លោកកាឡូស អាល់វ៉ារ៉ាដូជាប់ឆ្នោតប្រធានាធិបតីកូស្តារីកាក្នុងអាយុ ៣៨ឆ្នាំ
នៅក្នុងប្រទេសកូស្តារីកា លោកកាឡូស អាល់វ៉ារ៉ាដូបានជាប់ឆ្នោតប្រធានាធិបតីនាការបោះឆ្នោតជុំទី២ នៅថ្ងៃអាទិត្យ ទី១ មេសា។ មានអាយុ ៣៨ឆ្នាំ លោកកាឡូស អាល់វ៉ារ៉ាដូជាអតីតកាសែត អ្នកនិយមបទចម្រៀងរ៉ុក និងជាអ្នកនិពន្ធសរសេរសៀវភៅប្រលោមលោក។ អ្វីជាការកត់សម្គាល់ លោកកាឡូស អាល់វ៉ារ៉ាដូបានជាប់ជាប់ឆ្នោតក្នុងពេលដែលប្រទេសកំពុងជួបវិបត្តិសេដ្ឋកិច្ច ពិសេសមានឩនភាពថវិកាជាតិ និងប្រាក់បំណុលដ៏ច្រើនសម្បើម។
ចុះផ្សាយនៅថ្ងៃ៖
មានអាយុ ៣៨ឆ្នាំ លោកកាឡូស អាល់វ៉ារ៉ាដូបានក្លាយជាប្រធានាធិបតីទី៤៨ នៃប្រទេសកូស្តារីកាដោយទទួលបានសម្លេងគាំទ្រចំនួន ៦០,៦% ពោលច្រើនជាងឆ្ងាយគូប្រជែងលោកហ្វាប៊្រីស្យូ អាល់វ៉ារ៉ាដូដែលទទួលបានត្រឹម ៣៩,៣%។ ចំណែកអត្រាអនុបវាទនៅក្នុងការបោះឆ្នោតជុំទី២ មានចំនួន ៣៣,១% ពោលតិចជាងនាការបោះឆ្នោតជុំទី១ កាលពី ២ខែមុន។ លោកកាឡូស អាល់វ៉ារ៉ាដូជាឥស្សរជនចេញមកពីគណបក្សកាន់អំណាចឈ្មោះ ពលរដ្ឋសកម្ម ជាអតីតអ្នកកាសែត អ្នកចូលចិត្តបទចម្រៀងរ៉ុក និងធ្លាប់បានសរសេរសៀវភៅប្រលោមលោកចំនួន ៣ក្បាល។
នៅក្នុងរដ្ឋាភិបាលផុតអាណត្តិដឹកនាំដោយគណបក្សពលរដ្ឋសកម្ម លោកកាឡូស អាល់វ៉ារ៉ាដូកាន់តំណែងជារដ្ឋមន្រ្តីក្រសួងការងារ និងកិច្ចការសង្គម ហើយនៅក្នុងយុទ្ធនាការឃោសនាបោះឆ្នោត លោកកាឡូស អាល់វ៉ារ៉ាដូបានជ្រើសយកប្រធានបទយុត្តិធម៌សង្គម និងវិសមភាពផ្លូវភេទ។ សូមជម្រាបជូនថា នេះជាលើកទី២ ហើយដែលគណបក្សពលរដ្ឋសកម្មបានឡើងកាន់អំណាចនៅក្នុងប្រទេសកូស្តារីកា។ កន្លងមក អំណាចបានធ្លាក់ទៅក្នុងតែគណបក្សប្រពៃណីចំនួនពីរដែលផ្លាស់ប្តូរគ្នាគ្រប់គ្រងតាំងពីឆ្នាំ ១៩៤៨ ដល់ឆ្នាំ ២០១៤ គឺគណបក្សរំដោះជាតិ និងគណបក្សឯកភាពសង្គមគ្រឹស្តសាសនា។
ជាប់ឆ្នោតសម្រាប់កាន់តំណែងចំនួន ៤ឆ្នាំ លោកកាឡូស អាល់វ៉ារ៉ាដូមានកិច្ចការជាច្រើនដែលត្រូវធ្វើដោយរាប់ចាប់ពីការបង្រួបបង្រួមប្រទេសរហូតដល់ស្រោចស្រង់ឩនភាពថវិកាជាតិ និងប្រាក់បំណុលដែលមានយ៉ាងច្រើនសម្បើម។ កិច្ចការអាទិភាពបន្ទាប់ទៀត គឺកាត់បន្ថយភាពក្រីក្រ និងកាត់បន្ថយចំនួនអ្នកអត់ការងារធ្វើដែលមានអត្រា ៩,៣% នៃប្រជាជនសកម្ម។ លោកកាឡូស អាល់វ៉ារ៉ាដូនឹងចូលកាន់តំណែងផ្លូវការនៅថ្ងៃទី៨ ឧសភាខាងមុខ និងត្រូវធ្វើការជាមួយរដ្ឋាភិបាលចម្រុះមកពីគណបក្សច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ