សហរដ្ឋអាមេរិក ៖ ក្រុមអ្នកប្រឆាំងលោកត្រាំទទួលកញ្ចប់បញ្ញើមានជាតិផ្ទុះ
កញ្ចប់បញ្ញើមានផ្ទុកជាតិផ្ទុះ ឬជាគ្រាប់បែកច្នៃ ត្រូវបានគេរកឃើញជាបន្តបន្ទាប់នៅថ្ងៃពុធទី ២៤តុលាម្សិលមិញ។ ជាកញ្ចប់ផ្ញើបញ្ជូនទៅផ្ទះអតីតប្រធានាធិបតីអាមេរិក លោក បារ៉ាក់ អូបាម៉ា លោកប៊ីលគ្លីនតុន ព្រមទាំងឥស្សរជនគ្រាក់ៗនៃបក្សប្រជាធិបតេយ្យជាច្រើនរូបផ្សេងទៀត និងស្ថានីយ៍ទូរទស្សន៍CNN រហូតដល់មានការជម្លៀសអាសន្នបន្ទាន់ ពេលកំពុងផ្សាយព័ត៌មានផ្ទាល់ផង។ គ្មានកញ្ចប់ណាមួយត្រូវបានផ្ទុះ និងបង្កឱ្យមានជនរងគ្រោះទេ។ គេនៅមិនទាន់ដឹងថាតើនរណាជាអ្នករៀបចំប្រតិបត្តិការមួយខ្សែនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
យុទ្ធនាការឃោសនាបោះឆ្នោតសភាពាក់កណ្តាលអាណត្តិនៅសហរដ្ឋអាមេរិក កំពុងស្គាល់របត់ថ្មី នៅថ្ងៃពុធទី ២៤ តុលា ម្សិលមិញ ដោយហេតុតែរកឃើញមានកញ្ចប់បញ្ញើ មានជាតិផ្ទុះ ជាច្រើនផ្ញើទៅឥស្សរជននយោបាយសំខាន់ៗ នៃបក្សប្រជាធិបតេយ្យ។
កញ្ចប់បញ្ញើមានអស័យដ្ឋានផ្ទះអតីតប្រធានាធិបតីអាមេរិក លោក ប៊ីលគ្លីនតុន និងនិងភរិយា លោកស្រី ហ៊ីឡារី គ្លីនតុន (បេក្ខនារីប្រធានាធិបតីឆ្នាំ២០១៦) ត្រូវបានរកឃើញនៅល្ងាចថ្ងៃអង្គារ។ ព្រឹកឡើងថ្ងៃពុធ កញ្ចប់មួយទៀតផ្ញើជូនទៅអតីតប្រធានាធិបតី អូបាម៉ា ត្រូវបានវែកចាប់បាន ព្រោះរាល់គ្រប់បញ្ញើទៅអតីតប្រធានាធិបតីអាមេរិកត្រូវឆ្លងកាត់ការត្រួតពិនិត្យជាស្វ័យប្រវត្តិ មុននឹងប្រគល់ជូនម្ចាស់។
បន្ទាប់មកគេឃើញមាន កញ្ចប់បញ្ញើជាប់សង្ស័យស្រដៀងគ្នាផ្សេងទៀត ត្រូវបានផ្ញើទៅឱ្យសមាជិកសភានៃបក្សប្រជាធិបតេយ្យលោកស្រី Debbie Wasserman Schultz និង Maxime Waters ដែលធ្លាប់រិះគន់ខ្លាំងៗលោកដូណាល់ ត្រាំ និងមានជំហរចង់ទម្លាក់លោកត្រាំចេញពីតំណែងផង។
អតីតនាយកទីភ្នាក់ងារចារកិច្ចអាមេរិកCIAម្នាក់ John Brennan ដែលរិះគន់លោកត្រាំខ្លាំងៗដែរ និងដែលលោកប្រធានាធិបតីបានដកពីតំណែងបាត់ទៅហើយ ក៏មានឈ្មោះដែរ តែកញ្ចប់បញ្ញើមានជាតិផ្ទុះ បានផ្ញើទៅដល់ទីស្នាក់ការទូរទស្សន៍CNN ជាហេតុធ្វើឱ្យមានឆោឡោជម្លៀសអាសន្នភ្លាម។
កាលពីថ្ងៃអង្គារ កញ្ចប់គ្រាប់បែកច្នៃដំបូងគេបំផុត ផ្ញើទៅដល់ផ្ទះមហាសេដ្ឋី George Soros នៅញូវយ៉ក។ មានដើមកំណើតហុងគ្រី លោកជាផ្ទាំងស្ទីបនៃការវាយប្រហារពីសំណាក់ក្រុមអ្នកជាតិនិយមជ្រុលនៅអឺរ៉ុបនិងនៅអាមេរិក ព្រោះលោកក៏ធ្វើយុទ្ធនាការប្រឆាំងខ្លាំងនឹងក្រុមអ្នកសាធារណរដ្ឋដែរ។
ការរកឃើញកញ្ចប់គ្រាប់បែកជាបន្តបន្ទាប់នេះ បានបង្កឱ្យមានការប្រកាសអាសន្នជាច្រើនកន្លែងក្នុងផ្ទៃសហរដ្ឋ។ ប៉ុន្តែដំណឹងនេះហាក់ដូចជាមិនសូវបង្កការភ្ញាក់ផ្អើលខ្លាំង ផុសផុលនៅក្នុងប្រព័ន្ធឃោសនាព័ត៌មាន និងប្រព័ន្ធសង្គមទេ។
សេចក្តីថ្លែងការណ៍ និងប្រតិកម្មជាច្រើនពីសំណាក់អ្នកប្រជាធិបតេយ្យ មានទាំងអភិបាលក្រុងញូវយ៉កម្នាក់ផង នាំគ្នា បន្ទោសលោកដូណាល់ត្រាំថាបានរួមចំណែកឱ្យមានការស្អប់ខ្ពើម និងហិង្សាក្នុងប្រទេស។ “លោកប្រធានាធិបតីគួរតែយល់អំពីភាពធ្ងន់ធ្ងរនៃការប្រើពាក្យសំដីវាយប្រហារសារព័ត៌មានឥតដាច់” ទើបមានផលវិបាកដល់ថ្ងៃនេះ។ នេះជាប្រតិកម្មរបស់ប្រធានCNN។ ប៉ុន្តែសម្រាប់ក្រុមអ្នកអភិរក្សនិយម នេះគ្រាន់តែផែនការរៀបចំឡើងដើម្បីបង្ខូចរូបភាពប្រធានាធិបតីត្រាំ និងបង្វែរចំណាប់អារម្មណ៍សាធារណៈមតិពីលទ្ធផលសេដ្ឋកិច្ចល្អ និងការឈ្លានពានរបស់អន្តោប្រវេសន៍។ ចំណែក លោកត្រាំ ជាមួយពាក្យថ្កោលទោសទង្វើផ្ញើកញ្ចប់មានជាតិផ្ទុះ បានប្តូរសំឡេង និងទម្លាប់បែបវាយប្រហារមកជាសេចក្តីអំពាវនាវឱ្យមានរួបរួមជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ