FBI ចាប់ខ្លួនអតីតទាហានម្នាក់ពីបទរៀបផែនការភេរវកម្មក្នុងថ្ងៃបុណ្យណូអែលនៅ San Francisco
នៅសហរដ្ឋអាមេរិក ភ្នាក់ងារ FBI បានចាប់ខ្លួនលោក Everitt Aaron Jameson អតីតទាហានម្នាក់ពីបទបានរៀបចំផែនការភេរវកម្មមួយចំថ្ងៃបុណ្យណូអែលនៅក្នុងទីក្រុង San Francisco។ ព័ត៌មានផ្តល់ដោយតុលាការបានឲ្យដឹងថា ភ្នាក់ងារ FBI បានចាប់ខ្លួនលោក Jameson កាលពីថ្ងៃសុក្រ ទី២២ ធ្នូ និងថា ផែនការភេរវកម្មដែលលោក Jameson បានរៀបចំនោះបានបានចម្លងយកតាមម៉ូដែលរបស់អង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បច្ចុប្បន្នមានមុខរបបជាអ្នកបើកឡានកាំមីញ៉ុង បុរស Jameson វ័យ ២៦ឆ្នាំមានផែនការធ្វើភេរវកម្មនៅ « Pier ៣៩ » ដែលជាតំបន់ទេសចរណ៍ដ៏ល្បីល្បាញមួយក្នុងទីក្រុង San Francisco។ ជន Jameson ត្រូវបានតុលាការចោទប្រកាន់ពីបទប៉ុនប៉ងគាំទ្រផ្នែកសម្ភារៈដល់អង្គការភេរវនិយមអន្តរជាតិ និងដែលអាចដេកក្នុងគុករយៈពេល ២០ឆ្នាំ។ ជនជាប់សង្ស័យរូបនេះបាននិយាយប្រាប់ភ្នាក់ងារ FBI ថា ខ្លួនគេមានបំណងប្រើគ្រឿងបំផ្ទុះវាយប្រហារលើហ្វូងមនុស្សនៅចន្លោះថ្ងៃទី១៨ និងទី២៥ ធ្នូចំថ្ងៃបុណ្យណូអែល។
បុណ្យណូអែលដែល Jameson បានអះអាងថា ជាថ្ងៃដ៏ល្អដើម្បីធ្វើភេរវកម្ម និងថា ការដែលខ្លួនគេបានជ្រើសរើសយកកន្លែងនោះព្រោះជាទីតាំងដែលរូបគេធ្លាប់បានទៅ និងសង្កេតឃើញមានមនុស្សច្រើន។ តាមឯកសារផ្តល់ដោយតុលាការ ជន Jameson បានសារភាពប្រាប់ភ្នាក់ងារ FBI ថា រូបគេបានត្រៀមខ្លួនរួចហើយដើម្បីស្លាប់។ សូមជម្រាបជូនថា មុននឹងចាប់ខ្លួនក្នុងថ្ងៃសុក្រ ទី២២ ធ្នូ ភ្នាក់ងារ FBI បានចូលទៅឆែកឆេរផ្ទះរបស់ជន Jameson នៅក្នុងទីក្រុង Modesto ដែលស្ថិតចម្ងាយប្រមាណជា ១៣០គីឡូម៉ែត្រប៉ែកខាងកើតបង្អស់នៃរដ្ឋ Californie។ នាឱកាសចូលឆែកឆេរនោះ ភ្នាក់ងារ FBI បានរកឃើញអាវុធ និងជាតផ្ទុះជាច្រើន។
ជន Jameson បាននិយាយប្រាប់ភ្នាក់ងារ FBI ពីចេតនារបស់ខ្លួនដែលបានគិតខ្លួនឯងជាសមាជិកម្នាក់ដ៏សំខាន់របស់អង្គការរដ្ឋអ៊ីស្លាម និងថា គួរតែមានការវាយប្រហារមួយផ្សេងទៀតដូចនៅទីក្រុងញូយ៉ក ឬ San Bernardino។ តាមឯកសារផ្តល់ដោយតុលាការដដែល រូប Jameson ជាអ្នកដែលបានសរសេរសារគាំទ្រភេរវនិយមនៅលើបណ្តាញសង្គម។ ទីភ្នាក់ងារ FBI បានឲ្យដឹងថា ជន Jameson បានចូលហ្វឹកហ្វឺនជាមួយកម្លាំងទ័ពក្នុងឆ្នាំ ២០០៩ និងទទួលបានសញ្ញាប័ត្រផ្នែកបាញ់ស៊ីប។ តែត្រូវបានបញ្ឈប់ពីជួរទាហាន បន្ទាប់ពីជន Jameson មិនបានផ្តល់ព័ត៌មានទាក់ទងនឹងជម្ងឺហឺតរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ