អាមេរិកប្រើសិទ្ធិវ៉េតូប្រឆាំងសេចក្តីសម្រេចរបស់ក្រុមប្រឹក្សាសន្តិសុខដែលថ្កោលទោសអាមេរិក
នៅថ្ងៃចន្ទ ទី១៨ ធ្នូ និងដូចដែលគ្រប់គ្នាបានរង់ចាំ អាមេរិកបានប្រើសិទ្ធិវ៉េតូប្រឆាំងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខដែលថ្កោលទោសលើការសម្រេចចិត្តរបស់លោកដូណាល់ ត្រាំដែលទទួលស្គាល់ហ្សេរុយសាឡិមជាទីក្រុងផ្តាច់មុខរបស់អ៊ីស្រាអែល។ សេចក្តីសម្រេចចិត្តបានបញ្ជាក់ច្បាស់ៗថា គំនិតផ្តួចផ្តើមជាលក្ខណៈឯតោភាគីរបស់លោកដូណាល់ ត្រាំជារឿងមិនអាចទទួលយកបានទេ ព្រោះវាមិនបានស្ថិតក្នុងក្របខ័ណ្ឌនៃដំណើរស្វែងរកសន្តិភាពឲ្យអ៊ីស្រាអែល និងប៉ាឡេស្ទីន។ ជាថ្មីម្តងទៀត សេចក្តីសម្រេចចិត្តដែលបានយល់ព្រមដោយ ១៤ប្រទេសសមាជិកបានដាក់អាមេរិកឲ្យនៅឯកោ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅក្នុងចំណោមសមាជិកក្រុមប្រឹក្សាសន្តិសុខអង្គការសហប្រជាជាតិទាំង ១៥ប្រទេស មានតែអាមេរិកមួយគត់ដែលតំណាងដោយលោកស្រីឯកអគ្គរដ្ឋទូត Nikki Halley បានលើកដៃប្រឆាំងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខនាការបោះឆ្នោតនៅថ្ងៃចន្ទ ទី១៨ ធ្នូ។ គឺជាសេចក្តីសម្រេចចិត្តមួយដែលក្រុមប្រឹក្សាប្រឹក្សាសន្តិសុខបានថ្កោលទោសអាមេរិកពីបទបានប្រកាសទទួលស្គាល់ហ្សេរុយសាឡិមជាទីក្រុងផ្តាច់មុខរបស់អ៊ីស្រាអែល។ ក្រុមប្រឹក្សាសន្តិសុខបានយល់ឃើញថា គំនិតផ្តួចផ្តើមជាលក្ខណៈឯកតោភាគីរបស់អាមេរិកដូចនេះបានធ្វើឲ្យប៉ះពាល់ខ្លាំងដល់ដំណើរស្វែងរកសន្តិភាពឲ្យអ៊ីស្រាអែល និងប៉ាឡេស្ទីន។
យ៉ាងណាក៏ដោយ លោកស្រី Halley ហាក់ធ្វើដូចជាភ្ញាក់ផ្អើលលើការសម្រេចចិត្តជាឯកច្ឆន្ទរបស់ប្រទេសសមាជិកផ្សេងប្រឆាំងនឹងអាមេរិក រួចបែរជាថ្លែងពង្រាងក្នុងរឿងជំនួយដែលអាមេរិកបានផ្តល់ឲ្យប៉ាឡេស្ទីនច្រើនជាងប្រទេសផ្សេងទៅវិញ។ បន្ទាប់មកទៀត លោកស្រី Halley ក៏បានថ្លែងបរិហារលើសេចក្តីសម្រេចចិត្តរបស់ក្រុមប្រឹក្សាសន្តិសុខដោយចាត់ទុកជាការប្រមាថលើសហរដ្ឋអាមេរិក និងថា អាមេរិកមិនអាចបំភ្លេចរឿងនេះបានទេ។ សម្រាប់លោកស្រី Halley សេចក្តីសម្រេចចិត្តរបស់ក្រុមប្រឹក្សាសន្តិសុខពេលនេះជាឧទាហរណ៍មួយបន្ថែមទៀតដែលបញ្ជាក់ថា អង្គការសហប្រជាជាតិបានធ្វើរឿងអាក្រក់ច្រើនជាងរឿងល្អនៅក្នុងចម្លើយរបស់ខ្លួនសម្រាប់ជម្លោះអ៊ីស្រាអែល និងប៉ាឡេស្ទីន។
លោកស្រី Halley បានបន្ថែមទៀតថា អាមេរិកបានចូលរួមច្រើនណាស់ក្នុងការជំរុញដំណើរស្វែងរកសន្តិភាពនៅមជ្ឈិមបូព៌ា ពោលមុនលោកដូណាល់ ត្រាំប្រកាសទទួលស្គាល់ហ្សេរុយសាឡិមជាទីក្រុងរបស់អ៊ីស្រាអែលទៅទៀត។ សូមជម្រាបជូនថាកន្លងមក អាមេរិកក៏ធ្លាប់បានប្រើសិទ្ធិវ៉េតូប្រឆាំងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខក្នុងរឿងជម្លោះអ៊ីស្រាអែល ប៉ាឡេស្ទីនដែរ។ យ៉ាងណាក៏ដោយ រឿងរ៉ាវមួយកំពុងធ្វើឲ្យអាមេរិកកាន់តែឯកោនៅលើឆាកអន្តរជាតិ។ លោកអនុប្រធានាធិបតីអាមេរិក Mike Pence ដែលគ្រោងទៅទស្សនកិច្ចនៅអ៊ីស្រាអែល និងនៅអេហ្ស៊ីបក្នុងសប្តាហ៍នេះបានលើកពេលទៅពាក់កណ្តាលខែមករា ឆ្នាំ ២០១៨ វិញ។
តែចាប់ពីពេលនេះទៅ ស្ថានការណ៍អាចនឹងមានការវិវត្តន៍បន្ថែមទៀត ពិសេសនៅអង្គការសហប្រជាជាតិដែលសេចក្តីសម្រេចស្រដៀងគ្នានឹងក្រុមប្រឹក្សាសន្តិសុខអាចនឹងអនុម័តនៅក្នុងមហាសន្និបាតអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ