លោករ៉ូប៊ែរ ម៉ាល់ឡី៖វ៉េណេស៊ុយអេឡាអាចឆ្លងផុតវិបត្តិដោយសន្តិវិធី ឬអាចធ្លាក់ក្នុងគ្រោះមហន្តរាយមនុស្សធម៌ធ្ងន់ធ្ងរ
នៅថ្ងៃសុក្រ ទី១៥ កុម្ភៈ សន្និសីទអន្តរជាតិស្តីពីជំនួយមនុស្សធម៌សម្រាប់ប្រទេសវ៉េណេស៊ុយអេឡារៀបចំនៅទីស្នាក់ការរបស់អង្គការនៃក្រុមរដ្ឋអាមេរិក។ សន្និសីទអន្តរជាតិមួយនេះបើកធ្វើឡើង ចំពេលដែលប្រធានាធិបតីស្តីទីប្រកាសខ្លួនឯងលោកហ័ន ហ្កាយដូបានប្រកាសថា ជំនួយមនុស្សធម៌បន្ទាន់មកពីសហរដ្ឋអាមេរិកនឹងចូលដល់ដីវ៉េណេស៊ុយអេឡានៅថ្ងៃទី២៣ កុម្ភៈខាងមុខ ទោះបីជាមានការរារាំងពីលោកប្រធានាធិបតីម៉ាឌូរ៉ូក៏ដោយ។ គ្រប់គ្នាកំពុងរងចាំមើលថា តើក្រុមយោធាដែលគាំទ្រលោកម៉ាឌូរ៉ូនឹងសុខចិត្តឲ្យជំនួយរបស់សហរដ្ឋអាមេរិកចូលដែរ ឬទេ។ យ៉ាងណាក៏ដោយ និងអ្វីដែលលោកហ្កាយដូកំពុងព្យាយាមពេលនេះ គឺអូសទាញក្រុមយោធាឲ្យមកនៅខាងខ្លួនវិញ។ លោករ៉ូប៊ែរ ម៉ាល់ឡី ប្រធានអង្គការ International Crisis Group បានយល់ឃើញថា យុទ្ធសាស្រ្តរបស់លោកហ្កាយដូអាចហុចលទ្ធផលពីរ ឬមួយវ៉េណេស៊ុយអេឡាអាចឆ្លងផុតវិបត្តិដោយសន្តិវិធី ឬមួយអាចធ្លាក់ក្នុងគ្រោះមហន្តរាយមនុស្សធម៌ធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០១:៥៦
« ខ្ញុំយល់ថាយុទ្ធសាស្រ្តមួយនេះអាចនឹងដំណើរការ ព្រោះវាក៏ជាយុទ្ធសាស្រ្តរបស់សហរដ្ឋអាមេរិក និងរបស់បណ្តាប្រទេសមួយចំនួនដែរ។ គឺជាយុទ្ធសាស្រ្តដែលសំដៅដាក់គំនាបកាន់តែខ្លាំងលើរបបដឹកនាំរបស់ប្រធានាធិបតីម៉ាឌូរ៉ូ និងព្យាយាមធ្វើយ៉ាងណាដើម្បីអូសទាញក្រុមសម្ព័ន្ធមិត្ត និងមនុស្សជំនិតរបស់លោកម៉ាឌូរ៉ូ ពិសេសនៅក្នុងជួរកងទ័ពឲ្យបែរក្បាលប្រឆាំងនឹងលោកម៉ាឌូរ៉ូវិញ។
នៅក្នុងករណីណាដែលកងទ័ពផ្តាច់ខ្លួនឈប់គាំទ្រលោកម៉ាឌូរ៉ូ ហើយវិលទៅគាំទ្រលោកហ្កាយដូវិញ នោះវ៉េណេស៊ុយអេឡាអាចនឹងស្គាល់ការផ្លាស់ប្តូរមួយ ឬអាចនិយាយថាសម័យអន្តរកាលមួយដោយសន្តិវិធី។ ពេលនោះ លោកហ្កាយដូដែលបានប្រកាសខ្លួនឯងជាប្រធានាធិបតីស្តីទីនឹងក្លាយជាប្រធានាធិបតីជំនួសកន្លែងលោកម៉ាឌូរ៉ូរហូតដល់ថ្ងៃរៀបចំបោះឆ្នោតថ្មី។
នេះជាសេណារីយ៉ូដ៏ល្អដោយផ្អែកលើយុទ្ធសាស្រ្តខាងលើ។ ក៏ប៉ុន្តែ យុទ្ធសាស្រ្តមួយនេះក៏អាចជាយុទ្ធសាស្រ្តហានិភ័យដែរ ព្រោះវាក៏អាចនឹងកើតមានរឿងរ៉ាវអាក្រក់ជាច្រើនដែលគេមិនបានរង់ចាំ។ ខណៈនេះ អ្វីដែលយើងបានមើលឃើញ ហើយបានជួបពិភាក្សាជាមួយក្រុមសមាជិករបស់គណបក្សប្រឆាំងក៏ជាក្រុមសមាជិករបស់គណបក្សកាន់អំណាចក្នុងទីក្រុងការ៉ាកាស់មក យើងមិនបានមើលឃើញយុទ្ធសាស្រ្តទី២ ទេ ពោលមានយុទ្ធសាស្រ្តទី១ មួយនេះតែមួយគត់។
ខ្ញុំចង់និយាយថា យុទ្ធសាស្រ្តទី១ មួយនេះអាចនឹងនាំវ៉េណេស៊ុយអេឡាចូលក្នុងសម័យអន្តរកាលដោយសន្តិវិធី ឬមួយក៏នាំវ៉េណេស៊ុយអេឡាឲ្យធ្លាក់ក្នុងគ្រោះមហន្តរាយមនុស្សធម៌ធ្ងន់ធ្ងរ។ លោកម៉ាឌូរ៉ូមិនព្រមចុះចេញពីអំណាច ហើយនឹងមានប្រជាជនវ៉េណេស៊ុយអេឡានាំគ្នាភៀសខ្លួនចេញពីស្រុកកំណើតកាន់តែច្រើនជាងពេលកន្លងមកទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ