ក្វាតេម៉ាឡា៖ស្លាប់មនុស្សយ៉ាងតិច ៧០នាក់ និងរបួសជាច្រើននាក់នៅក្នុងព្រឹត្តិការណ៍ផ្ទុះភ្នំភ្លើង
នៅក្នុងប្រទេសក្វាតេម៉ាឡា ព្រឹត្តិការណ៍ផ្ទុះភ្នំភ្លើងកាលពីថ្ងៃអាទិត្យ ទី៣ មិថុនាបានបណ្តាលឲ្យមានមនុស្សស្លាប់យ៉ាងតិច ៦៩នាក់ និងរបួសធ្ងន់ ស្រាលប្រមាណជា ៤៦នាក់។ ក្រៅពីស្លាប់ និងរបួស ព្រឹត្តិការណ៍ធម្មជាតិមួយនេះក៏បានបណ្តាលឲ្យមានអ្នកបាត់ខ្លួន និងបានបង្ខំឲ្យមានការជម្លៀសមនុស្សជាង ៤ ៥០០នាក់ជាបន្ទាន់ចេញពីតំបន់គ្រោះថ្នាក់ដែរ។ ថ្ងៃអង្គារ ទី៦ មិថុនា ក្រុមអ្នកជួយសង្រ្គោះកំពុងបន្តយុទ្ធនាការស្វែងរកអ្នកបាត់ខ្លួនក្នុងក្តីសង្ឃឹមរកឃើញអ្នករស់រានមានជីវិត។
ចុះផ្សាយនៅថ្ងៃ៖
ភ្នំភ្លើងដែលបានផ្ទុះក្នុងថ្ងៃអាទិត្យ ទី៣ មិថុនាក្នុងប្រទេសក្វាតេម៉ាឡាមានកម្ពស់ ៣ ៧៦៣ម៉ែត្រ និងស្ថិតប៉ែកនិរតីមានចម្ងាយប្រមាណជា ៣៥គីឡូម៉ែត្រពីទីក្រុងក្វាតេម៉ាឡា។ ព្រឹត្តិការណ៌ធម្មជាតិមួយនេះបានកើតឡើងតែមួយប៉ប្រិចភ្នែកដោយបានធ្វើឲ្យអ្នករស់នៅក្បែរភ្នំភ្លើង និងក្នុងតំបន់ក្បែរខាងមានការភ្ញាក់ផ្អើលយ៉ាងខ្លាំង។ តុល្យការចុងក្រោយបណ្តោះអាសន្នឲ្យដឹងថា មានមនុស្សស្លាប់យ៉ាងតិច ៦៩នាក់ ក្នុងនោះមាន ១៧នាក់ទើបរកឃើញអត្តសញ្ញាណ និងមានរបួសប្រមាណជា ៤៦នាក់ផ្សេងទៀត ក្នុងនោះមានពាក់កណ្តាលស្ថិតក្នុងសភាពធ្ងន់ធ្ងរ។
ក្រៅពីស្លាប់ និងរបួស នៅមានមនុស្សបាត់ខ្លួនជាច្រើននាក់ផ្សេងទៀតដោយរដ្ឋអំណាចនៅមិនទាន់អាចបញ្ជាក់ពីចំនួនបានទេនាពេលនេះ។ ដោយឡែក មានអ្នកស្រុក អ្នកភូមិរស់ក្បែរភ្នំភ្លើងជាង ៤ ៥០០នាក់ត្រូវបានគេជម្លៀសចេញជាបន្ទាន់ភ្លាមៗទៅដាក់នៅកន្លែងមានសុវត្ថិភាព។ ពេញមួយថ្ងៃអាទិត្យ ទី៣ មិថុនា រូបភាពនៃការផ្ទុះភ្នំភ្លើងថ្ងៃទី១ ត្រូវបានចាក់បញ្ចាំងនៅក្នុងកាណាល់ទូរទស្សន៍ក្នុងស្រុក និងតាមបណ្តាញសង្គម Facebook។ តាមរយៈរូបភាពនោះ គេសង្កេតឃើញផ្សែងខ្មួលខ្មាញ់បាញ់ឡើងលើ និងកំអែរភ្នំភ្លើងហូរទៅគ្របលើលំនៅដ្ឋានប្រជាជន ស្រែចម្ការ ព្រៃឈើ រួមទាំងមនុស្ស និងសត្វគ្រប់ប្រភេទជាច្រើនទៀតផង។
នាយកការិយាល័យគ្រប់គ្រងគ្រោះមហន្តរាយបានបញ្ជាក់ថា អ្នកស្លាប់ភាគច្រើនបានជាប់កុនរត់គេចមិនទាន់នឹងវត្តមានកំអែរភ្នំភ្លើងដែលហូរធ្លាក់ក្នុងល្បឿនយ៉ាងលឿន។ ខណៈនេះ ភ្នំភ្លើងនោះលែងមានសកម្មភាពហើយ បន្ទាប់ពីបានបញ្ចេញសកម្មភាពរយៈពេលជាង ១៦ម៉ោង តែការភ្ញាក់ជាថ្មីអាចនឹងកើតឡើងគ្រប់ពេល។ តាមសេវាគាំពារស៊ីវិល មានមនុស្ស ១លាន ៧សែននាក់បានរងគ្រោះក្នុងកម្រិតស្រាល និងធ្ងន់ដោយគ្រោះមហន្តរាយធម្មជាតិមួយនេះ។ លោកប្រធានាធិបតីក្វាតេម៉ាឡាដែលបានទៅមើលកន្លែងកើតហេតុផ្ទាល់ភ្នែកនាថ្ងៃចន្ទ ទី៤ មិថុនាបានប្រកាសកាន់ទុក្ខជាតិរយៈពេល ៣ថ្ងៃ។ ចំណែកក្រុមប្រទេសផ្តល់ជំនួយបានសម្តែងសាមគ្គីភាព និងផ្តល់ការគាំទ្រចំពោះពលរដ្ឋក្វាតេម៉ាឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ