រដ្ឋអាជ្ញា Mueller នឹងផ្តល់សក្ខីកម្មជាសាធារណៈ ជុំវិញការអង្កេតសំណុំរឿងរុស្ស៊ីជ្រៀតជ្រែកអាមេរិក
ក្រោយពីបានបិទបញ្ចប់ការអង្កេត និងចេញរបាយការណ៍កាលពីថ្ងៃ១៩មេសា មិនដាក់បន្ទុកលើលោក ប្រធានាធិបតីអាមេរិកដូណាល់ត្រាំមក អតីតរដ្ឋអាជ្ញាពិសេស Robert Mueller ដែលជាអ្នកដឹកនាំអង្កេត រយៈពេលជិតពីរឆ្នាំ សំណុំរឿងសង្ស័យរុស្ស៊ីចូលជ្រៀតជ្រែកក្នុងការបោះឆ្នោតប្រធានាធិបតីអាមេរិក ឆ្នាំ២០១៦ នឹងផ្តល់សក្ខីកម្មជាសាធារណៈ នៅចំពោះមុខសភា នាថ្ងៃទី ១៧ កក្កដា ២០១៩ ខាងមុខ។ នេះបើតាមសេចក្តីប្រកាសរបស់ប្រធានគណៈកម្មការអង្កេតសភា។
ចុះផ្សាយនៅថ្ងៃ៖
ប្រធានគណៈកម្មការអង្កេតសភា ដែលជាអ្នកប្រជាធិបតេយ្យបានជូនដំណឹងដោយអំណរ ថាលោកអតីតរដ្ឋអាជ្ញា Mueller ព្រមផ្តល់សក្តីកម្ម នៅចំពោះមុខព្រឹទ្ធសភា ជាសាធារណៈ ។ប៉ុន្តែដំណឹងនេះទំនងជានឹងអាចធ្វើឱ្យលោក ដូណាល់ ត្រាំ ខឹងសម្បារខ្លាំង ! ព្រោះស្មានថាចេញរបាយការណ៍អង្កេតរួចហើយ សំណុំរឿងក៏ត្រូវបិទបញ្ចប់។ អ្នកសាធារណរដ្ឋ បាននាំគ្នារិះគន់ថាការអង្កេតបានចំណាយពេលអស់ជិតពីរឆ្នាំហើយនៅតែមិនគ្រប់គ្រាន់ទៀត អ្នកប្រជាធិបតេយ្យមិនមែនចង់ស្វែងរកការពិតទេ តែចង់បើកប្រតិបត្តិការទំនាក់ទំនង !
សូមបញ្ជាក់ថា កាលពីខែមេសា នៅក្នុងរបាយការណ៍កម្រាស់ជាង៤០០ទំព័រ លោក Mueller បានលម្អិតថា មានការទាក់ទងគ្នាច្រើនជាមួយរុស្ស៊ី ប៉ុន្តែគ្មានភស្តុតាង គ្រប់គ្រាន់បញ្ជាក់ថាក្រុមការងារឃោសនារបស់លោកដូណាល់ ត្រាំ សហការជាមួយរុស្ស៊ីទេ និងថាលោកត្រាំបានរារាំងដំណើរស៊ើបអង្កេតសំណុំរឿងនេះឡើយ ! ជាងមួយខែក្រោយមកទៀត ជាការគួរឱ្យភ្ញាក់ផ្អើល អតីតរដ្ឋអាជ្ញាពិសេសបានចេញមុខពន្យល់ជាលើកដំបូង ថារបាយការណ៍របស់លោក មិនមែនជាការលុបលាងរាល់ភាពសង្ស័យដែលមានលើលោកត្រាំទេ តែចង់ប្រាប់ថាមានតែសភាដែលមានអំណាចចោទប្រកាន់ប្រធានាធិបតីកំពុងកាន់អំណាច។ ជាអន្តរាគមន៍ដែលលោកMuellerសង្ឃឹមថានឹងអាចដកខ្លួនឱ្យផុតពីសំណុំរឿងអង្កេតរុស្ស៊ីនេះ ត្រឹមពេលនោះ។
ប៉ុន្តែសម្រាប់ប្រធានគណៈកម្មការសភា សក្ខីកម្មរបស់លោកMueller ជាការចាំបាច់ ! អាមេរិកត្រូវការស្តាប់ឮការអង្កេត និងសេចក្តីសន្និដ្ឋាន ដោយផ្ទាល់ចេញពីមាត់លោកអតីតរដ្ឋអាជ្ញាដែលប្រឹងធ្វើអង្កេតអស់រយៈពេលជិតពីរឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ