បោះឆ្នោតប្រធានាធិបតីអាមេរិក៖លោកសេនដឺបានចេញមុខគាំទ្រលោកស្រីគ្លីនតុនជាផ្លូវការ
នៅសហរដ្ឋអាមេរិក អ្វីៗលែងស្រពិចស្រពិលទៀតហើយរវាងលោកប៊ែរនី សេនដឺ និងលោកស្រីហ៊ីលឡារី គ្លីនតុនដែលជាគូប្រជែងនៅក្នុងគណបក្សប្រជាធិបតេយ្យសម្រាប់ឈរឈ្មោះបោះឆ្នោតប្រធានាធិបតីនាខែវិច្ឆិកាខាងមុខ។ ទីបំផុត លោកសេនដឺបានយល់ព្រមបោះបង់ការប្រជែង និងចេញមុខគាំទ្រលោកស្រីគ្លីនតុនជាផ្លូវការ។ ការសម្រេចរបស់លោកសេនដឺពេលនេះបានធ្វើឡើង មុនសមាជរបស់គណបក្សប្រជាធិបតេយ្យដែលគ្រោងបើកធ្វើនៅថ្ងៃទី២៥ កក្កដាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៥៦
ចាប់ពីពេលនេះតទៅ លោកស្រីហ៊ីលឡារី គ្លីនតុនអាចជិះសេះលែងដៃបានហើយ ព្រោះគូប្រជែងក្នុងបក្សលោកប៊ែរនី សេនដឺបានសុខចិត្តបោះបង់ការប្រកួត ព្រមទាំងចេញមុខគាំទ្រលោកស្រីគ្លីនតុនជាផ្លូវការទៀតផង។ ដូច្នេះនៅពេលនេះ លោកស្រីគ្លីនតុនអាចប្រមូលផ្តុំកម្លាំងដើម្បីប្រឈមមុខនឹងគូប្រជែងតែម្នាក់គត់មកពីគណបក្សសាធារណរដ្ឋ គឺលោកដូណាល់ ត្រាំ។ ក្រៅពីប្រកាសគាំទ្រលោកស្រីគ្លីនតុនជាផ្លូវការ លោកសេនដឺមិនញញើតនឹងនិយាយពេញមាត់ និងជាសាធារណៈថា លោកស្រីគ្លីនតុនជាអ្នកឈ្នះនៅក្នុងការបោះឆ្នោតជ្រើសរើសបេក្ខជនប្រធានាធិបតីសម្រាប់គណបក្សប្រជាធិបតេយ្យ។
សូមជម្រាបជូនថា អស់ជាច្រើនសប្តាហ៍មកហើយដែលក្រុមសកម្មជនរបស់គណបក្សប្រជាធិបតេយ្យបានរង់ចាំការប្រកាសរបស់លោកសេនដឺរបៀបនេះដោយគេយល់ថា វាល្មមដល់ពេលដែលគណបក្សប្រជាធិបតេយ្យត្រូវរួបរួមគ្នាដើម្បីប្រឆាំងទប់នឹងគណបក្សសាធារណរដ្ឋនាការបោះឆ្នោតប្រធានាធិបតីនៅខែវិច្ឆិកាខាងមុខ។ សម្រាប់លោកស្រីគ្លីនតុនឯណោះវិញ ការគាំទ្រពីលោកសេនដឺជារឿងសំខាន់ និងចាំបាច់មិនអាចខ្វះបាន ពិសេសពីក្រុមសកម្មជនគាំទ្រលោកសេនដឺដែលនៅបន្តរារែក អល់អែកមិនទុកចិត្តលោកស្រី។
ក្រៅពីនេះ ការគាំទ្ររបស់លោកសេនដឺក៏ជាបច្ច័យមួយធំធេងណាស់សម្រាប់លោកស្រីគ្លីនតុនក្នុងការប្រឈមទប់នឹងលោកដូណាល់ ត្រាំ បេក្ខជនប្រធានាធិបតីមកពីគណបក្សសាធារណរដ្ឋ។ លោកដូណាល់ ត្រាំដែលបានបញ្ចេញប្រតិកម្មភ្លាមៗបរិហារនឹងការប្រកាសរបស់លោកសេនដឺគាំទ្រលោកស្រីគ្លីនតុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ