ធនាគារពិភពលោកអំពាវនាវឲ្យមានការបង្កើនកិច្ចប្រឹងប្រែងដើម្បីផ្គត់ផ្គង់ថាមពលជាសកលនៅឆ្នាំ២០៣០
ធនាគារពិភពលោកនៅក្នុងរបាយការណ៍មួយនៅថ្ងៃចន្ទនេះ បានអំពាវនាវដល់បណ្តាអ្នកដឹកនាំទូទាំងពិភពលោកឲ្យបង្កើនកិច្ចប្រឹងប្រែងថែមទៀតដើម្បីឲ្យបានសម្រេចគោលដៅក្នុងការផ្គត់ផ្គង់ថាមពលអគ្គិសនីចាំបាច់ដល់ប្រជាជននៅលើលោក ចាប់ពេលនេះដល់ឆ្នាំ២០៣០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
លោកស្រី Rachel Kyte តំណាងពិសេសរបស់អគ្គលេខាធិការអសបទទួលបន្ទុក"សកម្មភាពដើម្បីថាមពលអគ្គីសនីជាសាកល បានថ្លែងបញ្ជាក់ថា “បើគេចង់ឲ្យមានថាមពលប្រើប្រាស់ស្អាតនិងតម្លៃសមរម្យសម្រាប់ប្រជាជនទូទាំងពិភពលោក អ្នកដឹកនាំនយោបាយទាំងអស់នៅលើលោក ត្រូវតែបង្កើនកិច្ចប្រឹងប្រែងរបស់ខ្លួនឲ្យបានកាន់តែខ្លាំងថែមទៀត។
ម្យ៉ាងទៀតយោងតាមតំណាងពិសេសរបស់អគ្គលេខាធិការ អ.ស.ប. ដដែល “ទិន្នន័យថ្មីៗ” នោះ ជាការព្រមានមួយដល់អ្នកទទួលខុសត្រូវក្នុងពិភពលោកដើម្បីឲ្យពួកគេបង្កើនកិច្ចខិតខំប្រឹងប្រែងនិងបញ្ចេញសកម្មភាពជាបន្ទាន់ប្រកបដោយជំហរប្តេជ្ញាចិត្ត ដើម្បីឈានទៅដល់គោលដៅនៅលើការផ្គត់ផ្គង់ថាមពលអគ្គិសនីចាំបាច់សម្រាប់ប្រជាជននៅលើលោកទាំងមូល។
ចំពោះលោក Ricccardo Puliti ប្រធាននាយកដ្ឋានផ្នែកថាមពលធនាគារពិភពលោកវិញ យល់ឃើញថា “ដើម្បីអាចឈានទៅដល់គោលដៅខាងលើនេះ ពិភពលោក ត្រូវតែបង្កើនការធ្វើវិនិយោគ ប្រកបដោយការប្តេជ្ញាចិត្តទាំងនៅលើផ្នែកនយោបាយនិងទាំងឆន្ទៈនៅលើការបង្កើតបច្ចេកវិទ្យាថ្មីៗនៅក្នុងទ្រង់ទ្រាយធំមួយ។
កាលពីប៉ុន្មានឆ្នាំមុន ចំនួនប្រជាជនលើលោកដែលអាចមានថាមពលអគ្គិសនីប្រើប្រាស់ មានកំណើនយឺតខ្លាំង។ នៅក្នុងកម្រឹតនេះ យោងតាមរបាយការណ៍ធនាគារពិភពលោកដដែល ប្រជាជននៅលើលោកចំនួនតែ ៩២% ប៉ុណ្ណោះ ដែលអាចនឹងមានថាមពលអគ្គីសនីប្រើប្រាស់នៅឆ្នាំ២០៣០។
សូមរំលឹកថា នៅឆ្នាំ ២០១៤ ប្រជាជនជាង១ពាន់លាននាក់នៅលើលោក នៅពុំទាន់មានអគ្គិសនីប្រើប្រាស់នៅឡើយទេ តែបើប្រៀបធៀបនឹងឆ្នាំ ២០១២ វិញ ឃើញថាតួលេខខាងលើនេះមានភាពប្រសើរឡើងបន្តិច-នេះជាការបញ្ជាក់របាយការណ៍នេះដែលផ្សព្វផ្សាយដោយធនាគារពិភពលោកនិងទីភ្នាក់ងារថាមពលបរិមាណូអន្តរជាតិ។
នៅលើចំណុចជាវិជ្ជមានផ្សេងទៀត គឺបណ្តាប្រទេសមួយចំនួនដូចជាអាហ្វហ្កានីស្ថាន កម្ពុជា កេនយ៉ា អ៊ូហ្កង់ដា រ៉ាន់ដា នៅលើវិស័យថាមពលអគ្គិសនីនេះ មានការវិវឌ្ឈន៍ជាវិជ្ជមាន។
នៅលើវិស័យថាមពលមិនចេះរីងស្ងួត ដើម្បីឲ្យបានសម្រេចដល់គោលដៅនៅឆ្នាំ ២០៣០ ការធ្វើវិនិយាគ ត្រូវតែបង្កើនឡើងឲ្យបានដល់ទៅ ២ឬ៣ ដងថែមទៀតនៅទូទាំងពិភពលោក។ ម្យ៉ាងទៀត បើសិនជាការផលិតថាមពលមិនចេះរីងស្ងួតនេះ មានការវិវឌ្ឆន៍លឿនក្តី ក៏ការប្រើប្រាស់ថាមពលដើរដោយដង្ហាល់និងកំដៅថ្ងៃ មានចំនួនតែ៤%ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ