អង្គការសហប្រជាជាតិ ៖ អាមេរិកឈប់ជួយមូលនិធិប្រជាជន ជះផលអាក្រក់ដល់សុខភាពស្ត្រី
អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរ៍ បានបញ្ចេញប្រតិកម្ម ចាត់ទុកសេចក្តីសម្រេចរបស់រដ្ឋាភិបាលអាមេរិកបញ្ឈប់ការផ្តល់ជំនួយហិរញ្ញវត្ថុដល់មូលនិធិអង្គការសហប្រជាជាតិ ដើម្បីប្រជាជន ថាមានឥទ្ធិពលបំផ្លិចបំផ្លាញ សុខភាពរបស់ស្ត្រី និងយុវតី ព្រមទាំងគ្រួសារក្រីក្រងាយរងគ្រោះ។
ចុះផ្សាយនៅថ្ងៃ៖
សម្រាប់លោកប្រមុខអង្គការសហប្រជាជាតិ អាមេរិកបានសម្រេចចិត្ត ដោយឈរលើមូលដ្ឋាននៃទស្សនៈវិស័យខុសពីការពិត ដែលមិនមែនជាខ្លឹមសារ និងភាពសំខាន់នៃការងារជាក់ស្តែងរបស់មូលនិធិប្រជាជន។
មូលនិធិប្រជាជន បានផ្តល់សេវាសុខភាព បន្តពូជ និងត្រួតពិនិត្យកំណើតនៅលើពិភពលោកចំនួន១៥០ប្រទេស និងបានសង្គ្រោះជីវិតស្ត្រីយ៉ាងច្រើន ! លោក អាចជាសាក្សីបានឃើញផ្ទាល់នឹងភ្នែក កាលលោកនៅជាប្រធានភ្នាក់ងារជនភៀសខ្លួន។ នេះបើតាមការអះអាងរបស់លោកអគ្គលេខាធិការអង្គការប្រជាជាតិ Antonio Guterres។
សូមបញ្ជាក់ថា នៅថ្ងៃចន្ទទី ៣មេសា លោកដូណាល់ ត្រាំ ប្រធានាធិបតីអាមេរិកបានចេញបញ្ជាឱ្យរដ្ឋាភិបាលអាមេរិក ចាត់វិធានការចាំបាច់ ដូចមានចែងតាមផ្លូវច្បាប់ ថាថវិការបស់ពលរដ្ឋអាមេរិក មិនត្រូវបានយកទៅឧបត្ថម្ភស្ថាប័ន ឬអង្គការ និងកម្មវិធីណាដែលគាំទ្រឱ្យមានការរម្លូតកូន ឬធ្វើឱ្យស្ត្រីគ្មានកូនដោយអចេតនា។ ដោយជាក់ស្តែង អាមេរិកបានសម្រេចបញ្ឈប់ការផ្តល់ថវិកា៣២,៥លាន សម្រាប់ឆ្នាំ២០១៧ ឱ្យមូលនិធិអង្គការសហប្រជាជាតិដើម្បីប្រជាជន ក្រោមហេតុផលថាស្ថាប័ននេះ បានលើកទឹកចិត្តឱ្យចិនប្រើវិធីរម្លូតកូន និងបង្ខំមិនបង្កើតកូនបាន ស្របតាមនយោបាយកម្មវិធីគ្រួសាររបស់ប្រទេស។
ប៉ុន្តែបើតាមសេចក្តីថ្លែងការណ៍របស់មូលនិធិ អាមេរិកធ្វើការចោទប្រកាន់ខុស ! អង្គការបំពេញការងារគ្រប់យ៉ាងក្នុងក្របខ័ណ្ឌច្បាប់ ដែលបុគ្គលគ្រប់រូប គូស្វាមីគ្រប់គូ អាចធ្វើសេចក្តីសម្រេចចិត្តដោយសេរី និងដោយគ្មានការបង្ខិតបង្ខំ ឬរើសអើងឡើយ។ រដ្ឋជាសមាជិកបានលើសរសើរអំពីផលល្អនៃកម្មវិធីរបស់មូលនិធិ នៅចិន ព្រោះជាទូទៅ តាមរយៈកម្មវិធីរបស់មូលនិធិ ជីវិតស្ត្រីជាពាន់នាក់ត្រូវបានសង្គ្រោះ កាត់បន្ថយអត្រាមរណៈមាតា អត្រាពិការភាព នៅក្នុងសហគមន៍ក្រីក្រ តំបន់មានជម្លោះ និងមានគ្រោះធម្មជាតិ ដូចយ៉ាងនៅអ៊ីរ៉ាក់ នេប៉ាល់ ស៊ូដង់ ស៊ីរី ហ្វីលីពីន អ៊ុយក្រែន និងយេម៉ែន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ