ការរិះគន់លោកត្រាំ ហៀដល់ពិភពភាពយន្ត និងសិល្បៈ
មហោស្រពភាពយន្តប៊ែរឡាំងលើកទី៦៧ ដែលជាមហោស្រពភាពយន្តទ្រង់ទ្រាយធំដំបូងគេប្រចាំឆ្នាំ២០១៧ បានបើកកម្មវិធីរបស់ខ្លួន តាំងពីថ្ងៃព្រហស្បតិ៍មក តែក្នុងទម្រង់ប្លែកខុសពីសព្វមួយដង ដោយនៅលើកនេះពិភពភាពយន្តបានភ្ជាប់ខ្លួនទៅនឹងនយោបាយ ! ឆាកមហោស្រព បានក្លាយជាវេទិការិះគន់ប្រធានាធិបតីអាមេរិកថ្មី លោក ដូណាល់ ត្រាំ។ កម្មវិធីប្រគល់រង្វាន់តន្រ្តី Grammy Award ដ៏ល្បីល្បាញរបស់អាមេរិក ក៏បានច្រៀងបទនយោបាយបង្អាប់លោកត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
លោក ដូណាល់ ត្រាំ ប្រធានាធិបតីអាមេរិកថ្មី អប្រជាប្រិយបំផុតក្នុងពិភពភាពយន្តនិងសិល្បៈ ! នៅល្ងាចថ្ងៃអាទិត្យទី ១២កុម្ភៈ ក្នុងកម្មវិធីប្រគល់រង្វាន់សិល្បៈ Grammy Awards សិល្បករជាច្រើនបាននាំគ្នាបរិហារនយោបាយអន្តោប្រវេសន៍របស់លោក ដូណាល់ ត្រាំ ដោយចាត់ទុកប្រធានាធិបតីអាមេរិករូបនេះ ថា លុយលឿងទុំ ដោយសំដៅទៅលើពណ៌សក់ក្បាលលោក ដែលឆេះរោលភ្លើងសង្គ្រាមនៅវៀតណាម។ សិល្បករខ្លះ រុំក្បាលធ្វើជាអ្នកអ៊ីស្លាម ក្រុមភ្លេងរ៉ាប់ដ៏ល្បីល្បាញ A Tribe Called Quest បានតែងបទថ្មី “Résistez Résistez Résistez” ស៊ូ ស៊ូ ស៊ូ ! ជាកិច្ចបិទបញ្ចប់កម្មវិធី។
នៅក្រុងប៊ែរឡាំង មហាស្រពភាពយន្ត ក៏មានទម្រង់នយោបាយ ទាំងសាច់រឿងភាពយន្តចូលប្រកួត ទាំងទស្សនៈរបស់ សិល្បករ សម្មិទ្ធិករ ផលិតករភាពយន្ត គណៈមេប្រយោគរបស់មហោស្រព ដែលបានបញ្ចេញការរិះគន់លោកត្រាំ តាមបែបផ្សេងៗគ្នា។
សិល្បការិនី Maggie Gyllenhaal បានប្រកាសមានពលរដ្ឋអាមេរិកច្រើនណាស់ ត្រៀមខ្លួនតស៊ូ ! តស៊ូប្រឆាំងនឹងនយោបាយរបស់ប្រធានាធិបតីអាមេរិក ដូណាល់ ត្រាំ។ ចំនួនឧក្រិដ្ឋកម្មនៅ អាមេរិកកើនឡើងតាំងពីលោក ត្រាំ ក្លាយជាបេក្ខជនប្រធានាធិបតី ! នេះបើតាមការបរិហាររបស់សិល្បករអាមេរិកដែលមកបង្ហាញភាពយន្តរឿង the Dinner ភាពយន្តរន្ធត់លងចិត្ត ដោយស្រមោលលោកត្រាំ។
សហសមិទ្ធិកររឿង The Bomb ដែលជាកុនដកពិសោធន៍គ្រោះនុយក្លេអ៊ែរ បានប្រៀបប្រដូចលោកត្រាំ ទៅនឹងទាហានជើងអាកាសអាមេរិក ដែលត្រូវឆ្លងកាត់តេស្តសមត្ថភាព សុខភាពផ្លូវកាយ ផ្លូវចិត្ត ... បើតាមលទ្ធផល លោកត្រាំមិនជាប់ទេ ប៉ុន្តែគឺមានតែលោកត្រាំម្នាក់គត់ នៅអាមេរិកដែលមានសិទ្ធិបញ្ជាឱ្យប្រើអាវុធនុយក្លេអ៊ែរ។ ជាចុងក្រោយ ពិភពភាពយន្តបានសម្តែងការព្រួយបារម្ភចំពោះជីវិតសិល្បៈ ដោយយល់ថាលោកត្រាំ មិនផ្តល់តម្លៃដល់វិស័យនេះ និងមិនខ្វល់នឹងផ្តល់ហិរញ្ញវត្ថុសម្រាប់វិស័យសិល្បៈនិងវប្បធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ