សភាអាមេរិកអនុម័តលុបចោលច្បាប់សុខភាពអូបាម៉ាឃែរ
នៅថ្ងៃព្រហស្បតិ៍ទី ៤ ឧសភានេះ សភាអាមេរិកបោះឆ្នោតអនុម័តច្បាប់ធានារ៉ាប់រងសុខភាពថ្មី ដើម្បីយកមកជំនួសច្បាប់អូបាម៉ាឃែរ ក្នុងសំឡេងយ៉ាងប្រផុតប្រផើយបំផុត ២១៧គាំទ្រទល់នឹង២១៣ប្រឆាំង។ ប៉ុន្តែគ្រប់គ្រាន់សម្រាប់លោកប្រធានាធិបតី ដូណាល់ ត្រាំ ស្រែកអបអរ យ៉ាងហោចក៏បានមួយភ្លែតដែរ។ ជោគជ័យដំណាក់កាលដំបូងនេះជាលទ្ធផលនៃការចរចាអស់ជាច្រើនសប្តាហ៍ រវាងអ្នកអភិរក្ស ស្តាំជ្រុលនិយមដែលលុបបំបាត់ទាំងស្រុងច្បាប់សុខភាពរបស់លោកអូបាម៉ា តែអ្នកមិនប្រកាន់តឹងចង់រក្សាគោលការណ៍សំខាន់ៗនៃច្បាប់អូបាម៉ាឃែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ជាមួយនឹងការអនុម័ត្រលុបចោលច្បាប់ស្តីពីសុខភាពអូបាម៉ាឃែរ លោក ដូណាល់ត្រាំ អាចញញឹមសម ហើយក្តីសង្ស័យមួយចំនួនទាក់ទងនឹងសមត្ថភាពដឹកនាំប្រទេសរបស់លោក ត្រាំ ក៏ត្រូវរលុបបាត់។ ជាពិសេសទៅទៀត ការអនុម័តច្បាប់យប់មិញនេះបាន សឱ្យឃើញថា នៅទីបំផុតអ្នកសាធារណរដ្ឋ ដែលមានសំឡេងភាគច្រើននៅក្នុងសភា ក៏ចេះត្រូវរ៉ូវគ្នាអាចសម្រេចអនុម័តច្បាប់មួយបានដែរ។
ដានបរាជ័យនយោបាយដ៏ជូរចត់បំផុត កាលពីខែមីនា -កាលដែលសំណើច្បាប់សុខភាពលោកត្រាំទីមួយ ត្រូវបង្ខំចិត្តដកចេញវិញ មិនបោះឆ្នោត ព្រោះគ្មានការព្រមព្រៀងគ្នាក្នុងរង្វង់បក្សកាន់អំណាច ក៏លុបបំបាត់ដែរ។
ប៉ុន្តែនេះគ្រាន់តែជោគជ័យដំណាក់កាលដំបូងប៉ុណ្ណោះ។ ច្បាប់ស្តីអំពីសុខភាពរបស់លោក ត្រាំ ឬត្រាំឃែរ ត្រូវឆ្លងកាត់ព្រឹទ្ធសភាអាមេរិក។ ច្បាប់នេះទំនងជាត្រូវវិសោធកម្មបន្ថែមទៀត។ ព្រឹទ្ធសភា បានប្រកាសជំហរប្រឆាំងរួចទៅ ថាត្រាំឃែរ បានលុបការធានារ៉ាប់រងសុខភាពរបស់ពលរដ្ឋជាអ្នកជំងឺ (អ្នកមានជំងឺរ៉ាំរៃ ទឹកនោមផ្អែម មហារីក និងបេះដូង) ប្រៀបដូចជាផ្តាច់ប្រាក់៦០០ពាន់លានដុល្លារសម្រាប់សុខភាពអ្នកក្រ យកទៅឱ្យពួកក្រុមហ៊ុន និងក្រុមអ្នកមាន យ៉ាងដូច្នោះ។
បើតាមច្បាប់ថ្មី ត្រាំឃែរ ដែលមកលុបច្បាប់ស្តីពីសុខភាពអូបាម៉ាឃែរ អនុម័តកាលពីឆ្នាំ២០១០ ពលរដ្ឋអាមេរិកលែងមានកាតព្វកិច្ចទិញធានារ៉ាប់រងសុខភាព និងគ្មានការពិន័យសម្រាប់អ្នកគ្មានធានារ៉ាប់រងទៀតដែរ។ កម្មវិធីធានារ៉ាប់រងសុខភាពរដ្ឋសហព័ន្ធសម្រាប់ពលរដ្ឋក្រីក្រ នឹងត្រូវកាត់បន្ថយបន្តិចម្តងៗ ដែលមានន័យថាពលរដ្ឋមានសុខភាពមិនល្អអាចនឹងលែងទទួលបានការធានារ៉ាប់រងពីរដ្ឋ ព្រោះគ្មានថវិកា ឬក៏ត្រូវបង់ការធានារ៉ាប់រងសុខភាពថ្លៃ ព្រោះខ្លួនស្ថិតក្នុងចង្កោមពលរដ្ឋមានហានិភ័យខ្ពស់ មិនខុសអ្វីពីឡានចាស់បង់ធានារ៉ាប់រងថ្លៃនោះទេ។ ក្រុមហ៊ុនធានារ៉ាប់រងសុខភាពមានការប្រកួតប្រជែងគ្នាខ្លាំង អាចស្នើតម្លៃទាប តែក៏អាចដំឡើងថ្លៃសម្រាប់អ្នករោគជាប់ខ្លួន សម្រាប់មនុស្សចាស់ជិតចូលនិវត្តន៍។
បើតាមរបាយការណ៍ដំបូង របស់ការិយាល័យថវិកាសភា កំណែទម្រង់ច្បាប់សុខភាពរបស់លោកត្រាំ នឹងធ្វើឱ្យពលរដ្ឋអាមេរិកប្រមាណ១៤លាននាក់អស់ការធានារ៉ាប់រងសុខភាព ចាប់ពីឆ្នាំ២០១៨ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ