ក្រោយកិច្ចព្រមព្រៀងសន្តិភាព កូឡុំប៊ីឈានទៅបង្កើតតុលាការពិសេសកាត់ទោសឧក្រិដ្ឋជនសង្គ្រាម
ព្រឹទ្ធសភាកូឡុំប៊ី បានអនុម័តធ្វើកំណែទម្រង់រដ្ឋធម្មនុញ្ញដើម្បីបង្កើតប្រព័ន្ធតុលាការពិសេសកាត់ទោសឧក្រិដ្ឋជនសង្គ្រាម ក្នុងអំឡុងពេលមានជម្លោះប្រដាប់អាវុធរវាងកងកម្លាំងឧទ្ទាមហ្វាក និងរដ្ឋាភិបាល រយៈពេល ជាង៥០ឆ្នាំ។ ការបង្កើតតុលាការពិសេសធ្វើឡើង ស្របតាមកិច្ចព្រមព្រៀងជាប្រវត្តិសាស្ត្រជាមួយពួកឧទ្ទាមប្រដាប់អាវុធហ្វាក FARC ចុះហត្ថលេខាកាលពីខែវិច្ឆកា ២០១៦។
ចុះផ្សាយនៅថ្ងៃ៖
តាមរយៈកំណែទម្រង់រដ្ឋធម្មនុញ្ញ ប្រព័ន្ធតុលាការថ្មីស្រឡាងមួយ ដែលឈរលើទស្សនៈ ស្វែងរកការពិត ផ្សះផ្សាររបួស និងមិនច្រំដែល នឹងបង្កើតឡើង ដោយមានបន្សំគណៈកម្មការបី ៖ គណៈកម្មការដើម្បីការពិត គណៈកម្មការស្វែងរកជនបាត់ខ្លួនក្នុងជម្លោះ និងប្រព័ន្ធតុលាការពិតសេសសម្រាប់សន្តិភាព។
តុលាការពិសេសដើម្បីសន្តិភាព ជាប្រព័ន្ធតុលាការបណ្តោះអាសន្ន និងស្វ័យភាព មានភារៈវែករកសកម្មភាពប្រព្រឹត្តឡើងនៅមុនថ្ងៃទី ១ ធ្នូ ២០១៦ ក្នុងជម្លោះប្រដាប់អាវុធ រវាងកងកម្លាំងរដ្ឋាភិបាល និងឧទ្ទាមហ្វាក។
ការបង្កើតតុលាការបណ្តោះអាសន្នកាត់ទោសឧក្រិដ្ឋជនសង្គ្រាម ធ្លាប់ជាចំណុចខ្ទាស់ ដែលបក្សប្រឆាំងនឹងរដ្ឋាភិបាលកូឡុំប៊ីរិះគន់យ៉ាងខ្លាំង រហូតបានជ័យជំនះនៅក្នុងប្រជាមតិប្រឆាំងកិច្ចព្រមព្រៀង។
បើតាមកិច្ចព្រមព្រៀងសន្តិភាព រវាងរដ្ឋាភិបាលរបស់លោក សិនតូស និងពួកឧទ្ទាមប្រដាប់អាវុធបដិវត្តកូឡុំប៊ី ហ្វាក ក្រុមឧទ្ទាមធំនិងសំខាន់ជាងគេនៅក្នុងប្រទេស ដែលបានចុះហត្ថលេខានៅខែវិច្ឆិកា២០១៦ បន្ទាប់ពីការចរចាអស់រយៈពេល៤ឆ្នាំ គ្រោងផងដែរឱ្យមានការលើកលែងទោស។ ឧក្រិដ្ឋជនប្រឆាំងនឹងមនុស្សជាតិ ដែលត្រូវរងការកាត់ទោសពីសំណាក់តុលាការពិសេសដើម្បីសន្តិភាព អាចនឹងត្រូវទទួលទោសត្រឹមជាប់ពន្ធនាគារ ប្រសិនបើបុគ្គលនោះបានសារភាពនិយាយរាល់គ្រប់ការពិតដែលខ្លួនជាប់បន្ទុក។
បន្ទាប់ពីសភា នៅល្ងាចមិញ ព្រឹទ្ធសភាកូឡុំប៊ីបានអនុម័តកំណែទម្រង់រដ្ឋធម្មនុញ្ញនេះក្នុងសំឡេងគាំទ្រ៦០ ទល់នឹងពីរប្រឆាំង។ កូឡុំប៊ីចង់បិទបញ្ចប់ជម្លោះប្រដាប់អាវុធជាងកន្លះសតវត្សរ៍ ជាមួយពួកឧទ្ទាមប្រដាប់អាវុធជាង៣០ក្រុម ក្នុងនោះឧទ្ទាមធំៗមានជាអាទិ៍ពួកហ្វាក និង ពួកយោធារំដោះជាតិ។ ជម្លោះដែលបានសម្លាប់ជីវិតមនុស្សយ៉ាងហោច២៦០០០០នាក់ និងជាង៦ម៉ឺននាក់បាត់ខ្លួន និង៦,៩លាននាក់ធ្វើបំលាស់ទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ