ការបាញ់រះនៅFloride អាមេរិកបើកអង្កេតភេរវកម្ម
ចំនួនមនុស្សស្លាប់បានឡើងដល់៥០នាក់ និងរបួស៥៣នាក់ នៅក្នុងហេតុការណ៍បាញ់រះ ក្នុងរង្គសាលរាត្រីមួយ សម្រាប់អ្នកស្រលាញ់ភេទដូចគ្នា នៅរដ្ឋFloride សហរដ្ឋអាមេរិក កាលពីយប់ថ្ងៃសៅរ៍ឆ្លងចូលព្រឹកថ្ងៃអាទិត្យ។ គេបានស្គាល់អំពីអត្តសញ្ញាណខ្មាន់កាំភ្លើងខ្លះហើយទេ តែពុំទាន់ដឹងអំពីមូលហេតុដែលនាំឱ្យមានការបាញ់រះ ចាប់ជាចំណាប់ខ្មាំងទេ។ ប៉ុន្តែភ្លាមមួយរំពេច ប៉ូលិសអាមេរិកបានសម្រេចបើកអង្កេតភេរវកម្ម និងចាត់ទុកជាការបាញ់រះថាគ្រោះអាក្រក់បំផុតបង្កឡើងដោយពួកអ៊ីស្លាមជ្រុលនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ហេតុការណ៍បាញ់រះ អមដោយការចាប់ជាចំណាប់ខ្មាំង បានកើតឡើងអស់ជាច្រើនម៉ោង និងបានបិទបញ្ចប់នៅម៉ោង៥ព្រឹក ថ្ងៃអាទិត្យ បន្ទាប់ពីកងកម្លាំងដៃឆើតអាមេរិកបានសម្រុកចូលទៅក្នុងរង្គសាលសម្លាប់ខ្មាន់កាំភ្លើង។ បើតាមប៉ូលិស មានការបំផ្ទុះគ្រាប់ជាច្រើនគ្រាប់ផង តែមិនបានពន្យល់អំពីមូលហេតុនៃការធ្វើប្រតិបត្តិការនេះទេ។ មនុស្សប្រមាណជាង៣០នាក់ ត្រូវបានសង្គ្រោះ តែចំនួនជនរងគ្រោះបានកើនឡើងឥតឈប់ ដំបូងភ្លាម មានការជូនដំណឹងថាស្លាប់តែជាង២០នាក់ និងរបួសជាង៤០នាក់របួសក្នុងនោះមានម្នាក់ជាប៉ូលិស ប៉ុណ្ណោះ។
ក្រោយពីមានការបាញ់តទល់គ្នាយ៉ាងយូរជាមួយកម្លាំងប៉ូលិសមក ខ្មាន់កាំភ្លើងបានស្លាប់នៅនឹងកន្លែង និងបើតាមប្រភពទូរទស្សន៍ NBC និងCBS ជនសង្ស័យរូបនេះមានឈ្មោះថា អូម៉ា ម៉ាទីន Omar Mateen កើតនៅឆ្នាំ១៩៨៦ ជាជនជាតិអាមេរិក ដើមកំណើតអាហ្វហ្កានីស្ថាន។ ប៉ុន្តែប៉ូលិសដែលបានផ្តល់ព័ត៌មានតិចតួចបំផុតទាក់ទងនឹងអត្តសញ្ញាណខ្មាន់កាំភ្លើង ព្រមទាំងមូលហេតុនៃទង្វើបាញ់រះ មិនបានច្រានចោលសម្មតិកម្មភេរវកម្មអ៊ីស្លាមជ្រុលនិយមទេ។
ប៉ូលិសសហព័ន្ធអាមេរិក FBI យល់ថាខ្មាន់កាំភ្លើង អូម៉ា ដែលមានប្រវត្តិស្អាតស្អំ អាចមានទំនាក់ទំនងជាមួយពួកអ៊ីស្លាមជ្រុលនិយម ព្រមទាំងលុងក្នុងមនោគមន៍វិជ្ជាអ៊ីស្លាម ទើបសម្រេចបើកអង្កេតភេរវកម្មភ្លាម។ ក្នុងពេលជាមួយគ្នានេះដែរ នៅលើទំព័រប្រព័ន្ធសង្គមTwitterដែលមានពាក់ព័ន្ធនឹងអង្គការរដ្ឋអ៊ីស្លាម គេឃើញមានបង្ហោះរូបថតអូម៉ា ម៉ាទីន ជាជនដៃដល់ធ្វើភេរវកម្មប្រឆាំងរង្គសាលនៅOrlando។
ប្រធានាធិបតីអាមេរិក លោកបារ៉ាក់ អូបាម៉ា បានទទួលដំណឹងនេះភ្លាម និងបានស្នើសុំឱ្យរដ្ឋាភិបាលផ្តល់ជំនួយដែលចាំបាច់។ បេក្ខជន បេក្ខនារីប្រធានាធិបតីអាមេរិក ដូណាល់ត្រាំ និងហ៊ីឡារី គ្លីនតុន បានបញ្ចេញប្រតិកម្ម បរិហារសកម្មភាពបាញ់រះដ៏ស្មោគគ្រោកនេះដោយគ្មានបង្អង់។ ចំណែក ប្រធានាធិបតីបារាំង លោកហ្វ្រង់ស័រ ហូឡង់ ក៏បានចេញសេចក្តីថ្លែងការណ៍ថ្កោលទោសភ្លាមដែរការបាញ់សម្លាប់មនុស្សដ៏ឃោរឃៅនេះ។
ការបាញ់រះបានកើតឡើង តែ៤៨ម៉ោងក្រោយការបាញ់សម្លាប់អ្នកចម្រៀងម្នាក់ នៅក្នុងរដ្ឋFloride នេះដែរ តែប៉ូលិសអះអាងថាជាសំណុំរឿងពីរដាច់ពីគ្នា។ សូមបញ្ជាក់ថា គិតចាប់ពីឆ្នាំ២០១៦មក អំពើហិង្សាពាក់ព័ន្ធនឹងការប្រើអាវុធបានសម្លាប់ជីវិតមនុស្សអស់៥៨០០នាក់ ក្នុងហេតុការណ៍ជាង២៣០០០ករណី នៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ