ប្រាក់បំណុល៖ ការចរចារវាងអូបាម៉ា និងមេដឹកនាំគណបក្សសាធារណរដ្ឋចាប់បើកឡើងវិញ
ក្រោយពីបានដើរចេញពីតុចរចា កាលពីសប្តាហ៍មុន មេដឹកនាំគណបក្សសាធារណរដ្ឋក្នុងព្រឹទ្ធសភាអាមេរិក បានសុខចិត្តវិលត្រឡប់មកចរចាជាមួយលោកអូបាម៉ាវិញ ដើម្បីស្វែងរកដំណោះស្រាយជុំវិញបញ្ហាប្រាក់បំណុល។ នៅពេលដែលថ្ងៃកំណត់កាន់តែខិតជិតចូលមកដល់ លោកអូបាម៉ា និងគណបក្សសាធារណរដ្ឋហាក់ដូចជាបង្ហាញអំពីជំហរចង់សម្រុះសម្រួលគ្នា ដើម្បីបញ្ចៀសប្រទេសពីការក្ស័យធន។
ចុះផ្សាយនៅថ្ងៃ៖
ស្តាប់ - ០១:៤១
នៅសល់តែពីរថ្ងៃទៀតប៉ុណ្ណោះត្រូវដល់ថ្ងៃកំណត់ ដែលអាមេរិកត្រូវខ្ចីបំណុលគេបន្ថែម ដើម្បីបង្រ្គប់មុខចំណាយ និងបញ្ចៀសការក្ស័យធន។ ដោយសារតែបរិមាណបំណុលអាមេរិកបានឈានដល់កម្រិតអតិបរមាហើយនោះ ការខ្ចីបំណុលបន្ថែមចាំបាច់ត្រូវតែទទួលការអនុញ្ញាតពីសភា។
កាលពីថ្ងៃសុក្រ ច្បាប់ស្នើឡើងដោយគណបក្សសាធារណរដ្ឋ ត្រូវបានរដ្ឋសភាអនុម័ត ក៏ប៉ុន្តែ ត្រូវជាប់គាំងនៅព្រឹទ្ធសភា ដែលគ្រប់គ្រងដោយគណបក្សប្រជាធិបតេយ្យ។ លោកអូបាម៉ា និងគណបក្សប្រជាធិបតេយ្យប្រឆាំងនឹងច្បាប់នេះ ពីព្រោះ ច្បាប់នេះអនុញ្ញាតឲ្យលោកអូបាម៉ាខ្ចីបំណុលបន្ថែម សម្រាប់ទប់ទល់ការចំណាយបានត្រឹមឆ្នាំ២០១២ប៉ុណ្ណោះ។ នេះមានន័យថា គេនឹងត្រូវត្រឡប់មកចរចាជុំវិញបញ្ហាប្រាក់បំណុលនេះម្តងទៀត នៅឆ្នាំ២០១២ខាងមុខ ដែលជាឆ្នាំត្រូវធ្វើយុទ្ធនាការឃោសនាបោះឆ្នោតប្រធានាធិបតី និងបោះឆ្នោតសភា។
នៅថ្ងៃសៅរ៍ សមាជិកព្រឹទ្ធសភាមកពីគណបក្សប្រជាធិបតេយ្យបានបញ្ជូនផែនការផ្ទាល់របស់ពួកគេ ដើម្បីដាក់ជូនព្រឹទ្ធសភាបោះឆ្នោតអនុម័ត ក៏ប៉ុន្តែ ព្រឹទ្ធសភាមិនទាន់ទាំងបានអនុម័តផង ផែនការនេះត្រូវបានរដ្ឋសភាបោះឆ្នោតបដិសេធរួចជាស្រេចទៅហើយ។ ទីបំផុត គណបក្សប្រជាធិបតេយ្យក៏បានសម្រេចផ្អាកការបោះឆ្នោតលើផែនការនេះសិន ក្រោយពីមេដឹកនាំគណបក្សសាធារណរដ្ឋបានសុខចិត្តត្រឡប់ទៅចរចាជាមួយលោកអូបាម៉ាវិញ ដើម្បីព្យាយាមរកការសម្រុះសម្រួលគ្នា។
យោងតាមផែនការ ដែលលោកអូបាម៉ា និងគណបក្សសាធារណរដ្ឋកំពុងចរចាគ្នានេះ រដ្ឋាភិបាលអាមេរិកនឹងអាចខ្ចីបំណុល សម្រាប់បង្រ្គប់ការចំណាយរហូតដល់ឆ្នាំ២០១៣ ពោលគឺ រហូតដល់ក្រោយការបោះឆ្នោត ឆ្នាំ២០១២។
កាលពីល្ងាចថ្ងៃសៅរ៍ម្សិលមិញនេះ ក្រោយពីបានជជែកជាមួយលោកអនុប្រធានាធិបតីចូស៊ែហ្វ បាយដិន (Joseph Biden) លោកមីតឆ៍ ម៉ាក់កូនែល (Mitch McConnell) ប្រធានក្រុមសមាជិកព្រឹទ្ធសភាមកពីគណបក្សសាធារណរដ្ឋបានបង្ហាញនូវសុទិដ្ឋិនិយមថា គេនឹងអាចរកការសម្រុះសម្រួលគ្នាមួយបានទាន់ពេលវេលា ដើម្បីបញ្ចៀសអាមេរិកពីការក្ស័យធន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ