អាមេរិក៖លោកដូណាល់ ត្រាំសន្យាកម្ទេចអង្គការរដ្ឋអ៊ីស្លាមឲ្យដល់ឫសគល់
នៅសហរដ្ឋអាមេរិក លោកដូណាល់ ត្រាំបានទៅទស្សនកិច្ចនៅទីស្នាក់ការកណ្តាលនៃកម្លាំងពិសេសមានមូលដ្ឋានក្នុងរដ្ឋ Florida។ នៅក្នុងបទអន្តរាគមន៍រយៈពេលខ្លី លោកដូណាល់ ត្រាំបានរម្លឹកជាថ្មីពីគោលដៅកម្ទេចក្រុមអង្គការអ៊ីស្លាមនិយមជ្រុល។ ការប្តេជ្ញាចិត្តរបស់លោកត្រាំពេលនេះបានធ្វើឡើង ក្នុងពេលដែលលោកកំពុងរង់ចាំរបាយការណ៍របស់ក្រសួងការពារជាតិស្តីពីយុទ្ធនាការប្រឆាំងនឹងអង្គការភេរវនិយម។ ទន្ទឹមគ្នានេះ លោកត្រាំក៏បានឆ្លៀតព្រមានដល់សមាជិកអង្គការអូតង់ដែលយឺតយ៉ាវក្នុងការបង់វិភាគទានរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
« សហរដ្ឋអាមេរិកនឹងបន្តស្ថិតជាប់ជានិច្ចជាមួយអ្នកដែលកំពុងតស៊ូប្រយុទ្ធដើម្បីសេរីភាព។ យើងសូមគាំទ្រ និងបន្តគាំទ្រអ្នកជានិច្ច ក៏ប៉ុន្តែទន្ទឹមគ្នានេះ សម្ព័ន្ធមិត្តរបស់យើងក៏ត្រូវចូលរួមបង់វិភាគទានពីចំណែករបស់ខ្លួនដែរ ព្រោះថា វាពិតជាអយុត្តិធម៌ខ្លាំងណាស់ចំពោះយើង។
ពិតណាស់ យើងគាំទ្រអង្គការអូតង់ តែអ្វីដែលជាសំណើរបស់យើងនោះ គឺសុំឲ្យសមាជិកទាំងអស់របស់អូតង់បង់លុយក្នុងចំណែករបស់ខ្លួនដែលមកទល់ពេលនេះ មានភាគច្រើនមិនបានធ្វើទេ។ នៅថ្ងៃនេះ ខ្ញុំចង់ផ្ញើសារច្បាស់ៗទៅកាន់ពួកឃាតករ និងពួកបំផ្លិចបំផ្លាញថា អាមេរិកនឹងកម្ទេចពួកអ្នក ដូចដែលយើងយកឈ្នះលើភេរវនិយមចេញមកពីអ៊ីស្លាមនិយមជ្រុល។
យើងនឹងមិនអនុញ្ញាតឲ្យពួកនេះអាចចូលមកបោះទីតាំងនៅលើទឹកដីរបស់យើងបានទេ។ អស់ លោកបានតាមដានរួចហើយនូវអ្វីដែលបានកើតមានឡើងនារយៈពេលប៉ុន្មានថ្ងៃកន្លងទៅនេះ។ យើងត្រូវការនយោបាយមួយរឹងមាំ ខ្លាំងក្លាដើម្បីឲ្យមនុស្សស្រឡាញ់ចូលចិត្តយើង និងដើម្បីឲ្យពួកគេត្រៀមខ្លួនស្រឡាញ់ចូលចិត្តប្រទេសរបស់យើងផងដែរ។
ក៏ប៉ុន្តែ មិនមែនប្រភេទមនុស្សដែលចង់បំផ្លាញយើង និងបំផ្លាញប្រទេសរបស់យើងទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ