លោកត្រាំបញ្ចេញកំហឹងជាសាធារណៈ ប្រឆាំងនឹងការអង្កេតដើម្បីបើកនីតិវិធីទម្លាក់ប្រធានាធិបតី
នៅសហរដ្ឋអាមេរិក ការអង្កេតក្នុងក្របខ័ណ្ឌឈានទៅបើកនីតិវិធីទម្លាក់ប្រធានាធិបតីកំពុងដំណើរការ ... ក្រោមសម្ពាធ លោកប្រធានាធិបតី ដូណាល់ ត្រាំ ទំនងជាអស់អំណត់ ទប់ចិត្តខឹងលែងបាន ក៏បញ្ចេញកំហឹងជាសាធារណៈ។ ល្ងាចមិញ ក្នុងពេលទទួលស្វាគមន៍ប្រធានាធិបតី ហ្វាំងឡង់ នៅសេតវិមាន និងនៅក្នុងពេលធ្វើសន្និសីទកាសែតរួមគ្នា លោក ត្រាំ បានព្រលែងសំដីសាប់អ្នកប្រជាធិបតេយ្យ អ្នកទម្លាយការណ៍ និងបណ្តាញឃោសនាព័ត៌មាន ដោយពាក្យធ្ងន់ៗបំផុត ៖ សារព័ត៌មានពុករលួយ អ្នកតំណាងរាស្ត្រក្បត់ ...
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្នុងរយៈពេល១៧នាទី លោក ដូណាល់ ត្រាំ បានជះកំហឹង ដោយប្រើសំដីថ្លោសៗ ចោទប្រកាន់ប្រធានគណៈកម្មការសភាទទួលបន្ទុកអង្កេតមុនឈានដល់ការបើកនីតិវិធីទម្លាក់ប្រធានាធិបតី លោក Adam Schiff ថាជាជនក្បត់ និងហៅឈ្មោះថា Shifty Schiff មនុស្សមានល្បិច។ អ្នកទម្លាយព័ត៌មានដែលដើមចមនាំមានសភាបើកអង្កេត បានបំពុលហេតុការណ៍ អ្នកខ្សឹបព័ត៌មានសុទ្ធតែជាក្រុមឈ្លប បណ្តាញព័ត៌មានពុករលួយ និងជាសត្រូវរបស់ប្រជាជន ... នេះជាសុទ្ធសឹងជាពាក្យរបស់លោក ដូណាល់ ត្រាំ ពេលកំពុងទទួលប្រធានាធិបតីហ្វាំងឡង់ជាភ្ញៀវ នៅក្នុងការិយាល័យប្រមុខរដ្ឋនៅសេតវិមាន។
មិនអស់ចិត្ត នៅពេលធ្វើសន្និសីទកាសែតរួមគ្នាជាមួយសមភាគីហ្វាំងឡង់ ដែលហាក់រឹងខ្លួនខ្លាំង លោកត្រាំ ជះកំហឹងជាសាធារណៈបន្ទោសលោក Schiff ជាថ្មីទៀតថាជាអ្នកប្រឌិតរឿង ប្រឌិតពាក្យពេជន៍នៅចំពោះមុខសភា ជាជនឧក្រិដ្ឋ ជាទង្វើក្បត់ ត្រូវតែលាលែងចេញពីតំណែង ! លោកប្រធានាធិបតីបានរាលដាល ជេរដល់លោក ចូ បៃឌិន Jo Biden បេក្ខជនអ្នកប្រជាធិបតេយ្យដែលអាចជាគូប្រជែងរបស់លោកនៅក្នុងសម័យបោះឆ្នោតប្រធានាធិបតីអាមេរិកឆ្នាំ២០២០ផង ថាជនបោកប្រាស់ ប្រធានសភាលោកស្រី Nancy Pelosi ដែលជាអ្នកប្រធានាធិបតីដែរ ថាចែកចាយកិច្ចការដូចចែកនំ ...
ប៉ុន្តែក្រុមអ្នកប្រជាធិបតេយ្យ មិនចាញ់សម្លុតលោកត្រាំនេះទេ ! ប្រធានគណៈកម្មការអង្កេតសភា បានព្រមានតបវិញ ថា រាល់គ្រប់ការប៉ុនប៉ងពីសំណាក់ប្រធានាធិបតី ឬរដ្ឋមន្ត្រីការបរទេស ឬជនណាក៏ដោយ អ្នកអវត្តមានមិនចូលឆ្លើយ តាមការកោះហៅ និងក្នុងនាមជាសាក្សី នឹងត្រូវចាត់ទុកថាមានទោសពីបទរារាំងដំណើរការតុលាការ។ ប្រធានគណៈកម្មការអង្កេតបានថែមទាំងដាក់ឱសានវាទ ឱ្យ សេតវិមាន និងក្រសួងការបរទេស ផ្តល់គ្រប់ឯកសារដែលចង់បាន យ៉ាងយូរត្រឹមថ្ងៃ សុក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ