គណបក្សប្រឆាំងវ៉េណេស៊ុយអេឡាបេ្តជ្ញាចិត្តបន្តធ្វើបាតុកម្មទូទាំងប្រទេស
នៅវ៉េណេស៊ុយអេឡា គណបក្សប្រឆាំងនៅតែអំពាវនាវអោយប្រជាជននៅទូទាំងប្រទេស នាំគ្នាធ្វើបាតុកម្មយ៉ាងគគ្រឹកគគ្រេងនៅថ្ងៃសុក្រនេះ ដោយសន្យានឹងបន្តរហូតដល់ថ្ងៃអាទិត្យខាងមុខទោះបីជាមានការហាមឃាត់ពីអាជ្ញាធរក្តី ដើម្បីប្រឆាំងទល់នឹងការបោះឆ្នោតជ្រើសរើសសមាជិកនៃសភាធម្មនុញ្ញនៅថ្ងៃអាទិត្យខាងមុខ។ អាមេរិកវិញ បានអំពាវនាវឲ្យគ្រួសារទូត វិលត្រលប់ចូលស្រុកវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅខណៈនេះ ក្រុមអ្នកប្រឆាំងនឹងប្រធានាធិបតីវ៉េណេស៊ុយអេឡា បានធ្វើការអំពាវនាវសុំឲ្យប្រជាជនវ៉េណេស៊ុយអេឡាទូទាំងប្រទេស នាំគ្នាធ្វើបាតុកម្មក្នុងទ្រង់ទ្រាយធំដោយចុះតាមដងផ្លូវនានានៅថ្ងៃសុក្រនេះនិងបន្តរហូតដល់ថ្ងៃសៅរ៍និងថ្ងៃអាទិត្យទី៣០កក្កដាខានស្អែកនេះ ដើម្បីបង្ហាញដល់ពិភពលោកទាំងមូលថា “សភាធម្មនុញ្ញនោះ “ពុំស្របច្បាប់ឡើយ”។ នេះជាការ ថ្លែងរបស់អនុប្រធានសភាដឹកនាំខាងបក្សប្រឆាំងនៅក្នុងសន្និសីទសារព័ត៌មានមួយ។ រីឯអ្នកតំណាងរាស្រ្តម្នាក់នៃបក្សប្រឆាំងដែរ បានថ្លែងប្រាប់ថា បក្សប្រឆាំង បានធ្វើការអំពាវនាវឲ្យប្រជាជនវ៉េណេស៊ុយអេឡាទាំងអស់ នាំគ្នាចុះក្នុងផ្លូវសំខាន់ៗ តាមរុក្ខវិថីឬដងផ្លូវនានាដោយកាន់កាប់គ្រប់គ្រងនៅលើទីកន្លែងទាំងអស់នោះ ដើម្បី”បញ្ឈប់ការលួចបន្លំធម្មនុញ្ញ”។
រដ្ឋមន្ត្រីក្រសួងមហាផ្ទៃវ៉េណេស៊ុយអេឡាវិញ បានប្រកាសកាលពីម្សិលមិញ ហាមការរួមប្រជុំនានានិងបាតុកម្មជាសាធារណៈ ឬក៏ការប្រមូលផ្តុំគ្នាក៏ព្រមទាំងរាល់ព្រឹត្តការណ៍ធម្មតានានាដែលអាចនឹងប៉ះពាល់រំខានដល់ដំណើរការបោះឆ្នោតជ្រើសរើសសមាជិកសភាធម្មនុញ្ញ។ អ្នកប្រព្រឹត្តបទល្មើស អាចនឹងជាប់គុកពី៥ឆ្នាំទៅដល់១០ឆ្នាំ។
ឆ្លើយតបនឹងការហាមឃាត់របស់ក្រសួងមហាផ្ទៃ ក្រុមអ្នកប្រឆាំង បានប្រកាសតបតវិញភ្លាមតាមគណនីTwitter ថាពួកគេនឹងចុះក្នុងដងផ្លូវធ្វើបាតុកម្មនៅថ្ងៃសុក្រនេះ។
សូមបញ្ជាក់ថានៅថ្ងៃទីពីរនៃក្បួនកូដកម្មទូទៅដើម្បីប្រឆាំងនឹងដំណើរការបោះឆ្នោតសភាធម្មនុញ្ញនៅថ្ងៃអាទិត្យខាងមុខ បុរសម្នាក់អាយុ៤៩ឆ្នាំនិងក្មេងជំទង់ម្នាក់អាយុ១៦ឆ្នាំ ត្រូវបានស្លាប់នៅក្នុងព្រឹត្តិការណ៍នេះ។ សរុបចាប់តាំងពីការចាប់ផ្តើមធ្វើបាតុកម្មប្រឆាំងនឹងលោក Maduro តាំងពីខែមេសាកន្លងមក ចំនួនមនុស្សស្លាប់ក្រោមការបង្ក្រាបរបស់អាជ្ញាធរវ៉េណេស៊ុយអេឡាបានឡើងដល់ចំនួន១០៨នាក់។
ដោយហេតុស្ថានការណ៍មានភាពវឹកវរខ្លាំងនៅក្នុងប្រទេសវ៉េណស៊ុយអេឡា សហរដ្ឋអាមេរិក បានចេញបញ្ជានៅថ្ងៃព្រហស្បតិ៍ម្សិលមិញ ឲ្យក្រុមគ្រួសាររបស់អ្នកការទូតអាមេរិកដែលធ្វើការនៅក្នុងប្រទេសនេះ ចាកចេញជាបន្ទាន់ ដោយហេតុផលវិបត្តិនយោបាយនិងអំពើហិង្សាដែលកាន់តែធ្លាក់ចុះដុនដាបខ្លាំងឡើងៗនៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ