ប៉េរូ រឹតបន្តឹងដំណើរហូរចូលរបស់ជនអន្តោប្រវេសន៍វ៉េណេស៊ុយអេឡា
រដ្ឋាភិបាលប៉េរូ បានចាប់រឹតបន្តឹងលើដំណើរហូរចូលរបស់ជនអន្តោប្រវេសន៍មកពីប្រទេសវ៉េណេស៊ុយអេឡា។ ចាប់ពីថ្ងៃសៅរ៍ម្សិលមិញនេះតទៅ ប្រជាជនវ៉េណេស៊ុយអេឡាដែលចង់ធ្វើដំណើរចូលទៅស្នាក់នៅ ប្រទេសប៉េរូ ត្រូវមានលិខិតឆ្លងដែន គឺមិនមែនមានត្រឹមប័ណ្ណសំគាល់ខ្លួនដូចមុននោះទេ។ នៅប៉ុន្មានសប្តាហ៍មកនេះ ប្រជាជនវ៉េណេស៊ុយអេឡារាប់ម៉ឺននាក់ ចាកចេញពីប្រទេស ភ្លូកទឹក ភ្លូកដី ដើម្បី រត់គេចចេញពីវិបត្តិសេដ្ឋកិច្ច និងអស្ថិរភាពនយោបាយនៅក្នុងប្រទេស។ នៅវ៉េណេស៊ុយអេឡារដ្ឋាភិបាលសង្គមនិយម ទើបបានបង្កើតក្រដាសប្រាក់ថ្មី សម្រាប់ទប់ទល់បញ្ហាអតិផរណា ដែលមានដល់ទៅ ១លានភាគរយ។
ចុះផ្សាយនៅថ្ងៃ៖
នៅប្រទេសដែលមានសេដ្ឋកិច្ចដ៏ទាក់ទាញ ដូចជាប៉េរូ ប្រជាជនវ៉េណេស៊ុយអេឡាធ្លាប់តែបង្ហាញប័ណ្ណសំគាល់ខ្លួន គឺជាការស្រេច ដើម្បីអាចស្នាក់នៅ ស្របច្បាប់។ ប៉ុន្តែ ចាប់ពីថ្ងៃសៅរ៍ម្សិលមិញ អាជ្ញាធរប៉េរូ ដែលកំពុងប្រឈមនឹងការហូរចូលដ៏គំហុកនៃជនអន្តោប្រវេសន៍វ៉េណេស៊ុយអេឡាបានដាក់លក្ខខណ្ឌថ្មី ដោយតម្រូវឲ្យប្រជាជនវ៉េណេស៊ុយអេឡាត្រូវតែមានលិខិតឆ្លងដែន ដើម្បីអាចធ្វើដំណើរចូលទឹកដីប៉េរូ។
សម្រាប់ប្រជាជនវ៉េណេស៊ុយអេឡា ដែលបានធ្វើដំណើរមកជាប់គាំងនៅព្រំដែនប៉េរូ និងអេក្វាទ័រ រួចហើយ អាជ្ញាធរប៉េរូ នឹងបើកទ្វារទទួល បើសិនជនជាតិវ៉េណេស៊ុយអេឡាទាំងនោះ ដាក់ពាក្យសុំជ្រកកោន ក្នុងនាមជាជនភៀសខ្លួន។
មុនទៅដល់ព្រំដែនប៉េរូ ប្រជាជនវ៉េណេស៊ុយអេឡាជាច្រើនពាន់នាក់បានធ្វើដំណើរឆ្លងកាត់កូឡុំប៊ី និងប្រទេសអេក្វាទ័រទាំងមូល។ ដើម្បីធ្វើដំណើរទៅដល់ព្រំដែនអេក្វាទ័រ និងប៉េរូ ពួកគេបានទទួលជំនួយពីរដ្ឋាភិបាលអេក្វាទ័រ ដែលបានផ្តល់សេវាដឹកជញ្ជូន ឥតគិតថ្លៃ សម្រាប់ជនអន្តោប្រវេសន៍វ៉េណេស៊ុយអេឡាណាដែលចង់ធ្វើដំណើរទៅរស់នៅប្រទេសប៉េរូ។
ជាមួយនឹងចំនួនហូរចូលជនជាតិវ៉េណេស៊ុយអេឡាពី ២ពាន់ ទៅ ៣ពាន់ក្នុងមួយថ្ងៃ ទីភ្នាក់ងារអន្តោប្រវេសន៍របស់ប៉េរូ វាយតម្លៃថា នៅប៉ុន្មានសប្តាហ៍ខាងមុខ ប៉េរូ នឹងមានជនភៀសខ្លួន វ៉េណេស៊ុយអេឡាជាង ១សែននាក់។ ចំនួននេះនឹងធ្វើឲ្យប៉េរូរាប់ឃើញមានជនភៀសខ្លួនវ៉េណេស៊ុយអេឡា ដល់ទៅ កន្លះលាននាក់។
នៅចំណែករដ្ឋាភិបាលសង្គមនិយមរបស់លោកនីកូឡា ម៉ាឌូរ៉ូ គេបានអះអាងថា ជនជាតិវ៉េណេស៊ុយអេឡានឹងធ្វើដំណើរត្រលប់ចូលប្រទេសវិញ នៅពេលឆាប់ៗខាងមុខ នៅពេលពួកគេឃើញលទ្ធផលនៃកំណែទម្រង់សេដ្ឋកិច្ចរបស់រដ្ឋាភិបាល។
តាមអង្គការសហប្រជាជាតិ នៅក្នុងចំណោមជនជាតិវ៉េណេស៊ុយអេឡា ជាង ២លាននាក់ដែលរស់នៅបរទេស មាន១លាន ៦សែននាក់ បានចាកចេញ ពីប្រទេស គិតត្រឹមតាំងពីឆ្នាំ ២០១៥។ ឆ្នាំដែលវ៉េណេស៊ុយអេឡា ជួបប្រឈមខ្លាំងនឹងវិបត្តិសេដ្ឋកិច្ចនិងនយោបាយ។ ប្រឈមនឹងវិបត្តិអន្តោប្រវេសន៍ វ៉េណេស៊ុយអេឡា ដែលគេបានប្រៀបប្រដូចថា ធ្ងន់ធ្ងរដូចវិបត្តិជនអន្តោប្រវេសន៍នៅសមុទ្រមេឌីទែរ៉ាណេ អង្គការសហប្រជាជាតិបានប្រកាសថា នឹងបង្កើតយន្តការដោះស្រាយវិបត្តិថ្នាក់តំបន់។ នេះបើតាមអ្នកនាំពាក្យរបស់អគ្គលេខាធិការអង្គការសហប្រជាជាតិ កាលពីថ្ងៃសុក្រ។ ប្រទេសអេក្វាទ័រវិញបានកោះអញ្ជើញរដ្ឋមន្រ្តីការបរទេសរបស់ប្រទេសទាំង១៣ នៅក្នុងតំបន់ ឲ្យជួបប្រជុំដើម្បីនិយាយ ពីបញ្ហាអន្តោប្រវេសន៍វ៉េណេស៊ុយអេឡា នៅពាក់កណ្តាលខែកញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ