វ៉េណេស៊ុយអេឡា៖ចាប់ខ្លួនចៅហ្វាយក្រុងការ៉ាកាសពីបទប៉ុនប៉ងធ្វើរដ្ឋប្រហារ
នៅក្នុងប្រទេសវ៉េណេស៊ុយអេឡា មានការចាប់ខ្លួនមនុស្សខ្លំាងម្នាក់ទៀតរបស់គណបក្សប្រឆំាងគឺចៅហ្វាយក្រុងការ៉ាកាសលោក Antonio Ledezma ពីបទជាប់សង្ស័យរៀបចំរដ្ឋប្រហារទម្លាក់រដ្ឋាភិបាល។ ខណៈនេះ រូបលោក Antonio កំពុងឃុំទុកនៅទីស្នាក់ការរបស់ក្រសួងស៊ើបការណ៍សម្ងាត់ និងដែលព័ត៌មានចាប់ខ្លួនចៅក្រុងការ៉ាកាសរូបនេះទើបបានបញ្ជាក់ជាផ្លូវការពីលោកប្រធានាធិបតី Nicolas Maduro។ ទន្ទឹមគ្នានេះ លោក Maduro ក៏បានចោទអាមេរិកថាបានជួយគំាទ្រលោក Antonio នៅក្នុងការរៀបចំរដ្ឋប្រហារនៅវ៉េណេស៊ុយអេឡា។ តែអាមេរិកបានប្រកាសច្រានចោលភ្លាមៗនូវការចោទប្រកាន់របស់លោក Maduro។
ចុះផ្សាយនៅថ្ងៃ៖
ស្តាប់ - ០១:៤៨
យោងតាមភរិយារបស់លោក Antonio Ledezma ឲ្យដឹងថា មានកងកម្លំាងក្រសួងស៊ើបការណ៍សម្ងាត់ជាច្រើននាក់បាននំាគ្នាចូលចាប់ខ្លួនស្វាមីរបស់លោកស្រីនៅក្នុងសាលាក្រុងប្រហែលជាម៉ោង ៥ល្ងាចម៉ោងក្នុងប្រទេសវ៉េណេស៊ុយអេឡា។ លោកស្រីក៏បានបញ្ជាក់ផងដែរថា ស្វាមីរបស់លោកស្រីប្រហែលជាបានរងការវ៉ៃតប់យ៉ាងដំណំ មុននឹងត្រូវគេចាប់បញ្ចូលក្នុងឡានដឹកចេញបាត់ដោយមិនបានថ្លែងអ្វីមួយម៉ាត់សោះ។ បើយោងតាមសម្តីរបស់លោកប្រធានាធិបតី Nicolas Maduro ចៅហ្វាយក្រុងការ៉ាកាសត្រូវជាប់ចោទពីបទប្រឆំាងសន្តិភាព និងប្រឆំាងរដ្ឋធម្មនុញ្ញ។ ការអះអាងយ៉ាងដូចនេះត្រូវបានលោក Maduro ផ្អែកលើសេចក្តីជូនដំណឹងចុងក្រោយរបស់សាលាក្រុងការ៉ាកាសចុះហត្ថលេខាដោយលោក Antonio ដែលអំពាវនាវឲ្យមានកិច្ចព្រមព្រៀងមួយដើម្បីអន្តរកាល។
តាមពិតទៅ មនុស្សខ្លំាងរបស់គណបក្សប្រឆំាងដែលបានជាប់ឆ្នោតជាហ្វាយក្រុងការ៉ាកាសអាណត្តិទី២រូបនេះបានស្ថិតក្នុងសំណាញ់របស់រដ្ឋអំណាចតំាងពីមួយសប្តាហ៍មកហើយ។ នៅថ្ងៃព្រហស្បតិ៍ ទី១៩ កុម្ភៈ រូបលោកប្រធានាធីបតីបានបរិហារពីការប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលដែលរៀបចំដោយមន្រ្តីយោធាជើងអាកាសមួយក្រុម និងដែលលោក Antonio បានរួមគំនិតជាមួយ។ ទន្ទឹមគ្នានេះ លោកប្រមុខរដ្ឋវ៉េណេស៊ុយអេឡាក៏បានចោទអាមេរិកថាបានជួយគំាទ្រលោក Antonio នៅក្នុងការរៀបចំរដ្ឋប្រហារនោះ។ តែរដ្ឋបាលអាមេរិកំាងបានបញ្ចេញប្រតិកម្មភ្លាមៗ ដោយច្រានចោលការចោទប្រកាន់របស់លោក Maduro។ រីឯក្រុមគណបក្សប្រឆំាងក៏បានចេញមុខថ្កោលទោសលើទង្វើចាប់ខ្លួនលោក Antonio។
គួររម្លឹកជូនថា ការចាប់ខ្លួនលោក Antonio ពេលនេះបានធ្វើឡើង មួយឆ្នំាក្រោយការចាប់ខ្លួនមន្រ្តីប្រឆំាងម្នាក់ទៀតគឺលោក Leopoldo Lopez នាឱកាសបាតុកម្មរបស់សិស្ស និស្សិតកាលពីខែកុម្ភៈ ឆ្នំា ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ