រដ្ឋញូវយ៉កសហរដ្ឋអាមេរិកបើកឱ្យលក់កញ្ឆាដើម្បីព្យាបាលជំងឺ
បន្ទាប់ពីបានអនុញ្ញាតឱ្យជក់/លក់កញ្ឆដោយស្របច្បាប់នៅតាមរដ្ឋខ្លះមក ចាប់ពីថ្ងៃព្រហស្បតិ៍ទី ៧ មករានេះទៅ រដ្ឋញូវយ៉ករបស់សហរដ្ឋអាមេរិកក្លាយជារដ្ឋទី២៣ ដែលបើកឱ្យលក់កញ្ឆាសម្រាប់ព្យាបាលជំងឺ។ មជ្ឈមណ្ឌលលក់កញ្ឆាជាថ្នាំនេះ បានដាំដុះកញ្ឆាក្នុងទំហំ ២ម៉ឺន៣ពាន់ម៉ែត្រការ៉េ នៅកណ្តាលក្រុង ព័ទ្ធដោយរបងចាស់ៗ និងគ្មានប៉ូលិស ឬភ្នាក់ងារសន្តិសុខការពារទេ។
ចុះផ្សាយនៅថ្ងៃ៖
ការដាំកញ្ឆា ដោយស្របច្បាប់កណ្តាលក្រុង ធ្លាប់ឃើញមានច្រើនហើយនៅ Denverរដ្ឋកូឡូរ៉ាដូ -San Francisco រដ្ឋកាលីហ្វ័រនីញ៉ា... ប៉ុន្តែមជ្ឈមណ្ឌលដាំកញ្ឆានៅញូវយ៉កនេះ ជាមជ្ឈមណ្ឌលដំបូងគេបង្អស់ ដែលមានតាំងនៅក្រុងមួយមានពលរដ្ឋរស់នៅលើសពី១លាននាក់។
មជ្ឈមណ្ឌលនេះគ្រប់គ្រងដោយក្រុមហ៊ុនឧស្សាហកម្ម Blommfield Industries ក្រុមហ៊ុនមួយក្នុងចំណោមក្រុមហ៊ុន៥ដែលរដ្ឋញូវយ៉កអនុញ្ញាតឱ្យលក់កញ្ឆាដើម្បីព្យាបាលជំងឺ។
តើដើម្បីព្យបាលជំងឺអ្វីខ្លះ ? មជ្ឈមណ្ឌលបានបើកទ្វារចាប់ពីថ្ងៃព្រហស្បតិ៍ទី ៧ មករានេះ មែន ប៉ុន្តែមន្ទីរចែកចាយឱសថទាំង២០ មិនទាន់អាចបើកទ្វារលក់ថ្នាំកញ្ឆាបានទាំងអស់ភ្លាមទេ ត្រូវបើកម្តងៗមួយជាបន្តបន្ទាប់។ មានតែអ្នកជំងឺមានរោគធ្ងន់ៗតែប៉ុណ្ណោះ ដែលអាចមករកទិញថ្នាំកញ្ឆាបាន ដូចជាមានជំងឺមហារីក ជំងឺញ័រ ប៉ាគីនសុន ជំងឺឆ្អឹង និងជំងឺឆ្កួតជ្រូក។
អ្នកជំងឺអាចរកទិញថ្នាំកញ្ឆានេះបាន ក្នុងទម្រង់ជាល្បាយ បំផ្លែងទៅជាគ្រាប់ថ្នាំ ជាប្រេង ឬជាថ្នាំដំណក់ មិនមែនទិញកញ្ឆាស្រស់ៗយកទៅជក់ឡើយ។ គ្មានក្រុមហ៊ុនណាមួយ បង្ហើបអំពីតម្លៃថ្នាំកញ្ឆានេះទេ ប៉ុន្តែតម្លៃទាបបំផុតប្រហែលជា២០០ដុល្លារ ក្នុងមួយខែ សម្រាប់អ្នកជំងឺម្នាក់។ ក្រុមហ៊ុនធានារ៉ាប់រងជំងឺឯកជន និងរដ្ឋ មិនទទួលបន្ទុកសងថ្លៃថ្នាំប្រភេទនេះទេ។ គេប៉ាន់ប្រមាណថាមានប្រជាជននៅរដ្ឋញូវយ៉កប្រមាណពី០,៥ ទៅ១,៥% អាចមានសិទ្ធិទទួលការព្យាបាលដោយកញ្ឆានេះ។
កញ្ឆា និងផលិតផលផ្សំពីកញ្ឆា មិនត្រូវបានដាក់ឱ្យស្ថិតក្រោមការត្រួតពិនិត្យរបស់ភ្នាក់ងារឱសថ និងចំណីអាហារអាមេរិកទេ។ ការសិក្សា ដែលពីមុននិយាយច្រើនអំពីផលអវិជ្ជមាននិងភាពញៀនរបស់កញ្ឆា ក៏ចាប់ផ្តើមឃើញកាន់ច្រើនអំពីផលល្អរបស់កញ្ឆាដែរ។ នេះបើតាមការគូសបញ្ជាក់របស់វេជ្ជបណ្ឌិតStephen Dahmer អ្នកទទួលខុសត្រូវក្រុមហ៊ុនឱសថVireo Health៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ