ធនាគារកណ្តាលកាណាដាធ្វើអន្តរាគមន៍ដើម្បីប៉ះប៉ូវសេដ្ឋកិច្ចដែលធ្លាក់ចុះដោយសារប្រេងចុះថោក
កាលពីថ្ងៃពុធម្សិលមិញ ធនាគារកណ្តាលនៃប្រទេសកាណាដាបានបញ្ចុះអត្រាការប្រាក់គោល ពី១%មក ត្រឹម០,៧៥% ដែលនេះគឺជាការធ្លាក់ចុះយ៉ាងទាបជាងគេក្នុងរយៈពេល៤ឆ្នំាចុងក្រោយនេះ ដើម្បីប្រឈមនឹងហានិភ័យដែលអាចកើតមានចំពោះកំណើនសេដ្ឋកិច្ចកាណាដាបណ្តាលមកពីតម្លៃប្រេងចុះថោក។
ចុះផ្សាយនៅថ្ងៃ៖
ស្តាប់ - ០២:២៣
ការដាំក្បាលចុះនៃតម្លៃប្រេងនៅលើទីផ្សាអន្តរជាតិនឹងបណ្តាលឲ្យមានផលប៉ះពាល់យ៉ាងធ្ងន់ធ្ងរលើសេដ្ឋកិច្ចប្រទេសកាណាដា នេះបើតាមការព្យាករណ៍របស់ធនាគារកណ្តាលកាណាដា។ ដោយហេតុនេះហើយ ក្នុងគោលបំណងបន្ទូរបន្ថយផលប៉ះពាល់នេះ ទើបធនាគារកណ្តាបានសម្រេចចិត្តបញ្ចុះ អត្រាការប្រាក់គោល ដើម្បីផ្តល់ឥណទានដែលមានការប្រាក់ទាបទៅបណ្តាធនាគារផ្សេងៗ។ ព្រោះការធ្វើដូច្នេះនឹងជួយបង្កើននូវកំណើននៃការប្រើប្រាស់ និងជម្រុញការនាំចេញផលិតផលផ្សេងៗ ជាមួយនឹងដុល្លាកាណាដាដែលមានតម្លៃថោក។
ធនាគារកណ្តាលបានកែតម្រូវការព្យាករណ៍ពីកំណើនសេដ្ឋកិច្ចសម្រាប់ឆ្នាំ២០១៥ ពី ២,៤% មកត្រឹមតែ ២,១% ទាបជាងការព្យាករណ៍របស់មូលនិធិរូបិយវត្ថុអន្ដរជាតិ (FMI) ដែលបញ្ចុះកំណើននេះ មកត្រឹម តែ២,៣% ប៉ុណ្ណោះ។ ធនាគារកណ្តាលក៏បានបញ្ជាក់ផងដែរថា ការធ្លាក់ចុះដ៏គួរឲ្យកត់សម្គាល់នៃតម្លៃប្រេងនេះ ក៏នឹងមានផលអវិជ្ជមានលើអតិផរណាផងដែរ ដែលនឹងនាំឲ្យមានការធ្លាក់ថ្លៃនៃប្រាក់ដុល្លាកាណាដា។
ក៏ប៉ុន្តែ ធនាគារកណ្តាលបានរំពឹងទុកថា តម្លៃប្រេងនឹងស្ទុះងើបឡើងសន្សឹមៗមកវិញ ដោយព្យាករណ៍ថា តម្លៃប្រេងក្នុងមួយបារីលឬមួយធុងជាមធ្យមប្រចាំឆ្នាំនឹងស្មើនឹង៦០ដុល្លារ ពោលគឺជាព្យាករណ៍កំណើន យ៉ាងច្រើនបើប្រៀបទៅនឹងតម្លៃប្រេងនៅថ្ងៃពុធ ថ្លៃត្រឹម៤៧,៦០ដុល្លារប៉ណ្ណោះ តែវានឹងកើនឡើងវិញ ក្នុងរយៈពេលមធ្យមមួយខាងមុខ។ ក្រៅពីវិស័យថាមពលប្រេង ធនាគារកណ្តាលជឿជាក់ថា សេដ្ឋកិច្ចកាណាដានឹងអាច កេងចំណេញមកវិញ ពីកំណើននៃការនាំចេញ ពិសេសការនាំចេញទៅប្រទេសជិតខាងគឺសហរដ្ឋអាមេរិកដែលសេដ្ឋកិច្ចនឹងមាន ថាមពលបន្ថែមទៀត ទាំងការវិនិយោគអាជីវកម្ម ទាំងការប្រើប្រាស់ តាមរយៈទីផ្សារមានសន្ទុះរឹងមាំ បន្ថែមទៀតសម្រាប់ការងារ។
តែយ៉ាងណាក៏ដោយ ធនាគារកណ្តាលក៏មិនប្រាកដថា ផលប៉ះពាល់សេដ្ឋកិច្ចដោយសារការធ្លាក់ចុះនៃតម្លៃប្រេងនឹងអាចប៉ះប៉ូវមកវិញគ្រប់គ្រាន់ពីកត្តាផ្សេងៗទាំងនេះនោះទេ ព្រោះគេនៅមានភាពមិនច្បាស់លាស់ពីកម្រិតនៃការកាត់បន្ថយវិនិយោគក្នុងវិស័យប្រេងនៅឡើយ។ គួរកំណត់ចំណាំផងដែរថា តាមរបាយការណ៍កាលពីដើមសប្តាហ៍នេះរបស់សន្និសីទក្រុមប្រឹក្សាភិបាលនៃប្រទេសកាណាដា ការធ្លាក់ចុះនៃតម្លៃប្រេងនឹងធ្វើឲ្យកាណាដាខាតបង់ប្រាក់ក្នុងឆ្នាំនេះដល់ទៅជាង ៤ ៣០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ