អាមេរិកនិងគុយបាផ្សាភ្ជាប់ទំនាក់ទំនងការទូតឡើងវិញ
លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានប្រកាសជាផ្លូវការនៅថ្ងៃពុធម្សិលមិញក្នុងការផ្សាភ្ជាប់ឡើងវិញនូវទំនាក់ទំនងការទូតរវាងអាមេរិកនិងគុយបាដែលត្រូវបានកាត់ផ្តាច់តាំងពីជាង៥៤ឆ្នាំមកហើយ និងការបើកឡើងវិញនូវស្ថានទូតអាមេរិកនៅទីក្រុងឡាហាវ៉ាន។
ចុះផ្សាយនៅថ្ងៃ៖ កែប្រែថ្ងៃទី៖
«អស់រយៈពេលជាង៥៤ឆ្នាំមកហើយ នាអំឡុងពេលសង្រ្គាមត្រជាក់ ដែលសហរដ្ឋអាមេរិកបានបិទស្ថានទូតរបស់ខ្លួននៅទីក្រុងឡាហាវ៉ាន។ នៅថ្ងៃនេះ ខ្ញុំសូមប្រកាសថាសហរដ្ឋអាមេរិកបានយល់ព្រមផ្សាភ្ជាប់ទំនាក់ទំនងការទូតផ្លូវការសាជាថ្មីឡើងវិញជាមួយសាធារណរដ្ឋគុយបា និងបើកឡើងវិញនូវ ស្ថានទូតតំណាងរវាងប្រទេសទាំងពីរ។ នេះគឺជាការបោះជំហានជាប្រវត្តិសាស្រ្តមួយ ក្នុងកិច្ចខិតខំប្រឹងប្រែងរបស់យើង ដើម្បីធ្វើប្រកតីកម្មទំនាក់ទំនងជាមួយរដ្ឋាភិបាលនិងប្រជាជនគុយបា និងក៏ជាការចាប់ផ្តើមជំពូកថ្មីមួយជាមួយប្រទេសជិតខាងរបស់យើងក្នុងទ្វីបអាមេរិក។ »
ក្នុងសន្ទរកថាជាងប្រាំពីរនាទីថ្លែងចេញពីសួនច្បារនៃសេតវិមាន លោកប្រធានាធិបតី អូបាម៉ាបានគូសបញ្ជាក់ពីទម្រង់នៃការផ្សាភ្ជាប់ទំនាក់ទំនងគ្នានេះ ដោយផ្តោតលើអនាគតជាជាងបង្ខាំងខ្លួនក្នុងអតីតកាល ពិសេសការស្តារទំនាក់ទំនងខាងវិស័យអប់រំ សេដ្ឋកិច្ច និងវិនិយោគ។ លោក អូបាម៉ា ក៏បានសង្កត់ធ្ងន់ថា គុយបា និងសហរដ្ឋអាមេរិកមានប្រយោជន៍រួមមួយចំនួនដូចជា គោលនយោបាយប្រយុទ្ធប្រឆាំងនឹងភេរវកម្ម ការឆ្លើយតបនឹងគ្រោះមហន្តរាយ និងការអភិវឌ្ឈន៍ជាដើម។ ក៏ប៉ុន្តែលោកក៏ទទួលស្គាល់ផងដែរថា ប្រទេសទាំងពីរនៅមានភាពខុសគ្នាយ៉ាងឆ្ងាយ ក្នុងបញ្ហានៃសេរីភាពបញ្ចេញមតិ តែអាមេរិកនឹងមិនស្ទាក់ស្ទើរនឹងបញ្ចេញមតិនោះទេនៅពេលមានភាពខ្វែងគ្នារវាងប្រទេសទាំងពីរលើគុណតម្លៃនានា មានជាអាទិ៍ លទ្ធិប្រជាធិបតេយ្យ និងសិទ្ធិមនុស្ស។ បើទោះជាលោកមិនរំពឹងថា ការកែលម្អទាំងនេះ អាចធ្វើទៅបានក្នុងរយៈពេលខ្លី តែលោកសង្ឃឹមថាការចូលរួមរបស់អាមេរិកតាមរយៈស្ថានទូត ជំនួញ វិនិយោគ អាមេរិក វានឹងអាចទៅរួច។
លោកប្រធានធិបតីបានបញ្ចប់សន្ទរកថាដោយថ្លែងថា៖ នៅខែមករាឆ្នាំ១៩៦១ ជាឆ្នាំកំនើតរបស់ខ្ញុំ នៅពេលដែលលោកប្រធានធិបតីអាមេរិក Eisenhower ប្រកាសពីការកាត់ផ្តាច់ទំនាក់ទំនងជាមួយប្រទេសគុយបា លោកបានមានប្រសាន៍ថា នេះគឺជាក្តីសង្ឃឹមនិងការជឿជាក់របស់ខ្ញុំថា ក្នុងពេលអនាគត ដែលនឹងមិនជាវែងនោះទេ ទំនាក់ទំនងរវាងប្រទេសយើងទាំងពីរអាចនឹងកើតមានជាថ្មីឡើងវិញ តាមការស្វែងរកទំនាក់ទំនងធម្មតាក្នុងគ្រប់រូបភាព។ ដូចនេះគឺថា វាហាក់ដូចជាទាមទារពេលបន្តិចមែន ប៉ុន្តែខ្ញុំជឿថាពេលនោះបានមកដល់ហើយ ហើយអនាគតល្អប្រសើរជាងមុនក៏នឹងកើតមាននាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ