អាមេរិក៖គណៈកម្មការព្រឹទ្ធសភាហៅលោក Jeff Sessions ទៅសួរនាំក្នុងទំនាក់ទំនងជាមួយរុស្ស៊ី
នៅសហរដ្ឋអាមេរិក ៥ថ្ងៃក្រោយពីបានសួរដេញដោលលោកអតីតនាយក FIB James Comey មក គណៈកម្មការស៊ើបអង្កេតរបស់ព្រឹទ្ធសភាបានកោះហៅនាថ្ងៃអង្គារ ទី១៣ មិថុនានេះលោករដ្ឋមន្រ្តីក្រសួងយុត្តិធម៌ Jeff Sessions ទៅសួរនាំក្នុងទំនាក់ទំនងជាមួយប្រទេសរុស្ស៊ី។ វេទិកាសួរដេញដោលលោក Jeff Sessions ចាប់ផ្តើមពីម៉ោង ១ និង៣០នាទីរសៀលម៉ោងក្នុងទីក្រុងវ៉ាស៊ីនតោន និងរៀបចំឡើងជាសាធារណៈតាមការស្នើសុំរបស់លោក Jeff Sessions។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
មិនមែនជារឿងចៃដន្យទេដែលគណៈកម្មការស៊ើបអង្កេតរបស់ព្រឹទ្ធសភាបានកោះហៅលោករដ្ឋមន្រ្តីក្រសួងយុត្តិធម៌ Jeff Sessions ទៅសួរនាំក្នុងទំនាក់ទំនងជាមួយប្រទេសរុស្ស៊ីនៅថ្ងៃអង្គារ ទី១៣ មិថុនានេះ។ មិនចៃដន្យ ព្រោះនាឱកាសវេទិកាចោទសួរលោកអតីតនាយក FBI James Comey រយៈពេល ៣ម៉ោងកាលពី ៥ថ្ងៃមុន ឈ្មោះលោក Sessions ត្រូវបានលោក Comey លើកយកទៅនិយាយច្រើនដងទាក់ទងនឹងសំណុំរឿងជាមួយប្រទេសរុស្ស៊ី។ មានសំណួរជាច្រើនដែលគណៈកម្មការស៊ើបអង្កេតរបស់ព្រឹទ្ធសភាចង់បានចម្លើយពិតពីលោក Sessions។
ទី១ ហេតុអ្វីបានជាលោក Sessions បានជួបលោកឯកអគ្គរដ្ឋទូតរុស្ស៊ី Seigueï Kisliak ប្រចាំសហរដ្ឋអាមេរិកជាច្រើនដងក្នុងសម័យឃោសនាបោះឆ្នោតប្រធានាធិបតីអាមេរិក? ទី២ ហេតុអ្វីបានជាលោក Sessions បិទមាត់ មិនប្រាប់ព័ត៌មានស្តីពីជំនួបនេះក្នុងពេលដែលលោកត្រូវបានលោកដូណាល់ ត្រាំតែងតាំងជារដ្ឋមន្រ្តីក្រសួងយុត្តិធម៌ ទី៣ តើលោក Sessions អាចបញ្ជាក់លើព័ត៌មានដែលលោក Comey បានរៀបរាប់កាលពី ៥ថ្ងៃមុននៅមុខគណៈកម្មការស៊ើបអង្កេតរបស់ព្រឹទ្ធសភាឬទេ? និងទី៤ ហេតុអ្វីបានជាលោក Sessions សុខចិត្តដើរចេញពីការិយាល័យប្រធានាធិបតីរបស់លោកដូណាល់ ត្រាំដើម្បីទុកឲ្យលោក Comey នៅជាមួយលោកត្រាំតែពីរនាក់?។
សូមជម្រាបជូនថាកាលពីខែមីនាកន្លងទៅ លោក Sessions ធ្លាប់បានសារភាពថា លោកបានជួបឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកលោក Seigueï Kisliak ចំនួនពីរដង។ តែលោក Sessions មិនបានប្រាប់ពីហេតុផល និងក៏មិនបានទម្លាយព័ត៌មានពីជំនួបនេះក្នុងពេលទទួលតំណែងជារដ្ឋមន្រ្តីក្រសួងយុត្តិធម៌ដែលជាហេតុធ្វើឲ្យលោករួចផុតពីការស៊ើបអង្កេតមកដល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ