អាមេរិក៖ក្រុមអ្នកសាធារណរដ្ឋ និងក្រុមអ្នកប្រជាធិបតេយ្យនិយាយមិនទាន់ត្រូវគ្នាដើម្បីបញ្ចប់ « Shutdown »
នៅសហរដ្ឋអាមេរិក វិបត្តិថវិកាសហព័ន្ធ « Shutdown » បានឈានចូលថ្ងៃទី៣ នាថ្ងៃចន្ទ ទី២២ មករានេះ។ ក្រុមសមាជិកព្រឹទ្ធសភាមកពីគណបក្សសាធារណរដ្ឋ និងមកពីគណបក្សប្រជាធិបតេយ្យបានចរចាគ្នាក្នុងថ្ងៃអាទិត្យ ទី២១ មករា តែនៅមិនទាន់អាចនិយាយចុះសម្រុងគ្នានៅឡើយទេ។ តាមគម្រោង ការបោះឆ្នោតមួយនឹងត្រូវធ្វើឡើងនារាត្រីយប់ថ្ងៃអាទិត្យឆ្លងចូលថ្ងៃចន្ទនេះ តែត្រូវបានលើកពេលនៅម៉ោង ១២ថ្ងៃត្រង់ ម៉ោងក្នុងទីក្រុងវ៉ាស៊ីនតោននាថ្ងៃចន្ទនេះវិញ។
ចុះផ្សាយនៅថ្ងៃ៖
ស្តាប់ - ០១:៥០
ពេញមួយថ្ងៃអាទិត្យទី២១ មករាជិតដល់អធ្រាត្រ ក្រុមដឹកនាំមកពីគណបក្សសាធារណរដ្ឋ និងគណបក្សប្រជាធិបតេយ្យនៅព្រឹទ្ធសភាបានជួបចរចាគ្នាដើម្បីស្វែងរកកិច្ចព្រមព្រៀងមួយសំដៅបិទបញ្ចប់វិបត្តិថវិកាសហព័ន្ធព័ន្ធ « Shutdown »។ វិបត្តិដែលបានអូសបន្លាយតាំងពី ៣ថ្ងៃមកហើយ និងបានធ្វើឲ្យមន្រ្តីរដ្ឋការសហព័ន្ធជាច្រើនរយនាក់បង្ខំចិត្តឈប់សម្រាកនៅផ្ទះដោយមកពីរដ្ឋគ្មានលុយបើកប្រាក់ខែឲ្យ។ មូលហេតុនៃភាពជាប់គាំងនេះត្រូវបានគេមើលឃើញថា មកពីគណបក្សទាំងពីរបន្តប្រទាញប្រទង់គ្នានៅក្នុងសំណុំរឿងអន្តោប្រវេសន៍ដ៏រស៊ើប។
ក្រុមអ្នកប្រជាធិបតេយ្យចង់ឲ្យក្រុមអ្នកសាធារណរដ្ឋលើកយកទៅជជែកនូវបញ្ហាជនអន្តោប្រវេសន៍ខុសច្បាប់ទាក់ទងនឹងក្រុមយុវជនជិត ៧០០ ០០០នាក់ដែលធំដឹងក្តីនៅអាមេរិក។ នៅក្នុងកិច្ចចរចាពេញមួយថ្ងៃអាទិត្យ ទី២១ មករា ក្រុមអ្នកសាធារណរដ្ឋដែលមានសម្លេងភាគច្រើននៅព្រឹទ្ធសភាហាក់បានបន្ទន់ជំហរបន្តិចដោយបញ្ជាក់ថា ពួកគេនឹងយល់ព្រមលើកយករឿងយុវជនអន្តោប្រវេសន៍ខុសច្បាប់ទៅជជែក ប្រសិនបើក្រុមអ្នកប្រជាធិបតេយ្យយល់ព្រមបន្តថវិកាសហព័ន្ធចំនួន ៣សប្តាហ៍។ ចំណែកក្រុមអ្នកប្រជាធិបតេយ្យបន្តទទូចចង់ឲ្យការបន្តកញ្ចប់ថវិកាសហព័ន្ធរយៈពេលខ្លីខាងមុខថ្មីមានខ្ទង់ចំណាយសម្រាប់គាំពារយុវជនអន្តោប្រវេសន៍ខុសច្បាប់។
យ៉ាងណាក៏ដោយ ការបោះឆ្នោតដែលត្រូវធ្វើនៅយប់ថ្ងៃអាទិត្យឆ្លងចូលថ្ងៃចន្ទ ទី២២ មករាត្រូវបានលើកទៅម៉ោង ១២ថ្ងៃត្រង់ម៉ោងក្នុងទីក្រុងវ៉ាស៊ីនតោននាថ្ងៃចន្ទ ទី២២ មករា។ ខណៈនេះ ក្រុមអ្នកសាធារណរដ្ឋ និងក្រុមអ្នកប្រជាធិបតេយ្យបន្តទម្លាក់កំហុសដាក់គ្នាទៅវិញ ទៅមក។ គួររម្លឹកជូនថា វិបត្តិដូចគ្នានេះធ្លាប់បានកើតមានកាលពីឆ្នាំ ២០១៣ ក្នុងជំនាន់លោកប្រធានាធិបតីបារ៉ាក់ អូបាម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ