ប៉ូលិសអាមេរិកសម្លាប់មនុស្សជាមធ្យមជាងពីរនាក់ក្នុងមួយថ្ងៃ (កាសែត)
តួលេខពិត ខុសគ្នាឆ្ងាយណាស់ពីតួលេខផ្លូវការ ! បើតាមកាសែតWashington Post ចេញផ្សាយនៅថ្ងៃអាទិត្យនេះ បានបង្ហើបឱ្យដឹងថា ប៉ូលិសអាមេរិកសម្លាប់មនុស្សជាមធ្យម ជាងពីរនាក់ក្នុងមួយថ្ងៃនៅឆ្នាំ ២០១៥នេះ។ ជាចំនួនដ៏ច្រើនបើប្រៀបទៅនឹងស្ថិតិរបស់រដ្ឋសហព័ន្ធ ដែលរាប់ឃើញត្រឹមសម្លាប់ប្រមាណ ១នាក់ក្នុងមួយថ្ងៃ។ ហើយជនរងគ្រោះភាគច្រើនមានស្បែកខ្មៅ។
ចុះផ្សាយនៅថ្ងៃ៖ កែប្រែថ្ងៃទី៖
គិតចាប់ពីខែមករា ២០១៥មក ប៉ូលិសអាមេរិកបានសម្លាប់មនុស្សអស់យ៉ាងហោចណាស់ ៣៨៥នាក់ នៅពេញផ្ទៃសហរដ្ឋ ឬស្មើនឹង ២,៦នាក់ជាមធ្យមក្នុងមួយថ្ងៃ។ ជាចំនួនដែលខុសគ្នាឆ្ងាយអំពីស្ថិតិរបស់រដ្ឋសហព័ន្ធ។ អាជ្ញាធរក៏ទទួលស្គាល់អំពីរបាយការណ៍មិនពេញលេញរបស់ខ្លួន ព្រោះក្នុងរយៈពេល១០ឆ្នាំចុងក្រោយនេះ ប៉ូលិសមូលដ្ឋាន របាយការណ៍ជូនទៅថ្នាក់លើ ដោយឈរលើគោលការណ៍ស្ម័គ្រចិត្ត។
បើតាមសារព័ត៌មានWashington Post ដដែល ជនរងគ្រោះ ជាជនជាតិអាមេរិកស្បែកខ្មៅ មានចំនួនច្រើនជាងដល់បីដង។ ភាគច្រើននៃជនរងគ្រោះស្លាប់ក្រោមស្នាដៃប៉ូលិស សុទ្ធតែមានអាវុធខ្លីនឹងដៃ ឬយ៉ាងហោចណាស់ក៏មានកាន់កាំបិត ឬវត្ថុផ្សេងប្រើជាអាវុធតបតនឹងប៉ូលិស។ មានតែ១៦%ប៉ុណ្ណោះ ដែលគ្មានអ្វីនឹងដៃ ឬមានដែរតែជាវត្ថុលេង។ នៅក្នុងចំណោមករណីប៉ូលិសសម្លាប់មនុស្សទាំង៣៨៥ មានតែបីករណី ដែលប៉ូលិសត្រូវជាប់ក្តីក្តាំប្តឹងផ្តល់។
របាយការណ៍នេះធ្លាក់មកជួនចំពេលដែលសង្គមអាមេរិកកំពុងប្រឈមនឹងការតស៊ូមតិថ្នាក់ជាតិ យ៉ាងពុះកញ្ជ្រោល ស្តីអំពីការប្រព្រឹត្តអំពើហិង្សារបស់ប៉ូលិសអាមេរិក ជាពិសេសពីសំណាក់ប៉ូលិសស្បែកស ទៅលើពលរដ្ឋស្បែកខ្មៅ ពលរដ្ឋមានដើមកំណើតនិយាយភាសាអេស្ប៉ាញ។
ហេតុអ្វី ប៉ូលិស ប្រើអំពើហិង្សា ច្រើន
គឺបណ្តាលមកពីការប្រើអាវុធ ! កាលពីមុន នៅក្នុងទសវត្សរ៍ឆ្នាំ១៩៧០ និងរហូតដល់ដើមឆ្នាំ១៩៨០ មានឃាតកម្មច្រើន ប៉ូលិសអាមេរិករងការធ្វើឃាតសម្លាប់អស់ច្រើននាក់ណាស់។ ហេតុដូច្នេះហើយបានជាប៉ូលិសបង្ខំចិត្តត្រូវការពារខ្លួនដោយ ពាក់អាវក្រោះ មិនថាជាប៉ូលិស-នគរបាលនៅតាមភូមិស្រុកដាច់ស្រយ៉ាល ចុកកាត់ម៉ាត់ញករបស់សហរដ្ឋអាមេរិកជ្រុងណាទេ។ ប៉ូលិសអាមេរិកក៏ចាប់ផ្តើមប្រុងប្រយ័ត្នការពារខ្លួនខ្លាំង ដើម្បីសុវត្ថិភាពបុគ្គលផ្ទាល់។
នៅទីបំផុត ប៉ូលិសអាមេរិក ក៏បានជ្រើសរើសប្រើយុទ្ធវិធី មួយដែលមានលក្ខណៈស្ទើរដូចទាហាន ហើយប្រកាន់យកនយោបាយ “គ្មានសោះការអនុគ្រោះ” អនុវត្តទៅតាមកំរិតនៃស្ថានភាពជាក់ស្តែង។ ជាមួយនឹងនយោបាយនេះ ប៉ូលិសអាមេរិកបានកំណត់ជាគោលការណ៍ថា ទោះបីជាមានជម្លោះ ឬការបង្កហេតុតូចតាចក៏ដោយ ក៏ត្រូវតែធ្វើអន្តរាគមន៍កាចខ្លាំងភ្លាម ដើម្បីកុំឱ្យមានឧក្រិដ្ឋកម្មកើតឡើងទាន់។ អញ្ចឹងហើយបានជាប៉ូលិសមិនញញើតនឹងចេញធ្វើសកម្មភាពបង្ក្រាបទេ យ៉ាងញឹកញយទេ។ ប៉ុន្តែទោះបីជាចំនួនឃាតកម្ម បើនិយាយជាទូទៅ បានថយចុះខ្លាំងចាប់តាំងពីឆ្នាំ១៩៩០មកក៏ដោយ ក៏ប៉ូលិសអាមេរិកនៅតែរក្សាឥរិយាបថ និងនៅបន្តអនុវត្តនយោបាយដដែល។
បញ្ចប់ការប្រើអាវុធធុនធ្ងន់
ក្រោយហេតុការណ៍នៅ Ferguson -New York -Baltimore អំពើហិង្សារបស់ប៉ូលិសអាមេរិកបានក្លាយជាបច្ចុប្បន្នភាពយ៉ាងក្តៅគគុក មិនខុសអ្វីពីបញ្ហារើសអើងពូជសាសន៍ទេ ! ដោយខ្វាយខ្វល់នឹងភាពតានតឹង សម្ពាធសហគមន៍នេះ សហរដ្ឋអាមេរិក របស់លោក បារ៉ាក់ អូបាម៉ា បានប្រកាសកំរិតនិងឃុំគ្រងការប្រើប្រាស់អាវុធ ក្នុងជួរប៉ូលិស។
ដើម្បីលុបបំបាត់រូបភាពប៉ូលិស កាច មានសណ្ឋានដូចជាយោធា ស្ទុះចូលរបៀបដូចវាយសំរុកចូលកាន់កាប់ភូមិស្រុក រថពាសដែក អាវុធសម្រាប់ប្រយុទ្ធលើសមរភូមិបែរទៅជាភ្ជង់ជនស៊ីវិល ធុនតូច ធុនធំ ឬក៏ឯកសណ្ឋានបិទមុខ ... ដែលជាសម្ភារៈបរិក្ខាប៉ូលិល នឹងត្រូវលែងអនុញ្ញាតឱ្យមានក្នុងភ្នាក់ងារប៉ូលិសសហព័ន្ធហើយ។ សូម្បីតែអាវុធដែលលែងសូវប្រើ ដូចជាដាវ ក៏ត្រូវហាមឃាត់ដែរ។
លើសពីនេះទៅទៀត នឹងមានឃុំគ្រងយ៉ាងហ្មត់ចត់បំផុតអំពីលក្ខខណ្ឌនៃការមាន និងការប្រើប្រាស់អាវុធជាប្រចាំរាល់ថ្ងៃ ដោយផ្តល់វគ្គបំពាក់បំប៉នអប់រំ។ ស្ថាបនាទំនុកចិត្តរវាងប៉ូលិសនិងពលរដ្ឋក្នុងភូមិ ដោយកាត់បន្ថយចំនួនអ្នកនៅអង្គុយក្នុងការិយាល័យ ទៅជាកម្លាំងប៉ូលិស ដែលស្គាល់មូលដ្ឋានច្បាស់លាស់ និងមានទំនាក់ទំនងល្អពលរដ្ឋ ព្រមទាំងបំពាក់ម៉ាស៊ីនថតឱ្យប៉ូលិស។
វិធានការនេះបានទទួលការស្វាគមន៍យ៉ាងខ្លាំងពីសំណាក់អង្គការសង្គមស៊ីវិលដ៏មានអំណាចនៅអាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ