អាមេរិក៖លោក Harvey Weinstein បានបដិសេធការចោទប្រកាន់ក្នុងបទរំលោភ និងបំពានផ្លូវភេទ
នៅសហរដ្ឋអាមេរិក ផលិតករភាពយន្តនៅហូលីវូដលោក Harvey Weinstein បានច្រានចោលការចោទប្រកាន់លើលោកក្នុងបទរំលោភ និងបំពានផ្លូវភេទកាលពីថ្ងៃទី២៥ ឧសភា។ ការបដិសេធនេះត្រូវបានធ្វើឡើងក្នុងឱកាសបើកសវនាការនៅតុលាការទីក្រុង Manhattan នាថ្ងៃអង្គារ ទី៥ មិថុនា។ គួររម្លឹកជូនថា លោក Weinstein បានជាប់ចោទពីបទរំលោភផ្លូវភេទក្នុងឆ្នាំ ២០១៣ និងពីបទបំពារបំពានផ្លូវភេទក្នុងឆ្នាំ ២០០៤។
ចុះផ្សាយនៅថ្ងៃ៖
ស្តាប់ - ០២:១៧
មានអាយុ ៦៦ឆ្នាំ ផលិតករភាពយន្តអាមេរិកាំងនៅហូលីវូដដ៏មានឥទ្ធិពលរូបនេះបានជាប់ចោទតាំងពីការបំពារបំពានផ្លូវភេទរហូតដល់ការចាប់រំលោភស្រស់ៗតែម្តង។ លោក Harvey Weinstein បានទទួលបទចោទប្រកាន់ចំនួន ៣ ក្នុងនោះ មានមួយជាបទបំពានផ្លូវភេទ និងពីរជាបទរំលោភផ្លូវភេទ។ តាមធម្មតា និងក្នុងករណីដែលមានការកាត់ទោស ផលិតករភាពយន្តអាមេរិកាំងរូបនេះត្រូវដេកក្នុងគុករហូតដល់ទៅ ២៥ឆ្នាំ។ តែនៅក្នុងសវនាការនៅតុលាការទីក្រុង Manhattan នាថ្ងៃអង្គារ ទី៥ មិថុនា លោក Weinstein ដែលពាក់អាវធំ និងក្រវ៉ាត់ ក ពណ៌ក្រម៉ៅបានបដិសេធលើបទចោទប្រកាន់។
« គ្មានកំហុស » នេះជាចម្លើយខ្លីមួយម៉ាត់ក្នុងសម្លេងតិចៗរបស់លោក Weinstein ទៅកាន់ចៅក្រមដែលសួរថា តើលោកឆ្លើយយ៉ាងម៉េចចំពោះបទចោទប្រកាន់លើលោក។ បន្ទាប់មក លោក Weinstein បានឆ្លើយ « បាទ » ច្រើនដងនៅពេលដែលចៅក្រមបានរម្លឹកប្រាប់គាត់ពីលក្ខខណ្ឌនៃការទុកឲ្យគាត់មានសេរីភាពស្ថិតក្នុងការតាមដាន។ តាមពិតទៅ គឺមេធាវីរបស់គាត់គឺលោក Benjamin Brafman ទេដែលបាននិយាយច្រើននៅក្នុងសវនាការ។ ចំណែកស្រ្តីដែលបានចោទលោក Weinstein ពីបទចាប់រំលោភមិនត្រូវបានគេប្រាប់អត្តសញ្ញាណទេ តែលោក Brafman បានបញ្ជាក់ថា ស្រ្តីរូបនោះបានមានទំនាក់ទំនងផ្លូវភេទស្រុះស្រួលគ្នាជាមួយលោក Weinstein រយៈពេល ១០ឆ្នាំ។
រីឯដែលស្រ្តីដែលបានចោទលោក Weinstein ពីបទបំពានផ្លូវភេទមានឈ្មោះ Lucia Evans។ គួររម្លឹកជូនថា តាំងពីមានផ្ទុះរឿងអាស្រូវផ្លូវភេទប្រឆាំងលោក Weinstein ក្នុងខែតុលា ឆ្នាំ ២០១៧ មក លោក Weinstein តាមរយៈសម្តីរបស់ក្រុមមេធាវីរបស់លោកតែងបដិសេធលើគ្រប់ការចោទប្រកាន់ផ្លូវភេទដែលគ្មានការស្រុះស្រួល។ ខណៈនេះ និងក្រោយពីបានតម្កល់លុយចំនួន ១លានដុល្លារមក លោក Weinstein បន្តមានសេរីភាពក្រោមការតាមដានដោយពាក់កងដៃអេឡិចត្រូនិក និងរឹតត្បិតក្នុងការធ្វើដំណើរ។
យ៉ាងណាក៏ដោយ ក្រុមអ្នកជំនាញបានមើលឃើញថា លោក Weinstein ចៀសមិនរួចពីការសារភាពកំហុសរបស់ខ្លួននៅថ្ងៃណាមួយដើម្បីទទួលបានការសម្រាលទោស ប្រសិនបើក្រុមមេធាវីរបស់គាត់យល់ថាមិនអាចទទួលជ័យជំនះនៅក្នុងរឿងក្តីក្តាំមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ