ហ្ស៊ីកា ៖ អង្គការសុខភាពពិភពលោកប្រឆាំងនឹងការលើកពេល ប្រកួតកីឡាអូឡាំពិកពិភពលោក
ការលុប ឬលើកទីកន្លែងប្រកួតកីឡាអូឡាំពិក ឆ្នាំ២០១៦ ដែលគ្រោងធ្វើនៅទីក្រុងរីយ៉ូ ប្រទេសប្រេស៊ីល មិនអាចប្តូរផ្លាស់ស្ថានការណ៍រាតត្បាតនៃជំងឺហ្ស៊ីកាបានទេ។ នេះជាប្រតិកម្មរបស់អង្គការសុខភាពពិភពលោក ទៅនឹងសំណើរបស់ក្រុមអ្នកជំនាញជាង១៥០នាក់។ ក្រុមអ្នកឯកទេស យល់ថាការគំរាមកំហែងហ្ស៊ីកា មានហានិភ័យខ្ពស់សម្រាប់សុខភាពសាធារណៈ ដែលមិនគួរប្រថុយគ្រោះថ្នាក់ ទៅរៀបចំការប្រកួតកីឡាអូឡាំពិកពិភពលោក តាមគម្រោងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នៅក្នុងលិខិតចំហ ផ្ញើទៅកាន់អង្គការសុខភាពពិភពលោក ក្រុមអ្នកឯកទេសផ្នែកសុខភាពជាង ១៥០នាក់ មកពីជាង១០ប្រទេស បានអះអាងថា “ការលើកពេល លើកកន្លែងប្រកួត មិនប៉ះពាល់ដល់វិជ្ជាជីវៈកីឡា។ ដូច្នេះគេមិនគួរប្រថុយនឹងគ្រោះថ្នាក់ នាំទេសចរកន្លះលាននាក់ឱ្យប្រឈមនឹងគ្រោះឆ្លងមេរោគ រួចនាំជំងឺពេលត្រលប់ទៅផ្ទះវិញសោះ”។
ក្រុមអ្នកជំនាញនេះ បានសម្តែងការព្រួយបារម្ភខ្លាំង ព្រោះយល់ថាមេរោគហ្ស៊ីកាអាចធ្វើឱ្យប៉ះពាល់ដល់សុខភាពសាធារណៈ ក្នុងកំរិតធ្ងន់ធ្ងរដែលមិនធ្លាប់សង្កេតឃើញមានពីមុនមកទេ។ នៅក្នុងសំបុត្រ ក្រុមអ្នកឯកទេសចង់ឱ្យអង្គការសុខភាពពិភពលោក បង្កើតក្រុមការងារឯករាជ្យមួយសម្រាប់ធ្វើជាប្រឹក្សាឱ្យអង្គការសហប្រជាជាតិ និងអង្គការអូឡាំពិកពិភពលោក។
ប៉ុន្តែ ដោយគ្មានបង្អង់ អង្គការសុខភាពពិភពលោក នៅថ្ងៃនេះ បានផ្តល់ចម្លើយអវិជ្ជមានតបវិញ។ សម្រាប់អង្គការ ក្រោយការវាយតម្លៃស្ថានការណ៍ នៅក្នុងប្រទេសចំនួន៦០ នៅលើពិភពលោក ក្នុងនោះ ៣៩នៅទ្វីបអាមេរិករួចមក គេគ្មានរកឃើញហេតុផលអ្វីគ្រប់គ្រាន់ សម្រាប់លើកពេល និងលើកទីកន្លែង ប្រកួតកីឡាអូឡាំពិកពិភពលោក ដើម្បីការពារសុខភាពសាធារណៈទេ។
ការប្រកួតកីឡាអូឡាំពិកពិភពលោក ត្រូវប្រព្រឹត្តទៅចាប់ពីថ្ងៃទី ៥-២១ខែសីហា ២០១៦ នៅទីក្រុងរីយ៉ូ ដោយមានអត្តពលករ១០៥០០នាក់ ចូលរួមប្រកួតប្រជែងគ្នា និងភ្ញៀវទេសចរ មិនតិចជាង៥០ម៉ឺននាក់ឡើយ។ ប៉ុន្តែប្រេស៊ីល និងបណ្តាប្រទេសក្នុងតំបន់មួយចំនួនធំ បាននិងកំពុងរងការគំរាមកំហែងខ្លាំងពីសំណាក់ជំងឺហ្ស៊ីកា តាំងពីឆ្នាំ២០១៥។ ចម្លងដោយមូសខាំ ហ្ស៊ីកាអាចប៉ះពាល់ដល់ទារកក្នុងផ្ទៃ ជាពិសេសក្នុងត្រីមាសទីមួយ ក្នុងអត្រា ពី១ទៅ១៣% ដោយធ្វើឱ្យទារកលូតលាស់មិនត្រឹមត្រូវ កើតមកមានជំងឺក្បាលតូចខុសប្រក្រតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ