហ៊ុនខ្ចីក្នុងអត្រាការប្រាក់ទាប ដែលមានមិនដល់០,២៥ភាគរយ គឺសឹងតែសូន្យភាគរយ។ អត្រាការប្រាក់ទាប នៅលើទីផ្សារ នឹងជំរុញឲ្យមានការវិនិយោគ។ ប្រជាជនអាមេរិកាំងក៏នឹងអាចខ្ចីប្រាក់ ក្នុងអត្រាការប្រាក់ទាប ដើម្បីយកទៅវិនិយោគ ឬចំណាយលើការបរិភោគប្រើប្រាស់ ។ ចំណាយលើការប្រើប្រាស់កើនឡើង នោះ ការផលិតក៏កើនឡើង។ ដូច្នេះ កំណើនសេដ្ឋកិច្ចក៏កើនឡើងដែរ។
បច្ចុប្បន្ននេះ សេដ្ឋកិច្ចរបស់អាមេរិកមានសុខភាពល្អប្រសើរឡើងជាងមុន ប៉ុន្តែ ធនាគារកណ្តាលនៅតែបន្តនយោបាយបោះពុម្ពលុយបន្ថែមដដែល ដោយគេលើកហេតុផលថា កំណើនសេដ្ឋកិច្ចរបស់អាមេរិកដើរលឿនទៅមុខយ៉ាងយឺត ចំណែកអត្រាការប្រាក់នៅក្នុងទីផ្សារសម្រាប់ការវិនិយោគលើអចលនទ្រព្យ នៅតែខ្ពស់ដដែល។
មួយវិញទៀត ធនាគារកណ្តាលអាមេរិក ចាក់បញ្ចូលសាច់ប្រាក់ដើម្បីជំរុញការវិនិយោគ និងការបង្កើតការងារធ្វើ សម្រាប់ពលរដ្ឋអាមេរិកាំង។ ប៉ុន្តែ តាមធនាគារកណ្តាលអាមេរិក បច្ចុប្បន្ននេះ អត្រាអ្នកអត់ការងារធ្វើនៅអាមេរិក បានថយចុះមែន ប៉ុន្តែ យ៉ាងតិចតួចបំផុត គឺស្ថិតនៅក្នុងរង្វង់ ៧ភាគរយនៃប្រជាជនសរុប។ តាមសេចក្តីថ្លែងការណ៍របស់គណៈកម្មាធិការដើម្បីនយោបាយរូបិយវត្ថុអាមេរិក គេនឹងអាចកាត់បន្ថយ ចំនួនសាច់ប្រាក់ ចាក់ចូលទៅក្នុងទីផ្សារ ក្នុងកាលៈទេសៈណាដែលអត្រាអ្នកអត់ការងារធ្វើនៅអាមេរិក ធ្លាក់មកនៅត្រឹម៦ ឬ ៦,៥ភាគរយ។
ផលវិបាកក្រោយការប្រកាសរបស់ធនាគារកណ្តាលអាមេរិក
ក្រុមអ្នកវិនិយោគដំបូងឡើយ សង្ឃឹមថា ធនាគារកណ្តាលអាមេរិកនឹងអាចកាត់បន្ថយ ការចាក់បញ្ចូលសាច់ប្រាក់ ពី៨៥ ពាន់ លានដុល្លារ មកត្រឹម៧៥ពាន់លានដុល្លារ នោះ គេមើលទៅលើកំណើនសេដ្ឋកិច្ចអាមេរិក។ គេសង្ឃឹមថា បើធនាគារកណ្តាលបន្ថយចំនួនក្រដាសប្រាក់ដែលគេបោះពុម្ពបន្ថែម នោះលុយដុល្លារ នឹងមានតម្លៃឡើងវិញដែរ។
តាមក្រុមអ្នកវិភាគខ្លះ ជំនួយអន្តរាគមន៍របស់ធនាគារកណ្តាលអាមេរិក ដើម្បីជំរុញសេដ្ឋកិច្ចអាមេរិក អាចធ្វើឲ្យម្ចាស់វិនិយោគមួយចំនួនមិនសូវទុកចិត្ត ពីសមត្ថភាពគ្រប់គ្រងសេដ្ឋកិច្ចរបស់អាមេរិក។ ហើយជាលទ្ធផល ពួកក្រុមវិនិយោគដែលជាម្ចាស់បំណុលនឹងអាចដំឡើងអត្រាការប្រាក់។ ជាក់ស្តែង អត្រាការប្រាក់បំណុលរបស់អាមេរិកបានកើនឡើងពី១,៦ភាគរយ មក២,៨ភាគរយ។
កន្លងមក ប្រទេសទើបមានសេដ្ឋកិច្ចរីកចម្រើនមួយចំនួន ដូចជាចិនជាដើម បានរិះគន់នយោបាយរបស់ធនាគារកណ្តាលអាមេរិក ដែលចេះតែលូកដៃ ផលិតលុយបន្ថែម ដើម្បីចាក់បញ្ចូលទៅក្នុងទីផ្សារ។ ចិនបារម្ភជាងគេពីនយោបាយបោះពុម្ពលុយបន្ថែមរបស់អាមេរិក ព្រោះថា ចិន មានស្តុកលុយអាមេរិកំាងច្រើនរាប់ពាន់លានដុល្លារ។ បើលុយដុល្លារមានច្រើន ចរាចរក្នុងទីផ្សារ នោះលុយដុល្លារ ដែល ចិន មាននៅក្នុងដៃនឹងមិនសូវមានតម្លៃ ដែលនេះប៉ះពាល់យ៉ាងខ្លាំងដល់សេដ្ឋកិច្ចរបស់ចិន។
មួយវិញទៀត ចាប់តាំងពីឆ្នាំ ២០០៨ ធនាគារកណ្តាលបានចាក់បញ្ចូលសាច់ប្រាក់បន្ថែមប្រមាណ ជាង២៨០០ពាន់លានដុល្លារទៅក្នុងទីផ្សារ។ លុយទាំងនេះដំបូងឡើយត្រូវគេបោះពុម្ពឡើងដើម្បីយកប្រើដើម្បីជួយជំរុញសេដ្ឋកិច្ចអាមេរិក។ ប៉ុន្តែ តាមការពិត ជាក់ស្តែង ប្រាក់ដុល្លារជាច្រើនពាន់លានបានហូរចេញពី អាមេរិក និងកំពុងត្រូវគេយកទៅវិនិយោគនៅបរទេស ជាពិសេស នៅក្នុងប្រទេសដែលកំពុងមានសេដ្ឋកិច្ចរីកចម្រើន ដូចជាឥណ្ឌា ប្រេស៊ីល និងឥណ្ឌូណេស៊ីជាដើម។ គេបារម្ភថា សេដ្ឋកិច្ចរបស់ប្រទេសទើបរីកលូតលាស់ថ្មីៗ ដែលពឹងអាស្រ័យនឹងការវិនិយោគរបស់បរទេស អាចនឹងដួល នៅពេលណាដែលក្រុមអ្នកវិនិយោគដកខ្លួន យកលុយដុល្លារ ទៅវិនិយោគ នៅកន្លែងផ្សេង ជាពិសេស នៅពេលដែលធនាគារកណ្តាលអាមេរិកកំណត់ដំឡើងថ្លៃអត្រាការប្រាក់របស់ខ្លួនវិញ។ អ្នកដែលមានលុយដុល្លារប្រាកដជាប្រជែងជាមួយនឹងធនាគារកណ្តាលអាមេរិកដើម្បីផ្គត់ផ្គង់ប្រាក់កំចីក្នុងអត្រាការប្រាក់ទាប។
ឥលូវនេះ គេមិនទាន់បារម្ភពីរឿងនោះនៅឡើយទេ ព្រោះថា ធនាគារកណ្តាលអាមេរិកមើលទៅ នៅបន្តរក្សាការចាក់បញ្ចូលសាច់ប្រាក់ក្នុងទីផ្សារ និងរក្សាអត្រាការប្រាក់ទាបបំផុតដើម្បីលើកស្ទួយសេដ្ឋកិច្ចអាមេរិក។ នយោបាយរបស់ធនាគារកណ្តាលអាមេរិក នៅពេលនេះ មិនមែនជារឿងចៃដន្យ ប៉ុន្តែ ជាការបង្កា លើកទឹកចិត្តអ្នកវិនិយោគឲ្យនៅបន្តទុកចិត្តលើកំណើនសេដ្ឋកិច្ចអាមេរិក។
នៅពាក់កណ្តាលខែតុលាខាងមុខនេះ រដ្ឋាភិបាលអាមេរិកនឹងអាចជួបវិបត្តិប្រាក់បំណុលជាថ្មី ពោលគឺរដ្ឋនឹងលែងមានប្រាក់សម្រាប់បើកប្រាក់ខែជូនមន្រ្តីរដ្ឋការ ឬសម្រាប់សងអត្រាការប្រាក់ឲ្យម្ចាស់បំណុលទៀត។ រដ្ឋាភិបាលកំពុងទាមទារឲ្យសភាបោះឆ្នោតដំឡើងបន្ថែម ចំនួន ប្រាក់បំណុលដែលរដ្ឋអាចខ្ចីបាន។ ប៉ុន្តែ រដ្ឋាភិបាលរបស់លោកអូបាម៉ាអាចនឹងជួបឧបសគ្គ ការខ្ទាស់ជើងជាថ្មី របស់គណបក្សប្រឆាំង ដែលនឹងអាចបោះឆ្នោតប្រឆាំង។
អគ្គទេសាភិបាលធនាគារកណ្តាលអាមេរិក លោកប៊ែន បឺនែនគី បានព្រមានរួចហើយពីគ្រោះថ្នាក់សម្រាប់សេដ្ឋកិច្ចរបស់អាមេរិក ក្នុងករណីសភាបរាជ័យមិនព្រមដំឡើងចំនួនប្រាក់បំណុលតាមការទាមទាររបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ