ណូបែលសន្តិភាព ៖ មេដឹកនាំហ្វាកគួរតែមានចំណែកក្នុងជ័យលាភីសន្តិភាព២០១៦ដែរឬ ?!
នៅថ្ងៃសុក្រទី ៧ តុលា នេះ គណៈកម្មការណូបែលបានប្រកាសផ្តល់ជ័យលាភីរង្វាន់ណូបែលសន្តិភាព ដល់លោកប្រធានាធិបតីកូឡុំប៊ី លោក ហ័នម៉ានុយអែល សិនតូស ដែលបានបូជាកម្លាំងចិត្តកម្លាំងកាយ ប្រថុយប្រថានគ្រប់យ៉ាងរហូតសម្រេចជោគជ័យចុះកិច្ចព្រមព្រៀងសន្តិភាពជាមួយពួកឧទ្ទាមហ្វាក។ ពិភពលោកទាំងមូលហាក់ស្រុះស្រួលគ្នាស្វាគមន៍នឹងជ័យលាភីនេះ ប៉ុន្តែកូនគំនិតតូចមួយបានចោទឡើងថា ជ័យលាភីនេះគួរតែបែងចែកខ្លះទៅឱ្យមេឧទ្ទាមហ្វាក។ តើជាគំនិតសមរម្យដែរទេ ?
ចុះផ្សាយនៅថ្ងៃ៖
ស្តាប់ - ០២:២២
បានទទួលជ័យលាភីណូបែលសន្តិភាព ក្នុងបរិបទនយោបាយដ៏ស្មុគស្មាញ -ប្រជាពលរដ្ឋ ទើបច្រានចោលកិច្ចព្រមព្រៀងសន្តិភាពដែលរដ្ឋាភិបាលបានចុះហត្ថលេខាជាមួយពួកឧទ្ទាមហ្វាកបែបនេះ ហាក់ដូចជាបានផ្តល់ដង្ហើមនិងក្តីសង្ឃឹមថ្មីដល់លោកប្រធានាធិបតី សិនតូស ឱ្យកាន់តែមានឆន្ទៈបន្តស្វែងរកសន្តិភាព។ សូម្បីតែអតីតប្រធានាធិបតីកូឡុំប៊ី លោក អុយរីបេ ដែលបានដឹកនាំយុទ្ធនាការប្រឆាំងនឹងកិច្ចព្រមព្រៀងសន្តិភាពនាឱកាសប្រជាមតិ ក៏បានអបអរស្វាគមន៍លោក សិនតូសដែរ។ អតីតចំណាប់ខ្មាំងរបស់ហ្វាកដ៏ល្បីល្បាញនិង ជាអតីតបេក្ខជនប្រធានាធិបតីកូឡុំប៊ី លោកស្រី អ៊ីហ្គ្រីត បេតង់គួ មានមោទនភាពនិងអំណរយ៉ាងខ្លាំង នៅពេលឃើញលោកសិនតូស បានទទួលជ័យលាភី តែលោកស្រីយល់ថា ពួកឧទ្ទាមហ្វាកក៏គួរតែមានចំណែកខ្លះពីជ័យលាភីណូបែលសន្តិភាពនេះដែរ។
ចំណាប់អារម្មណ៍នេះ គ្មានអ្វីចម្លែកទេ ! កន្លងមកក្នុងប្រវត្តិណូបែលសន្តិភាព គេតែងឃើញគណៈកម្មការផ្តល់ជ័យលាភីទៅឱ្យគ្រប់ភាគីពាក់ព័ន្ធនឹងការស្វែងរកសន្តិភាពរួមគ្នា។
ជាក់ស្តែងនៅឆ្នាំ ១៩៧៣ ណូបែលសន្តិភាពត្រូវបានប្រគល់ឱ្យអ្នកទទួលខុសត្រូវចរចាសន្តិភាពអាមេរិកវៀតណាម លោក ហង់រី ឃីសស៊ីនចឺ Henry Kissinger និងលោក ឡែឌុចថូ Le Duc Tho។ ជ័យលាភីឆ្នាំ ១៩៧៨ គឺលោក អានូអា អែលសាដាត ជាតិអេហ្ស៊ីប និងលោក មេណាហេម បេហ្កាំង ជាតិអ៊ីស្រាអែល ចំពោះកិច្ចប្រឹងប្រែងចរចាសន្តិភាពអេហ្ស៊ីបអ៊ីស្រាអែល។ ក្នុងជម្លោះអ៊ីស្រាអែលនិងប៉ាឡេស្ទីនវិញ ក៏ដូចគ្នា នៅឆ្នាំ១៩៩៤ មេដឹកនាំអ៊ីស្រាអែលលោក Shimon Peres និងលោក Yitshak Rabin និងប៉ាឡេស្ទីនលោក Yasser Arafat បានទទួលជ័យលាភីរួមគ្នា ក្នុងកិច្ចខិតខំប្រឹងប្រែងឱ្យមានការចរចាសន្តិភាពអ៊ីស្រាអែលនិងប៉ាឡេស្ទីន។
ចុះហេតុអ្វីពួកហ្វាកគ្មានចំណែកនៅក្នុងជ័យលាភីឆ្នាំនេះ ? មានតែគណៈកម្មការណូបែលទេទើបអាចពន្យល់បាន តែពួកគាត់គ្មានទម្លាប់ឡើយ។ មេឧទ្ទាមហ្វាក លោក ទីមូឆេនកូ ដែលប្រកាសអបអរប្រធានាធិបតីសិនតូស បានឆ្លៀតរំលឹក នៅថ្ងៃនេះ អំពីតួនាទីដ៏សំខាន់របស់ប្រទេសអន្តរការីនៃកិច្ចចរចាបួនឆ្នាំ គុយបា ន័រវែស វេណេស៊ុយអេឡា និងឈីលី ក្នុងការនាំសន្តិភាពឱ្យកូឡុំប៊ីថ្ងៃនេះ និង បានលួងចិត្តខ្លួនឯងអ្វីដែលគេចង់បានគឺសន្តិភាពនិងយុត្តិធម៌សង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ