នាយករដ្ឋមន្រ្តីបារាំងបំពេញទស្សនកិច្ចលើកទីមួយនៅកូឡុំប៊ី
លោក ម៉ានុយអែល វ៉ាល្ស នាយករដ្ឋមន្រ្តីបារាំង កំពុងតែបំពេញទស្សនកិច្ចជាលើកទីមួយ នៅក្នុងប្រទេសកូឡុំប៊ី ហើយក៏ជាលើកទីមួយដែរ សម្រាប់ទ្វីបអាមេរិកខាងត្បូងទាំងមូល។ ដំណើរទស្សនកិច្ច ដែលផ្តោតសំខាន់ ទៅលើការរឹតបន្តឹងចំណងសេដ្ឋកិច្ចរវាងប្រទេសទាំងពីរ បារាំងក៏នឹងឆ្លៀតស្វែងរកការគាំទ្រ ពីសំណាក់កូឡុំប៊ី ដើម្បីសម្រេចឲ្យបាន នូវកិច្ចព្រមព្រៀងមួយ ស្តីពីការកាត់បន្ថយឧស្ម័នពុល ដែលបារាំង នឹងរៀបចំបើកកិច្ចពិភាក្សា នៅចុងឆ្នាំនេះ នៅទីក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
មានស្រុកកំណើតនៅអេស្ប៉ាញ លោកម៉ានុយអែល វ៉ាល្ស នាយករដ្ឋមន្រ្តីបារាំងបច្ចុប្បន្ន ចេះនិយាយភាសាអេស្ប៉ាញ យ៉ាងរត់មាត់។ ដូច្នេះ វាមិនជាការលំបាកទេ ក្នុងការចរចា ពិភាក្សាការងារ ជាមួយនឹងប្រទេសអាមេរិកខាងត្បូង ដែលភាគច្រើនជាប្រទេសនិយាយភាសាអាស្ប៉ាញ តួយ៉ាងដូចជាប្រទេសកូឡុំប៊ីជាដើម។
អមដំណើរជាមួយលោកនាយករដ្ឋមន្ត្រីបារាំង មានរដ្ឋមន្រ្តីក្រសួងវប្បធម៌ និងរដ្ឋមន្រ្តីក្រសួងពាណិជ្ជកម្ម ព្រមទាំងប្រធានក្រុមហ៊ុនបារាំងធំៗជាង ៤០នាក់ផ្សេងទៀត។ កម្មវត្ថុចំបងនៃទស្សនកិច្ចនេះ គឺផ្តោតសំខាន់ទៅលើ ការដោះដូរជញ្ជីងពាណិជ្ជកម្មរវាងប្រទេសទាំងពីរ ដែលមានកំរិតកើនឡើង ទ្វេរមួយជាបី ចាប់តាំងពីឆ្នាំ ២០០៥មក ដែលគិតជាទឹកប្រាក់ មានប្រមាណជា១ពាន់៦រយលានអឺរ៉ូ។
បន្ទាប់ពីបានជួបជាមួយ តំណាងក្រុមសង្គមស៊ីវីលកូឡុំប៊ី កាលពីល្ងាចថ្ងៃពុធទី ២៤មិថុនា លោក ម៉ានុយអែល វ៉ាល្ស នឹងជួបពិភាក្សាជាមួយលោក ជ័ន ម៉ានុយអែលសានតូស ប្រធានាធិបតីកូឡុំប៊ី នៅថ្ងៃព្រហស្បតិ៍នេះ។ ក្រៅពីពង្រីកបន្ថែម ការដោះដូរពាណិជ្ជកម្ម បារាំងមានគម្រោងចង់បានការគាំទ្ររបស់កូឡុំប៊ី ក្នុងតំណើរការចរចា ស្វែងរកកិច្ចព្រមព្រៀង ស្តីពីការកាត់បន្ថយឧស្ម័នពុល កាបូនិក ដែលជាមូលហេតុនៃការកើនឡើងកំដៅផែនដី។ យ៉ាងណាមិញ កូឡូំប៊ី ជាប្រទេសមានទួនាទីមិនតូចទេ ក្នុងការកាត់បន្ថយឧស្ម័នកាបូនិក ដោយសារប្រទេសនេះ ជាប្រទេសផលិតប្រេងឆៅ និងធ្យូងថ្ម។ ប្រភពថាមពលទាំងពីរនេះហើយ ដែលជាអ្នកបញ្ចេញឧស្ម័នពុលទៅក្នុងបរិយាកាស។
ដោយឡែក លោកនាយករដ្ឋមន្រ្តី ក៏បានរំលឹកផងដែរ ពីការចូលរួមរបស់បារាំង ក្នុងការកសាងសន្តិភាពនិងការបង្រួបបង្រួមជាតិ នៅកូឡុំប៊ី ដើម្បីបញ្ចប់ទាំងស្រុង នូវសង្គ្រាមស៊ីវីល ដែលបានអូសបន្លាយ អស់រយៈពេល ជាងកន្លះសតវត្សមកហើយ។ លោកម៉ានុយអែល វ៉ាល្ស បានអះអាងជាថ្មីម្តងទៀតថា បារាំងនឹងឈរនៅខាងរដ្ឋាភិបាល កូឡុំប៊ី ក្នុងការកសាងសន្តិភាព បញ្ចប់សង្គ្រាមស៊ីវីល ជាមួយក្រុមឧទ្ទាម។
គួររំលឹកផងដែរថា សង្គ្រាមរវាងរដ្ឋាភិបាលកូឡុំប៊ី និងក្រុមឧទ្ទាមហ្វាកកុម្មុយនីស្តនិយម បានសម្លាប់ជីវិតមនុស្សប្រមាណជា ជាង២សែននាក់ និងបានរុញច្រានប្រជាជនកូឡុំប៊ី ជាច្រើនពាន់នាក់ ឲ្យរត់ភៀសខ្លួនទៅក្រៅប្រទេស។ សង្រ្គាមស៊ីវិល បានធ្វើឲ្យក្រុមជនទុច្ចរិត នឹងក្រុមឧទ្ទាមពង្រីក ការជួញដូរ គ្រឿងញៀនកូកាអ៊ីន ហើយធ្វើឲ្យកូឡុំប៊ី មានឈ្មោះល្បីរន្ទឺ ថាជាប្រភពចែកចាយកូកាអ៊ីន។
ស្ថិតក្នុងបរិបទ ពង្រឹងសន្តិសុខ និងការបង្រួបបង្រួមជាតិ បារាំងបានបញ្ជូនកងទាហ៊ាន មួយចំនួនតូច ដើម្បីទៅបង្វឹកហាត់ និងអភិវឌ្ឍន៍សមត្ថភាព និងវិន័យ ដល់កងកំលាំងប្រដាប់អាវុធរបស់កូឡុំប៊ី។ បារាំងក៏បានផ្តល់ជាជំនួយផ្លូវច្បាប់ផងដែរ ជាពិសេសទាក់ទិនទៅនឹងការគ្រប់គ្រង និងបែងចែក ដីធ្លី នៅតាមតំបន់ដែលធ្វើសមាហរណកម្ម។ បន្ទាប់ពីកូឡុំប៊ី លោក នាយករដ្ឋមន្រ្តីបារាំង និងបន្តដំណើរទៅប្រទេសអេក្វាទ័រ នៅថ្ងៃសុក្រស្អែក ដើម្បីជួបពិភាក្សា ជាមួយលោកប្រធានាធិបតី សង្គមនិយម រ៉ាហ្វាអែល កូរ៉េអា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ