អាមេរិក៖លោកដូណាល់ ត្រាំចង់រឹតបន្តឹងលក្ខខណ្ឌសុំសិទ្ធិជ្រកកោនរបស់ជនអន្តោប្រវេសន៍ខុសច្បាប់
នៅអាមេរិក រដ្ឋបាលរបស់លោកដូណាល់ ត្រាំបានប្រកាសឲ្យដឹងពីការចង់រឹតបន្តឹងលក្ខខណ្ឌសុំសិទ្ធិជ្រកកោនរបស់ជនអន្តោប្រវេសន៍ដែលបានចូលទឹកដីអាមេរិកដោយខុសច្បាប់។ ជាមួយនឹងលក្ខខណ្ឌថ្មី អន្តោប្រវេសន៍ដែលបានចូលទឹកដីអាមេរិកដោយខុសច្បាប់នឹងមិនអាចសុំសិទ្ធិជ្រកកោននយោបាយទេ។ អ្វីដែលលោកត្រាំចង់បាន គឺការកែប្រែច្បាប់អន្តោប្រវេសន៍ឆ្នាំ ១៩៧៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
រហូតមកដល់ពេលនេះ ច្បាប់អាមេរិកក្នុងឆ្នាំ ១៩៧៥ បានអនុញ្ញាតឲ្យជនអន្តោប្រវេសន៍គ្រប់រូបមានសិទ្ធិដាក់ពាក្យសុំសិទ្ធិជ្រកកោននយោបាយ ទោះបីជាពួកគេបានឆ្លងដែនពីប្រទេសម៉ិចស៊ិកចូលក្នុងទឹកដីអាមេរិកតាមច្រកផ្លូវការ ឬមួយលួចឆ្លងចូលដោយខុសច្បាប់ក៏ដោយ។ តែជាមួយនឹងច្បាប់ដែលលោកដូណាល់ ត្រាំចង់បានពេលនេះ គឺមានតែជនអន្តោប្រវេសន៍ដែលឆ្លងដែនចូលក្នុងទឹកដីអាមេរិកតាមច្រកផ្លូវការទេទើបអាចសុំសិទ្ធិជ្រកកោននយោបាយបាន។ ក្រសួងសន្តិសុខផ្ទៃក្នុងអាមេរិកបានប្រកាសឲ្យដឹងនាថ្ងៃព្រហស្បតិ៍ ទី៨ វិច្ឆិកាថា ច្បាប់សុំសិទ្ធិជ្រកកោនបច្ចុប្បន្នបានធ្វើឲ្យអាមេរិកទទួលពាក្យសុំសិទ្ធិជ្រកកោនច្រើនជ្រុល និងដែលមានពាក្យសុំសិទ្ធិជ្រកកោនខ្លះគ្មានហេតុផល និងភស្តុតាងត្រឹមត្រូវទេ។
តាមក្រសួងសន្តិសុខផ្ទៃអាមេរិកដដែល ច្បាប់សុំសិទ្ធិជ្រកកោនបច្ចុប្បន្នក៏បានរារាំងអាមេរិកក្នុងការពិនិត្យ និងសម្រេចភ្លាមៗលើករណីបន្ទាន់ចំពោះអ្នកដែលមានលក្ខខណ្ឌគ្រប់គ្រាន់ និងត្រឹមត្រូវក្នុងទទួលបានសិទ្ធិជ្រកកោននយោបាយ។ ផ្អែកតាមតួលេខរបស់រដ្ឋបាលអាមេរិក ចំនួនអ្នកដាក់ពាក្យសុំសិទ្ធិជ្រកកោននយោបាយក្នុងរយៈពេល ៥ឆ្នាំចុងក្រោយនេះបានកើនចំនួន ២ ០០០%។ ក្នុងនោះ មានតែ ១០% ប៉ុណ្ណោះដែលទទួលបានការយល់ព្រម និងមាន ៧០០ ០០០ករណីទៀតកំពុងស្ថិតក្នុងការពិនិត្យ។
យ៉ាងណាក៏ដោយ មានក្រុមអង្គការការពារសេរីភាពជាច្រើន ពិសេសអង្គការ ACLU ដ៏មានឥទ្ធិពលបានចោទសួរពីភាពស្របច្បាប់នៃការរឹតបន្តឹងសិទ្ធសុំជ្រកកោន។ អ្វីដែលក្រុមអង្គការការពារសេរីភាពប្រផ្នូលទុក គឺការប្រទាញប្រទង់ក្នុងផ្លូវតុលាការជាថ្មីនៅជុំវិញនយោបាយប្រឆាំងអន្តោប្រវេសន៍របស់លោកដូណាល់ ត្រាំ។ តែទីក្រុងវ៉ាស៊ីនតោនបានបញ្ជាក់ដោយគ្មានមន្ទិលសង្ស័យថា ច្បាប់ថ្មីអនុញ្ញាតឲ្យប្រធានាធិបតីរឹតបន្តឹងលំហូរអន្តោប្រវេសន៍ចូលក្នុងទឹកដីអាមេរិក ប្រសិនបើសន្តិសុខជាតិបានទទួលការគំរាមកំហែងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ