លោក ត្រាំ ជួបបរាជ័យជាថ្មី ក្នុងការប៉ុនប៉ងលុបច្បាប់សុខភាពរបស់លោកអូបាម៉ា
បក្សសាធារណរដ្ឋ និងលោកប្រធានាធិបតី ដូណាល់ ត្រាំ រីករាយមិនបាន២៤ម៉ោងស្រួលបួល ក៏ស្រាប់តែបានភ្លក្សរសជាតិបរាជ័យជាថ្មី ក្នុងសំណុំរឿងចង់លុបចោលច្បាប់ធានារ៉ាប់រងសុខភាពអូបាម៉ាឃែរ។ នៅយប់មិញ ព្រឹទ្ធសភាអាមេរិកបានបោះឆ្នោតច្រានចោលគម្រោងច្បាប់នោះ ក្នុងសំឡេងប្រឆាំង៥៥ ក្នុងនោះ៧សំឡេងបានមកពីសមាជិកព្រឹទ្ធសភាបក្សសាធារណរដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
កាលពីថ្ងៃអង្គារព្រឹទ្ធសភាអាមេរិកបានបោះឆ្នោតគាំទ្រយ៉ាងប្រផុតប្រផើយ បើកឱ្យមានការជជែកពិភាក្សាគ្នា ក្រែងអាចអនុម័តបាននៅសប្តាហ៍នេះ គម្រោងច្បាប់សំដៅលុបចោលទាំងស្រុងនិងមួយភាគ ច្បាប់ធានារ៉ាប់រងសុខភាពជាមរតករបស់លោកអូបាម៉ា។
២៤ម៉ោងក្រោយ ព្រឹទ្ធសភាអាមេរិកបានច្រានចោលគម្រោងច្បាប់នេះតែម្តង ជាមួយសំឡេង៥៥។ ហើយអ្វីដែលគួរឱ្យភ្ញាក់ផ្អើលខ្លាំង គឺសមាជិកព្រឹទ្ធមកពីបក្សសាធារណរដ្ឋចំនួន៧រូប រាប់ទាំងលោកចន ម៉ាខែនផង បានភ្ជាប់ខ្លួននឹងក្រុមអ្នកប្រជាធិបតេយ្យ បោះឆ្នោតប្រឆាំងដែរ។
តាមការពិត បក្សសាធារណរដ្ឋមានសំឡេងភាគច្រើននៅក្នុងព្រឹទ្ធសភាទេ ! ប៉ុន្តែថ្វីបើអ្នកសាធារណរដ្ឋទាំងអស់មិនពេញចិត្តនឹងច្បាប់អូបាម៉ាឃែរមែន តែពួកគេមិនចុះសម្រុងគ្នានឹងខ្លឹមសារនៃគម្រោងច្បាប់លុបចោលច្បាប់សុខភាពរបស់លោកអូបាម៉ាទេ។ ពេលនេះ ក្រុមអ្នកសាធារណរដ្ឋ កំពុងឈានទៅរកជម្រើសថ្មី គឺបន្តពុះពារធ្វើកំណែទម្រង់រំលាយច្បាប់អូបាម៉ាឃែរដដែលតែមានកំរិត ដោយប្រសិទ្ធិនាមថា “លុបមានកំរិត”។
ជម្រើសនេះ នឹងត្រូវលុបចោល ពាក្យ កាតព្វកិច្ចដែលបង្ខំពលរដ្ឋគ្រប់រូបទិញការធានារ៉ាប់រងសុខភាព បើមិនចង់បង់ពិន័យ និងកាតព្វកិច្ចរបស់ក្រុមហ៊ុនដែលត្រូវបង់ធានារ៉ាប់រងសុខភាពឱ្យបុគ្គលិក។ កំណែទម្រង់ដ៏តិចតួចនេះ ក៏នឹងលុបចោលពន្ធលើក្រុមហ៊ុនផលិតសម្ភារៈបរិក្ខាពេទ្យ។
ម្យ៉ាងទៀត ប្រធានក្រុមអ្នកសាធារណរដ្ឋ មិនយកសំណើកំណែទម្រង់នេះ ទៅធ្វើជាគម្រោងច្បាប់ ពេញលេញទេ តែយកវាមកធ្វើមូលដ្ឋាននេះការជជែកចរចាគ្នា ឆ្លងពីសភាទៅព្រឹទ្ធសភា និងពីព្រឹទ្ធសភាមកសភា។ សភាអាមេរិកបានអនុម័តការលុបចោលច្បាប់អូបាម៉ាឃែរហើយ ហើយក៏បានអនុម័តគម្រោងកំណែទម្រង់ច្បាប់សុខភាពថ្មីដែរ ប៉ុន្តែព្រឹទ្ធសភាច្រានចោល។ ព្រឹទ្ធសភាបានស្នើគម្រោងកំណែទម្រង់ដែរ តែត្រូវសភាបដិសេធ។ សភានិងព្រឹទ្ធសភាត្រូវ អនុម័តច្បាប់តែមួយដូចគ្នា ទើបប្រធានាធិបតីអាចចុះហត្ថលេខាដាក់ឱ្យប្រើប្រាស់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ