ពានរង្វាន់Oscar ឆ្នាំនេះត្រូវបានប្រគល់ដល់ខ្សែភាពយន្តអាមេរិកឈ្មោះ”Moonlight ”
ពានរង្វាន់Oscarដ៏ល្បីល្បាញរបស់អាមេរិក ត្រូវបានប្រគល់ឲ្យដល់ខ្សែភាពយន្តមួយឈ្មោះ”Moonlight ”ឬអាចប្រែថា”ពន្លឺព្រះចន្ទ” ដែលគេចាត់ទុកជាខ្សែភាពយន្តដ៏ល្អប្រសើរជាងគេនៅឆ្នាំ២០១៧។ ការប្រគល់រង្វាន់ Oscar ឆ្នាំនេះ ត្រូវបានប្រព្រឹត្តទៅកាលពីរាត្រីម្សិលមិញនៅទីក្រុង Los Angeles ក្នុងបរិបទនៃនយោបាយប្រឆាំងអន្តោប្រវេស្តន៍របស់លោក Donald Trump។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
កាលពីយប់ម្សិលមិញនៅទីក្រុង Los Angele ពានរង្វាន់ Oscar ដ៏ល្បីល្បាញបំផុតរបស់អាមេរិក ត្រូវបានប្រគល់ដល់ខ្សែភាពយន្តអាមេរិកដ៏ល្អប្រសើរជាងគេមួយឈ្មោះ ”Moonlight”ឬ អាចប្រែថា "ពន្លឺព្រះចន្ទ” នៅក្នុងឆ្នាំ២០១៧នេះ។
តារាអាមេរិកស្បែកខ្មៅឈ្មោះលោក Mahershala Ali គឺជាអ្នកកាន់សាសនាអ៊ីស្លាមទីមួយដែលបានទទួលពានរង្វាន់ Oscar នៅក្នុងការសម្តែងជាតួរងដ៏ប្រសើរជាងគេក្នុងខ្សែភាពយន្ត "Moonlight”។
នៅក្នុងខ្សែភាពយន្ត”Moonlight” របស់សមិទ្ធិករ Barry Jenkins តារា Mahershala Ali ដែលមានអាយុ៤៣ឆ្នាំ បានដើរតួជាអ្នកជួញដូរគ្រឿងញានម្នាក់សញ្ជាតិគុយបាឈ្មោះ Juan តែគេជាមនុស្សមានចិត្តមេត្តាធម៌និងចេះអាណិតស្រឡាញ់កុមារមួយរូបដែលត្រូវម្តាយធ្វើបាបដោយហេតុតែគាត់ត្រូវការគ្រឿងញាន។ នៅក្នុងសាច់រឿង Juan ជាអ្នកលក់គ្រឿងញាននៅតាមសង្កាត់របស់ជនជាតិអាមេរិកស្បែកខ្មៅនិងនៅក្រោយបន្តិច មក ទើបបានដឹងថា ម្តាយរបស់កុមារតួចនោះ គឺជាអ្នកញានអាភៀនម្នាក់ដែលគាត់តែងតែលក់អាភៀនអោយ។
កើតនៅរដ្ឋ Oakland បន្ទាប់ពីត្រូវបានគេជ្រើសរើស លោក អាលី បានថ្លែងថាគាត់សង្ឃឹមថាការជ្រើសរើសរូបគាត់នេះគឺពុំមែនដោយសារគាត់មានស្បែកខ្មៅនោះទេ ប៉ន្តែ គឹដោយសារតែការងាររបស់គាត់វិញ។ គួរបញ្ចាក់ថា តារាអាលីនេះ មានមាតាជាអ្នកដឹកនាំក្នុងព្រះវិហារសាសនាប្រូតេស្តង់និងមានឱពុកជាតារាភាពយន្តដែរ។ Mahershala Ali បានដូរយកត្រកូលឈ្មោះ អាលីវិញនៅពេលដែលគាត់បានប្តូរមកកាន់សាសនាអ៊ីស្លាមនៅឆ្នាំ១៩៩៩។
តារានេះ ត្រូវបានគេស្គាល់ជាលើកតំបូងនៅក្នុងភាពយន្តមួយដែលគាត់ដើរតួជាប្រធានការិយាល័យនៃសេតវិមានប្រធានាធិបតីអាមេរិកក្នុងខ្សែភាពយន្តឈុតមួយរបស់សមិទ្ធិករ Netflix « House of Cards »និងបានទទួលរង្វាន់សហជីពនៃតារាភាពយន្ត Hollywoodទៀតផង។
រង្វាន់Oscarដែលប្រគល់ជូនតារាអាមេរិកស្បែកខ្មៅនេះ ត្រូវបានប្រព្រឹត្តទៅនៅក្នុងបរិបទនយោបាយប្រឆាំងអន្តោប្រវេស្តន៍របស់លោក Donald Trump។ លោកប្រធានាធិបតីថ្មីអាមេរិកដែលបានចេញក្រឹត្យកន្លងមកស្តីពីការប្រឆាំងជនអន្តោប្រវេស្ត៍មកដែលមកពី៧ប្រទេសនិងភាគច្រើនកាន់សាសនាអ៊ីស្លាម មិនឲ្យចូលក្នុងទឹកដីអាមេរិកទេ តែក្រឹត្យនោះ ត្រូវបានតុលាការសម្រេចលើកព្យួរ។ ក្រឹត្យរបស់លោកTrump ដែលតារាភាពយន្ត Ali ក្នុងរឿង "Moonlight”បាននិយាយថា ជាក្រឹត្យមួយដែលរូបគាត់ផ្ទាល់ជាអ្នកត្រូវទទួលរងដោយការរើសអ៊ើងពណ៌សម្បុរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ