សហរដ្ឋអាមេរិកប្រឆាំងនឹងការដំឡើងវិភាគទាននៅធនាគារពិភពលោក
រដ្ឋមន្ត្រីក្រសួងសេដ្ឋកិច្ចអាមេរិកលោក Steven Mnuchin បានប្រកាសនៅថ្ងៃសុក្រនេះ ច្រានចោលនូវសំណើរបស់ប្រធានធនាគាពិភពលោក ដែលចង់បង្កើនទុនឱ្យធនាគារ។ ជាមួយនឹងសេចក្តីប្រកាសប្រឆាំង អាមេរិកបានថែមទាំងអំពាវនាវ ឱ្យធនាគារចេះគោរពវិន័យថវិកាទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
បង្កើនទុនមិនមែនជាដំណោះស្រាយទេ ដរាបណាទុនមានស្រាប់ចាយមិនត្រឹមត្រូវ ! នេះជាសេចក្តីប្រកាសរបស់រដ្ឋមន្ត្រីក្រសួងសេដ្ឋកិច្ចអាមេរិក នៅក្នុងបទអន្តរាគមន៍ដែលគ្រោងធ្វើជាមួយគណៈកម្មការអភិវឌ្ឍន៍ធនាគារពិភពលោក នៅថ្ងៃសៅរ៍នេះ តែត្រូវបានសារព័ត៌មានផ្សព្វផ្សាយតាំងពីល្ងាចថ្ងៃសុក្រមក។
ប្រធានធនាគារពិភពលោកបានបង្ហាញចេតនាចង់បង្កើនប្រាក់វិភាគទាន (ប្រាក់ទុន) ដើម្បីប្រឈមនឹងសេចក្តីត្រូវការផ្នែកកម្ចីដែលកើនឡើងឥតឈប់។ ភាគីអាមេរិកបានច្រានសំណើនេះហើយ ថែមតាំងព្រមានថា ត្រូវរឹងបណ្តឹងវិន័យថវិកា ! ដោយត្រូវចែកចាយកម្ចីឱ្យចំទិស។ អាទិភាពរបស់ស្ថាប័នហិរញ្ញវត្ថុអន្តរជាតិ គឺផ្តល់កម្ចីឱ្យតែប្រទេសណាដែលត្រូវការជាចាំបាច់ខ្លាំងសម្រាប់អភិវឌ្ឍន៍ប្រទេស ប៉ុន្តែធនាគារពិភពលោកមិនធ្វើដូច្នេះទេ ! ដោយមិននិយាយឱ្យចំឈ្មោះ អាមេរិកចង់បន្ទោសធនាគារពិភពលោកថាផ្តល់ប្រាក់កម្ចីដល់ចិនច្រើនជ្រុល។
ចិនជាកូនបំណុលរបស់ធនាគារពិភពលោកដ៏ធំជាងគេ ជាមួយនឹងប្រាក់កម្ចី ២៤០០លានដុល្លារ នៅឆ្នាំ២០១៥។ ប៉ុន្តែបើតាមលោក ជីម យ៉ុងគីម ប្រធានធនាគារពិភពលោក កម្ចីឱ្យមហាយក្សចិន បានផ្តល់បទពិសោធន៍ការងារជាប្រយោជន៍ច្រើនសម្រាប់ធ្វើការប្រទេសមានប្រាក់ចំណូលទាបខ្លាំង។ ហេតុដូច្នេះហើយបានលោកនៅតែមានសុទិដ្ឋនិយមចំពោះការគាំទ្ររបស់អាមេរិកក្នុងការដំឡើងវិភាគទាន។ ជាច្រើនខែមកហើយដែលប្រធានស្ថាប័នមួយនេះ ទាមទារបង្កើនដើមទុន ដើម្បីអាចប្រកួតប្រជែងជាមួយស្ថាប័នហិរញ្ញវត្ថុដើម្បីអភិវឌ្ឍន៍ថ្មីៗផ្សេងទៀតបាន។ នៅឆ្នាំ២០១៦-១៧ ធនាគារពិភពលោកផ្តល់ប្រាក់កម្ចីតែប្រមាណ៥៨៨០០លានដុល្លារប៉ុណ្ណោះ ទល់នឹង៦១300លានកាលពីឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ