ប្រធានាធិបតីខឹងនឹងអាមេរិកដែលបិទដែនអាកាសមិនឲ្យយន្តហោះរបស់ខ្លួនហោះកាត់
ប្រធានាធិបតីវ៉េណេស៊ុយអេឡា បានសំដែងការខឹងសម្បារបន្ទាប់ពីមានដំណឹងថា យន្តហោះរបស់លោក សំដៅទីក្រុងប៉េកាំងនឹងត្រូវហាមឃាត់មិនឲ្យហោះហើរ នៅលើដែនអាកាសរបស់អាមេរិក។ តាមប្រធានាធិបតីនីកូឡា មាឌូរ៉ូ មន្រ្តីជាន់ខ្ពស់របស់រដ្ឋាភិបាលដែលត្រូវចូលទៅប្រជុំនៅទីស្នាក់ការរបស់អង្គការសហប្រជាជាតិ ក្នុងក្រុងញូវយ៉ក ក៏ត្រូវអាជ្ញាធរអាមេរិកបដិសេធមិនផ្តល់ទិដ្ឋាការឲ្យដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
នៅក្នុងសុន្ទរកថាថ្លែងទៅកាន់មហាជន នៅ ទីក្រុងការ៉ាកាស ប្រធានាធិបតីវ៉េណេស៊ុយអេឡាបានចោទប្រកាន់អាមេរិកចំៗថា បានបដិសេធមិនឲ្យយន្តហោះរបស់លោកហោះកាត់ទឹកដីអាមេរិក។ សម្រាប់លោក នីកូឡា មាឌូរ៉ូ នោះជាការជេរប្រមាថយ៉ាងជាក់ស្តែងរបស់អាមេរិកមកលើជាតិវ៉េណេស៊ុយអេឡា។
រហូតមកដល់ពេលនេះ អាជ្ញាធរអាមេរិកនៅមិនទាន់ចេញមុខបកស្រាយថា យ៉ាងម៉េចនៅឡើយទេ។ លោកប្រធានាធិបតីវ៉េណេស៊ុយអេឡាវិញបានបញ្ជាក់ឲ្យថា ការហាមមិនឲ្យប្រើដែនអាកាសអាមេរិកនឹងមិនរារាំងដំណើររបស់លោកទៅទីក្រុងប៉េកាំង នៅចុងសប្តាហ៍នេះទេ។ តាមធម្មតា យន្តហោះរបស់ប្រទេសអាមេរិកឡាទីនត្រូវការប្រើដែនអាកាសរបស់អាមេរិកខាងជើង ដើម្បីចំណេញពេល ហោះសំដៅមហាសមុទ្រប៉ាស៊ីហ្វិក។ ក្នុងករណីមានការហាមឃាត់ពីអាមេរិក យន្តហោះរបស់លោកប្រធានាធិបតីម៉ាឌូរ៉ូនឹងត្រូវហោះផ្លូវផ្សេង និងឆ្ងាយជាងមុន។
ក្រៅតែពីបិទមិនឲ្យប្រើដែនអាកាស អាមេរិក ប្រធានាធិបតីវ៉េណេស៊ុយអេឡាចោទអាមេរិកផងដែរ ថាបានបដិសេធមិនផ្តល់ទិដ្ឋាការឲ្យមន្រ្តីរបស់ខ្លួន ដែលត្រូវទៅចូលរួម នៅក្នុងមហាសន្និបាតរបស់អង្គការសហប្រជាជាតិ ដែលត្រូវធ្វើនៅចុងខែកញ្ញានេះ។ ដោយក្រេវក្រោធ លោកប្រធានាធិបតីម៉ាឌូរ៉ូបានទាមទារឲ្យគេរើទីតាំងចេញពីទីក្រុងញូវយ៉ក។
សូមបញ្ជាក់ថា នេះមិនមែនជាលើកទីមួយទេ ដែលវ៉េណេស៊ុយអេឡាចោទប្រកាន់អាមេរិក។ ទំនាក់ទំនងអាមេរិក និងវ៉េណេស៊ុយអេឡាល្អក់កករជាមួយគ្នា ជាង១០ឆ្នាំមកហើយ។ ប្រទេសទាំងពីរបានកាត់ផ្តាច់ មិនឲ្យមានឯកអគ្គរដ្ឋទូត ក្នុងប្រទេសរៀងខ្លួនៗ តាំងពីឆ្នាំ ២០១០។ លោកប្រធានាធិបតីបច្ចុប្បន្ន នីកូឡា ម៉ាឌូរ៉ូ បានដើរតាមនយោបាយរបស់ប្រធានាធិបតីវ៉េណេស៊ុយអេឡាមុន គឺលោកអ៊ុយហ្គូ ស្សែវេស ដោយបន្តនយោបាយអរិភាពជាមួយអាមេរិក។
គំនុំគុំគួនចុងក្រោយ រវាងប្រទេសទាំងពីរ កើតមាន ឡើង នៅពេលប្រធានាធិបតីវ៉េណេស៊ុយអេឡាបានផ្គើន ដោយប្រកាសផ្តល់សិទ្ធិជ្រកកោនដល់យុវជនEdward Snowden អ្នកទម្លាយឯកសារសម្ងាត់អាមេរិក ដែលអាជ្ញាធរអាមេរិកកំពុងតាមរកចាប់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ