ម៉ូស្គូសាទរការតែងតាំងលោកTillerson ជាប្រមុខការទូតថ្មីនៃស.រ.អា.
លោកដូណាល់ ត្រាំដែលនៅខែក្រោយនឹងឡើងជាប្រធានាធិតីថ្មីនៃស.រ.អា.ថ្ងៃ១៣ធ្នូបានតែងតាំងប្រធានអគ្គនាយកក្រុមហ៊ុនប្រេងអាមេរិកាំង Exxon Mobil គឺលោក Rex Tillerson ក្នុងតំណែងជាប្រមុខការទូតនៃរដ្ឋបាលគាត់។ ប៉ុន្តែ ដើម្បីកាន់តំណែងនេះបេក្ខភាពលោក Tillerson ដែលជាមិត្តរបស់លោកប្រធានាធិបតីរុស្ស៊ីពូទីន ត្រូវទទួលការអនុម័តសិនដោយព្រឹទ្ធសភាអាមេរិកាំង។ ទោះយ៉ាងណាក្តី ក៏ម៉ូស្គូបានថ្លែងសាទរទៅហើយចំពោះការតែងតាំងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ប្រតិកម្មវិជ្ជមានពីខាងម៉ូស្គូចំពោះការតែងតាំងរូបលោក Tillerson អាយុ៦៤ឆ្នាំដែលរកស៊ីខាងវិស័យប្រេងនៅរុស្ស៊ីប្រមាណ២០ឆ្នាំហើយរហូតបានទទួលគ្រឿងឥស្សរិយយស លំដាប់មិត្តភាពក្នុងឆ្នាំ២០១២ ពីដៃលោកប្រធានាធិបតីរុស្ស៊ីពូទីនទៅផងគឺសំដែងទាំងដោយវិមានក្រេមឡាំងទាំងដោយរដ្ឋមន្ត្រីការបរទេសរុស្ស៊ី។
“វិមានក្រេមឡាំងរំពឹងថាប្រមុខការទូតថ្មីនៃស.រ.អា. មុខជានឹងបង្ហាញនូវភាពជំនាញអាជីពនិងគោលគំនិតស្ថាបនាពុំខាន” សេចក្តីនេះ ថ្លែងដោយអ្នកនាំពាក្យផ្លូវការនៃប្រធានាធិបតីរុស្ស៊ីលោក ឌ្មីទ្រី ពេស្កូវ។ តាមសំដីគាត់ ចំណុចសំខាន់តែមួយគត់សម្រាប់ប្រមុខការទូតអាមេរិកាំងគឺភាពត្រៀមខ្លួនបង្ហាញឲ្យឃើញនូវឥរិយាបថស្ថាបនានិងភាពជំនាញអាជីព ហើយរុស្ស៊ីសង្ឃឹមថាគឺយ៉ាងនេះដែលនឹងវិវឌ្ឍទៅដោយមិនអាស្រ័យចំតែលើរូបលោក Tillerson ប៉ុណ្ណោះឡើយ។
លោកពេស្កូវ សង្កត់ធ្ងន់ថា វិមានក្រេមឡាំងសាទរពិសេសចំពោះរូបលោក Tillerson ក្នុងឋានៈជា “ធុរជនអាជីពមែនពិត” ដែលមានទំនាក់ទំនងការងារដ៏ល្អជាមួយលោកប្រមុខរដ្ឋ រុស្ស៊ីពូទីននិងជាមួយអ្នកមុខអ្នកការរុស្ស៊ីឯទៀត។
ថ្ងៃ១៣ធ្នូដែលោករដ្ឋមន្ត្រីការបរទេសរុស្ស៊ីស៊ែរហ្គៃ ឡាវ៉្រូវ ពេលថ្លែងក្នុងសន្និសីទកាសែត នៅក្រុងបែលក្រាដគូសបញ្ជាក់ថាម៉ូស្គូត្រៀមធ្វើការជាមួយប្រធានអគ្គនាយកមហាក្រុមហ៊ុនប្រេងអាមេរិកាំងលោក Rex Tillerson ដែលត្រូវបានតែងតាំងជាប្រមុខការទូតថ្មីនៃស.រ.អា.។ អ្នកការទូតដើមខ្សែរបស់រុស្ស៊ីបានហៅលោក Tillerson ជា មនុស្សដែលលើកផលប្រយោជន៍ខ្ពស់ជាងអ្វីៗទាំងអស់ហេតុដែលអនុញ្ញាតឲ្យសង្ឃឹមទៅលើការអភិវឌ្ឍន៍យ៉ាងជោគជ័យនៃសហប្រតិបត្តិការរុស្ស៊ី-អាមេរិក។ តាមសំដីលោក ឡាវ៉្រូវ ៖
យើងសូមទទួលយកការតែងតាំងនេះរបស់ប្រធានាធិបតីឈ្នះឆ្នោតហើយត្រៀមធ្វើការងារជាមួយដៃគូណាក៏ដោយដែលប្រាថ្នាពង្រីកទំនាក់ទំនងស្មើភាពជាមួយសហព័ន្ធរុស្ស៊ី។ ខ្ញុំយល់ថាទាំងលោកប្រធានាធិបតី ត្រាំទាំងអនាគតប្រមុខការទូតអាមេរិកសុទ្ធតែជាអ្នកដែលគិតពីផលប្រយោជន៍ម៉្លោះហើយបានជាផលប្រយោជន៍និយមនេះអាចបម្រើជាគ្រឹះមូលដ្ឋានដ៏ល្អសម្រាប់រៀបរយឲ្យបានស្រួលបួលសហប្រតិបត្តិការរុស្ស៊ី-អាមេរិកដែលនាំជាគុណប្រយោជន៍ទៅវិញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ