ទំនាស់រវាងរុស្ស៊ីនិងអាមេរិករាលដាលដល់ប្រព័ន្ធផ្សព្វផ្សាយ
ថ្ងៃពុធ ១៥ វិច្ឆិកានេះ ពួកអ្នកតំណាងរាស្ត្ររុស្ស៊ីត្រូវបោះឆ្នោតអនុម័តច្បាប់ ដែលតម្រូវឲ្យ ប្រព័ន្ធផ្សព្វផ្សាយបរទេសដំណើរការនៅរុស្ស៊ី ជាបឋម អាមេរិកាំង ចុះឈ្មោះក្នុងបញ្ជីក្រសួងយុត្តិធម៌រុស្ស៊ី ក្នុងឋានៈជា “ភ្នាក់ងារបរទេស”។ ច្បាប់នេះ ជាចម្លើយតបនឹង ការតម្រូវពីខាងអាជ្ញាធរអាមេរិកាំង ឲ្យកាណាល់ទូរទស្សន៍រដ្ឋរុស្ស៊ី Russia Today ដំណើរការនៅសរអា លុះទាល់តែសុខចិត្តចុះឈ្មោះទៅហើយ នៅទីនោះជា “ភ្នាក់ងារបរទេស“ - ដំណឹងនេះ ប្រកាសល្ងាចមិញ ដោយអង្គភាពពត៌មាន សភាឌូម៉ា ជា សភាជាន់ក្រោមនៃរដ្ឋសភារុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៩
មូលហេតុ គឺមកពីថ្ងៃ ១៣ វិច្ឆិកាកន្លងទៅ ជាថ្ងៃចុងក្រោយកំហិត ដោយអាជ្ញាធរអាមេរិកាំង ឲ្យកាណាល់ទូរទស្សន៍រដ្ឋរុស្ស៊ី Russia Today ដែលត្រូវក្រុងវ៉ាស៊ីនតោន ចាត់ទុកជាម៉ាស៊ីនឃោសនារបស់រុស្ស៊ី “ញ៉ាំងឲ្យមានការលូកដៃពីខាងរុស្ស៊ី ចូលក្នុងការបោះឆ្នោតនៅសរអាត្រូវធ្វើជម្រើស ៖ ឬមួយចុះឈ្មោះជា “ភ្នាក់ងារបរទេស“ ឬមួយ ជាប់ក្នុងសំណុំរឿងព្រហ្មទណ្ឌ។ ម៉ូស្គូដោយដាច់ចិត្តជ្រើសយក សេណារីយ៉ូទី១ បានព្រមានថា ចម្លើយបកទៅអាមេរិកវិញ នឹងថ្លឹងឲ្យបានសមស្រប ហើយលឿនរហ័ស។
ម៉្លោះហើយបានជានៅថ្ងៃបន្ទាប់មក គឺថ្ងៃ ១៤ វិច្ឆិកា ពួកអ្នកតំណាងរាស្ត្ររុស្ស៊ី ក្នុងសម័យប្រជុំពិភាក្សា លើកទី១ បានអនុម័តត្រួសៗជាមុន វិសោធនកម្ម ភ្ជាប់ទៅនឹងច្បាប់ឆ្នាំ២០១២ ដែលមកទល់ឥឡូវ ប៉ះតែអង្គការក្រៅរដ្ឋាភិបាល ONG ណាដែល ទទួលលុយពីបរទេស ហើយធ្វើសកម្មភាពនយោបាយនៅរុស្ស៊ី ត្រូវចុះឈ្មោះជា”ភ្នាក់ងារបរទេស”។ ហើយថ្ងៃពុធនេះ ក្នុងលក្ខណៈទាន់ហន់ ត្រូវប្រព្រឹត្តទៅ សម័យប្រជុំពិភាក្សាវិសោធនកម្មនោះ ទាំងលើកទី២ ទាំងលើកទី៣ ដែលពិតជានឹងអនុម័តវា ដាច់ស្រេចតែម្តង ដ្បិតតំណាងរាស្ត្រគ្រប់តែគណបក្សក្នុងសភា បានឯកភាពគ្នាទៅហើយ ក្នុងការផ្តល់ចម្លើយតបនឹងសរអាវិញ។
តាមសំដី អនុប្រធានសភាឌូម៉ា អតីតអ្នកកាសែត លោកPiotr Tolstoi៖ ក្នុងអត្ថបទច្បាប់ថ្មីនោះ គឺគ្មាន“បញ្ជីខ្មៅ” នៃប្រព័ន្ធផ្សព្វផ្សាយបរទេសទេ។ ពីព្រោះ បំពាក់ដោយសមត្ថកិច្ចកំណត់ តើប្រព័ន្ធផ្សព្វផ្សាយបរទេសណាខ្លះនៅរុស្ស៊ី ដែលត្រូវចុះឈ្មោះជា”ភ្នាក់ងារបរទេស “ គឺក្រសួងយុត្តិធម៌រុស្ស៊ីតែម្តង។ ហើយបើ គេមិនព្រមចុះឈ្មោះបែបនេះ គឺគេមុខជាលែងអាចដំណើរការនៅរុស្ស៊ីទៀតឡើយ។
ទោះយ៉ាងណាក្តី អស់ប៉ុន្មានថ្ងៃជាប់មកហើយ ទូរទស្សន៍រុស្ស៊ីតែងបង្ហើបឲ្យដឹងថា ចម្លើយរុស្ស៊ីតម្រង់ជាបឋម ទល់នឹងប្រព័ន្ធផ្សព្វផ្សាយអាមេរិកាំងបែបយ៉ាង CNN, Voice of America, Radio Liberty ។
ជាការកត់សម្គាល់ ការដែលអាជ្ញាធរអាមេរិកាំង “ធ្វើសរសៃ“ កាណាល់ទូរទស្សន៍រុស្ស៊ីនៅសរអា បានញ៉ាំងឲ្យលោកប្រធានាធិបតី វ៉្លាឌីមៀរ ពូទីន ច្រឡោតមិនស្ទើរឡើយ ដោយគាត់ចាត់ទុកជា“ការវាយប្រហារមកលើសេរីភាពបញ្ចេញមតិ” ទាំងសន្យាឲ្យ”មេរៀន”ទៅក្រុងវ៉ាស៊ីនតោនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ