អតីតទីប្រឹក្សាយោធាលោកត្រាំ ទំនងជាប៉ងធ្វើបច្ចាប័នមេបក្សប្រឆាំងតួកគីជាថ្នូរនឹងប្រាក់
រដ្ឋអាជ្ញាពិសេសអាមេរិកកំពុងផ្ចង់ការអង្កេតទៅលើរូបអតីតទីប្រឹក្សាយោធារបស់លោកត្រាំ ដោយសង្ស័យថា លោក Michael Flynn ទំនងជាបានគិតគូរចង់ធ្វើបច្ចាប័នមេបក្សប្រឆាំងតួកគី ហ្គូឡេន Fethullah Gülenទៅឱ្យរដ្ឋាភិបាលអង់ការ៉ា ជាថ្នូរនឹងទឹកប្រាក់រាប់លានដុល្លារ។ នេះបើតាមការលេចធ្លាយព័ត៌មាននៅតាមប្រព័ន្ធឃោសនាព័ត៌មានអាមេរិក ប៉ុន្តែគ្មានការបញ្ជាក់ព័ត៌មានមកពីខាងរដ្ឋាអាជ្ញា និងខាងជនជាប់សង្ស័យទេ។
ចុះផ្សាយនៅថ្ងៃ៖ កែប្រែថ្ងៃទី៖
បើតាមទូរទស្សន៍NBC និងសារព័ត៌មាន Wall Street Journal រដ្ឋអាជ្ញាពិសេស លោក រ៉ូប៊ែរ ម៉ូល័រ កំពុងផ្ចង់ការអង្កេតទៅជំនួបប្រជុំរវាងលោក Flynn និងកូនប្រុស ជាមួយអ្នកទទួលខុសត្រូវជាន់ខ្ពស់តួកគី នៅចន្លោះពេលដែលលោកដូណាល់ត្រាំ ជាប់ឆ្នោតភ្លាម ថ្ងៃទី ៨ វិច្ឆិកា២០១៦ ដល់ថ្ងៃទី ២០ មករា ២០១៧ ថ្ងៃលោកត្រាំចូលកាន់តំណែងជាផ្លូវការ។
ការអង្កេតរបស់រដ្ឋអាជ្ញាពិសេស ដែលមានអំណាចធំ និងឯករាជ្យបំផុតនេះ កំពុងដឹកនាំធ្វើអង្កេតលើសំណុំរឿងរុស្ស៊ីចូលលូកលាន់ក្នុងការបោះឆ្នោតប្រធានាធិបតីអាមេរិក ថាតើ ក្រុមការងារលោកត្រាំ ពិតជាបានប្រើឥទ្ធិពលរបស់រុស្ស៊ីមែនឬយ៉ាងណា ហើយតើលោកត្រាំបានដឹងដែរឬអត់។ នៅក្នុងក្របខណ្ឌនៃការអង្កេតនេះ រដ្ឋអាជ្ញាបានចាប់អារម្មណ៍នឹងទំនាក់ទំនងរវាងលោក Flynnជាមួយនឹងអ្នកការទូតរុស្ស៊ីនៅទីក្រុងវ៉ាស៊ីនតោន តែក៏សង្កេតឃើញមានសកម្មភាពលាក់កំបាំងក្រៅផ្លូវការស្តីពី តួកគី។
បើប្រភពព័ត៌មានទាំងពីរ ដែលមានសំអាងបានមកពីប្រភពស្និទ្ធនឹងក្រុមអ្នកអង្កេត តំណាងរដ្ឋាភិបាលតួកគី បានមកជួបជជែកជាមួយលោក Flynn និងកូនប្រុស ដោយបានស្នើនូវទឹកប្រាក់ចំនួន១៥លានដុល្លារ ជាថ្នូរនឹងការធ្វើបច្ចាប័នលោក Gülen ជាប្រមុខសាសនា និងមេបក្សប្រឆាំងតួកគី រស់និរទេសខ្លួនរដ្ឋប៉េនស៊ីវ៉ានីសហរដ្ឋអាមេរិក តាំងពីឆ្នាំ១៩៩៩មក។ ប្រធានាធិបតីតួកគី លោក អែរដូហ្កាន បានចោទប្រមុខសាសនាហ្គូឡេននេះ ថាបានដឹកនាំនាំធ្វើរដ្ឋប្រហារមិនសម្រេចកាលពីខែកក្កដា២០១៦។
មេធាវីរបស់លោកFlynn បានបដិសេធមិនធ្វើអត្ថាធិប្បាយអ្វីទាំងអស់ ទាក់ទងនឹងព័ត៌មាននេះ ដើម្បីគោរពដំណើរការនីតិវិធី និងបានចេញសេចក្តីថ្លែងការណ៍មួយចាត់ទុក ថាជា មិនពិត ចំពោះដំណឹងដែលនាំឱ្យមានការសង្ស័យក្លាយជារឿងអាស្រូវ ពុករលួយ។ ចំណែកខាងរដ្ឋអាជ្ញាក៏បដិសេធមិនចេញសេចក្តីថ្លែងការណ៍ដែរ។
លោកFlynn ជាទីប្រឹក្សាយោធារបស់សេតវិមានរយៈពេល២២ថ្ងៃ។ លោកត្រូវបានដកចេញពីតំណែង ដោយមានរឿងអាស្រូវពាក់ព័ន្ធនឹងរុស្ស៊ី ក្នុងអំឡុងពេលឃោសនាបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ