ការប្រលងគំនូរត្លុកព្យាការីមូហាម៉ាត់ នៅតិចសាស់ រងការវាយប្រហារ
ប៉ូលិសអាមេរិកបានបាញ់សម្លាប់ខ្មាន់កាំភ្លើងពីរនាក់ នៅយប់មិញ ដែលបានបើកការបាញ់រះសំដៅលើមជ្ឈមណ្ឌលតាំងពិព័រណ៍និងប្រកួតប្រជែងរូបគំនូរត្លុកព្យាការី មូហាម៉ាត់។ ពុំទាន់មានការបកស្រាយ ឬបទអត្ថាធិប្បាយអ្វីទេ ទាក់ទងនឹងការវាយប្រហារនេះទេ ប៉ុន្តែព្រឹត្តិការណ៍នេះបានធ្វើឱ្យនឹងឃើញដល់មហាភេរវកម្មនៅទីក្រុងប៉ារីស ស្លាប់មនុស្សអស់១៤នាក់ កាលពីដើមខែមករាឆ្នាំ២០១៥ ប្រឆាំងនឹងកាសែតCharlie Hebdo ដែលចូលចិត្តគូររូបត្លុកកំប្លែងផ្សេងៗ ជាពិសេសរូបត្លុកព្យាការី មូហាម៉ាត់។ តើការវាយប្រហារនេះអាចមានពាក់ព័ន្ធនឹងពួកភេរវនិយមអាល់កៃដា ឬ អង្គការរដ្ឋអ៊ីស្លាមដែរឬយ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៣
មានព័ត៌មានលម្អិតតិចតួចបំផុតទាក់ទងនឹងទង្វើ ឬបុព្វហេតុរបស់ខ្មាន់កាំភ្លើងទាំងពីរ។ ហើយក៏គ្មានក្រុមណាចេញមុខជាផ្លូវការប្រកាសទទួលសកម្មភាពវាយប្រហារបាញ់រះលើមជ្ឈមណ្ឌលដែលកំពុងតាំងពិព័រណ៍ប្រកួតប្រជែងរូបគំនូរត្លុកព្យាការីមូហាម៉ាត់ដែរ។ ប៉ុន្តែបើតាមវិបសៃត៍ SITE ដែលមានឯកទេសផ្នែកតាមដានគេហទំព័រជីហាតផ្សេងៗ មានបុរសម្នាក់តាំងខ្លួនជាមនុស្សរបស់អង្គការរដ្ឋអ៊ីស្លាមបានបង្ហោះសារ Twitter ប្រកាសថាការបាញ់រះនៅរដ្ឋតិចសាស់ជាស្នាដៃរបស់សកម្មជនរដ្ឋអ៊ីស្លាម។ មានឈ្មោះ Abu Hussain Al Britani ជនជីហាតអង់គ្លេស បានអះអាង ក្នុងសារទ្វីទ័រ កាលពីថ្ងៃទី៣ឧសភា ថាបងប្អូនរួមអាវុធបានបើកការបាញ់ប្រហារ លើក្រុមអ្នកគូររូបត្លុកព្យាការី ដែលគិតថាទាហានរដ្ឋអ៊ីស្លាមធ្វើអ្វីមិនកើតនៅតិចសាស់។
សូមបញ្ជាក់ថាហេតុការណ៍បាញ់រះ តែប៉ុន្មានវិនាទីសោះនោះ បានកើតឡើងនៅល្ងាចមិញ ម៉ោងនៅរដ្ឋតិចសាស់ សហរដ្ឋអាមេរិក ដោយខ្មាន់កាំភ្លើងពីរនាក់ បើករថយន្តមកដល់មុខមជ្ឈមណ្ឌលតាំងពិព័រណ៍ ក៏តាំងផ្តើមការបាញ់រះទៅលើឆ្មាំការពាររក្សាសន្តិសុខ។ ប៉ូលិសក៏បាញ់តបវិញ សម្លាប់ជនទាំងពីរនោះទៅ។ ប៉ូលិសសង្ស័យថាក្នុងរថយន្តរបស់ខ្មាន់កំាំភ្លើងទាំងពីរទំនងជាអាចមានបង្កប់ជាតិផ្ទុះ ទើបត្រូវជម្លៀសប្រជាជន និងអ្នកចូលរួមតាំងពិព័រណ៍ប្រមាណ៣០០នាក់ចេញទាំងអស់ ដើម្បីទុកភារកិច្ចឱ្យក្រុមអ្នកដោះមីនធ្វើការ។
សង្គ្រាមប្រឆាំងនឹងសេរីភាពនៃការបញ្ចេញមតិ
ការប្រលងគំនូរនៅជាយក្រុងដាឡាសនេះ ត្រូវបានរៀបចំឡើងដោយសមាគមAmerican Freedom Defense Initiative (AFDI) ដែលជាក្រុមអ្នកស្តាំនិយមជ្រុល ដ៏ចម្រូងចម្រាសនៅអាមេរិក។ សមាគមផ្តួចផ្តើមដើម្បីការពារសេរីភាព ធ្លាប់បានបរិហារតាំងពីយូរយារមកហើយ អំពី និន្នាការរុករាញទន្ទ្រានទីនៃអ៊ីស្លាមជ្រុលនិយម នៅលើទឹកដីអាមេរិក។ អ្នកស្រី Pamela Gellar ជាប្រធានសមាគម ល្បីខាងស្អប់អ៊ីស្លាម បានតាំងខ្លួនជាអ្នកការពារសេរីភាពនៃការបញ្ចេញមតិ និងធ្លាប់ដឹកនាំបាតុកម្មប្រឆាំងនឹងការសាងសង់មជ្ឈមណ្ឌលវប្បធម៌អ៊ីស្លាម នៅក្បែរទីលាន World Trade Center នាទីក្រុងញូវយ៉កផង។
ក្នុងអត្ថន័យការពារសេរីភាពនៃការបញ្ចេញមតិ សមាគមនេះបានរៀបចំសន្និសីទ តាំងពិព័រណ៍រូបគំនូរ និងរូបត្លុកព្យាការីមូហាម៉ាត់ ចំនួន២០០ផ្ទាំង ដើម្បីប្រកួតប្រជែងគ្នាយកពានរង្វាន់ ដោយអញ្ជើញប្រមុខបក្សស្តាំនិយមជ្រុលហូឡង់លោក Geert Wilders ជាភ្ញៀវកិត្តិយស។ គំនូរដែលជាប់លេខមួយនឹងទទួលបានរង្វាន់១ម៉ឺនដុល្លារអាមេរិក។
អ្នកស្រីប្រធានសមាគម បានពន្យល់បន្ថែមថា អ្នកស្រីបានជ្រើសរើសសាលតាំងពិព័រណ៍គំនូរនៅក្រុងដាឡាស ព្រោះជាសាលធ្លាប់ទទួលសន្និសីទស្តីអំពីការប្រយុទ្ធប្រឆាំងនឹងការស្អប់ខ្ពើមអ៊ីស្លាម ដែលរៀបចំឡើងដោយសមាគមអ៊ីស្លាមអាមេរិក។ សន្និសីទបានប្រព្រឹត្តទៅដោយមានការការពារសន្តិសុខយ៉ាងខ្លាំងបំផុត។
ក្រោយភេរវកម្ម ប្រឆាំងនឹងកាសែតcharlie Hebdo នៅទីក្រុងប៉ារីស ស្លាប់មនុស្សអស់១៤នាក់ មានមនុស្សស្លាប់ពីរនាក់ និងរបួស៦នាក់ នៅក្នុងវាយប្រហារពីរផ្ទួនៗគ្នា នៅទីក្រុងកូផែនហាក ប្រទេសដាណឺម៉ាក ប្រឆាំងនឹងវិហារជ្វីហ្វ និងមជ្ឈមណ្ឌលវប្បធម៌ដែលវិចិត្រករគូររូបព្យាការីជនជាតិស៊ុយអែត lars Vilks កំពុងនៅធ្វើការ។ វិចិត្រករស៊ុយអែតរូបនេះ មានឈ្មោះក្នុងបញ្ជីខ្មៅ ស្វែងរកសម្លាប់របស់ពួកភេរវជនអ៊ីស្លាមជ្រុលនិយមដូចជាអ្នកកាសែតរបស់ទស្សនាវដ្តីCharlie Hebdo ដែរ។ ទស្សនាវដ្តីត្លុកកំប្លែងបារំាង Charlie Hebdo ដែលនឹងត្រូវទទួលពានរង្វាន់ សិទ្ធិសេរីភាពសារព័ត៌មាន នៅក្នុងទីក្រុងញូយ៉ក ពីសំណាក់អង្គការអ្នកនិពន្ធ និងអ្នកកាសែតអាមេរិកំាងឈ្មោះ Pen Center នៅថ្ងៃស្អែកទី ៥ ឧសភានេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ