អ.ស.ប. បរិហារការប្រើអំពើហិង្សាហួសហេតុនៅវ៉េណេស៊ុយអេឡា
បើតាមអង្គការសហប្រជាជាតិ មានការប្រព្រឹត្តអំពើហិង្សាហួសហេតុនៅវ៉េណេស៊ុយអេឡា លើកក្រុមបាតុករប្រឆាំងនឹងប្រធានាធិបតី។ ជាមួយការប្រកាសបរិហារ អង្គការសហប្រជាជាតិ បានធ្វើការចោទប្រកាន់កងកម្លាំងសន្តិសុខនិងក្រុមប្រដាប់អាវុធស្និទ្ធនឹងរដ្ឋាភិបាល ថាជាបានចាប់ឃុំឃាំង ធ្វើបាប ធ្វើទារុណកម្ម និងជាអ្នកទទួលខុសត្រូវលើការស្លាប់បាតុករវ៉េណេស៊ុយអេឡាចំនួនយ៉ាងហោច៧៣នាក់។
ចុះផ្សាយនៅថ្ងៃ៖
តាំងពីកើតមានចលនាបាតុកម្មនៅខែមេសាមក គេសង្កេតឃើញកងកម្លាំងរដ្ឋាភិបាលប្រើកម្លាំងបង្ក្រាបបាតុករហិង្សាឡើងៗ ! នេះជាប្រសាសន៍របស់ឧត្តមស្នងការសិទ្ធិមនុស្សអង្គការសហប្រជាជាតិ ដោយបានចេញសេចក្តីថ្លែងការណ៍បញ្ជាក់ទៀតថា អាជ្ញាធរវ៉េណេស៊ុយអេឡាបានថែមទាំងចាប់ខ្លួនមនុស្សរាប់ពាន់នាក់យកទៅឃុំឃាំងដោយគ្មានឆ្លងកាត់តុលាការ ហើយភាគច្រើនត្រូវរងទារុណកម្ម និងធ្វើបាបទៀត។
ដោយមានការហាមឃាត់ពីអាជ្ញាធរវ៉េណេស៊ុយអេឡា មិនឱ្យចូលក្នុងប្រទេស ក្រុមអ្នកអង្កេតអង្គការសហប្រជាជាតិ ឯកទេសផ្នែកសិទ្ធិមនុស្ស បានជួបសម្ភាសន៍ ជាមួយគ្រួសារជនរងគ្រោះ អ្នកកាសែត សាក្សី មេធាវី គ្រូពេទ្យ និងសមាជិកការិយាល័យរដ្ឋអាជ្ញា ពីចម្ងាយ។
កាលពីថ្ងៃទី ៣១កក្កដា រដ្ឋអាជ្ញាបានអង្កេតឃើញមានករណីស្លាប់ក្នុងបាតុកម្មចំនួន១២៤នាក់។ ប៉ុន្តែបើតាមការវិភាគរបស់ក្រុមអង្កេតសិទ្ធិមនុស្សអង្គការសហប្រជាជាតិ កងកម្លាំងរដ្ឋាភិបាល ទំនងជាបានធ្វើស្លាប់បាតុករ៤៦នាក់ ហើយ២៧នាក់ទៀតស្លាប់ដោយស្នាដៃហិង្សារបស់ពួកប្រដាប់អាវុធស្និទ្ធនឹងប្រធានាធិបតី។ គ្មានតួលេខផ្លូវការទាក់ទងនឹងចំនួនជនជាប់ឃុំឃាំងទេ ប៉ុន្តែអង្គការប៉ាន់ស្មានថា មានមនុស្សយ៉ាងហោច៥ពាន់នាក់ត្រូវចាប់ខ្លួន គិតចាប់ពីខែមេសាមក និងជាងមួយពាន់នាក់កំពុងជាប់ឃុំនៅឡើង មកទល់នឹងពេលនេះ។
របាយការណ៍គួរឱ្យទុកចិត្តបានជាច្រើនទៀត បានលើកឡើងអំពីសកម្មភាពឃោរឃៅ អមនុស្សធម៌ ធ្វើបាប របស់ភ្នាក់ងារប៉ូលិសទៅលើអ្នកជាប់ឃុំ ស្ទើរហៅបានថាជាទារុណកម្ម ៖ ការឆក់ ចងដៃព្យួររាប់ម៉ោង បន្ថប់ដង្ហើមដោយប្រើឧស្ម័ន ឬការគំរាមសម្លាប់ គំរាមបំពារបំពានផ្លូវភេទ លើជនរងគ្រោះផ្ទាល់និងគ្រួសារ។
ឧត្តមស្នងការសិទ្ធិមនុស្សបានទាមទារឱ្យអាជ្ញាធរវ៉េណេស៊ុយអេឡាបញ្ចប់សកម្មភាពហិង្សាលើបាតុករ និងការចាប់ខ្លួនមនុស្សដោយគ្មានតុលាការជាបន្ទាន់ និងបានព្រមានថា ថ្នាក់ដឹកនាំជាន់ខ្ពស់រដ្ឋាភិបាល ជាអ្នកទទួលខុសត្រូវនៃការរំលោភច្បាប់របស់អង្គការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ