អាហ្សង់ទីន៖គណបក្សប្រឆាំងឈ្នះឆ្នោតនាការបោះឆ្នោតប្រធានាធិបតី
នៅក្នុងប្រទេសអាហ្សង់ទីន បេក្ខជនសេរីនិយមរបស់គណបក្សប្រឆាំងលោក Mauricio Macri បានទទួលជោគជ័យប្រឈមនឹងបេក្ខជនរបស់គណបក្សកាន់អំណាចលោក Daniel Scioli នៅក្នុងការបោះឆ្នោតប្រធានាធិបតីជុំទី២ នាថ្ងៃអាទិត្យ ទី២២ វិច្ឆិកា។ ជោគជ័យរបស់លោក Macri បានបិទបញ្ចប់ការកាន់អំណាចរយៈពេល ១២ឆ្នំារបស់លោកស្រីប្រធានាធិបតី Cristina Kirchner។ ភ្លាមៗ លោក Daniel Scioli បានប្រកាសទទួលស្គាល់បរាជ័យរបស់ខ្លួនប្រឈមនឹងលោក Mauricio Macri។
ចុះផ្សាយនៅថ្ងៃ៖
ស្តាប់ - ០១:៥៦
ចប់ហើយសករាជនៃការកាន់អំណាចរយៈពេល ១២ឆ្នំារបស់លោកស្រីប្រធានាធិបតីអាហ្សង់ទីន Cristina Kirchner។ បន្ទាប់ពីរាប់សន្លឹកឆ្នោតបានជាង ៩០% មក លោក Mauricio Macri ដែលជាបេក្ខជនសេរីនិយមរបស់គណបក្សប្រឆាំង និងជាចៅក្រុង Buenos Aires មានអាយុ ៥៦ឆ្នំាទទួលបានសម្លេងគាំទ្រជាង ៥២% ទល់នឹងជិត ៤៨% របស់បេក្ខជនបក្សកាន់អំណាចលោក Daniel Scioli។ តែគេត្រូវរង់ចំារហូតដល់ថ្ងៃទី១០ ធ្នូទើបលោក Macri ចូលកាន់តំណែងបន្តពីលោកស្រី Kirchner។ លោកស្រី Kirchner ដែលបានកាន់តំណែងប្រធានាធិបតីអស់រយៈពេល ២អាណត្តិតំាងពីឆ្នំា ២០០៧ ត្រូវបានរដ្ឋធម្មនុញ្ញហាមលោកស្រីមិនឲ្យឈរឈ្មោះជាលើកទី៣។
ថ្លែងនៅចំពោះមុខក្រុមសកម្មជន លោក Mauricio Macri បានចាត់ទុកថ្ងៃជោគជ័យរបស់លោកថាជាថ្ងៃប្រវត្តិសាស្រ្តដែលនឹងផ្លាស់ប្តូរជីវភាពរស់នៅរបស់ប្រជាជនអាហ្សង់ទីនគ្រប់រូប។ ទន្ទឹមគ្នានេះ លោក Macri ក៏បានបញ្ជាក់ថា ជោគជ័យដែលពលរដ្ឋអាហ្សង់ទីនបានផ្តល់ឲ្យលោកពេលនេះមិនមែនជាជោគជ័យដើម្បីជាសងសឹក ឬមួយជាការជម្រះបញ្ជីជាមួយដៃគូនយោបាយណាម្នាក់ទេ។ គួរជម្រាបជូនថា អស់រយៈពេល ១២ឆ្នំាដែលអំណាចបានស្ថិតក្នុងដៃរបស់គណបក្សឆ្វេងនិយម តែឥឡូវនេះ ពលរដ្ឋអាហ្សង់ទីនបានសម្រេចប្រគល់អំណាចឲ្យគណបក្សស្តាំនិយមវិញម្តងដោយសង្ឃឹមថា ជីវភាពរស់នៅរបស់ពួកគេនឹងប្រសើរជាងសព្វថ្ងៃ។
នៅក្នុងយុទ្ធនាការឃោសនាបោះឆ្នោត លោក Mauricio Macri បានសន្យាបិទបញ្ចប់នយោបាយសេដ្ឋកិច្ចអាត្មានិយមអនុវត្តដោយរដ្ឋាភិបាលរបស់លោកស្រី Cristina Kirchner។ សូមជម្រាបជូនថា មានអាយុ ៥៦ឆ្នំា លោក Macri ជាកូនមហាសេដ្ឋីអ្នកជំនួញម្នាក់ដោយបានចូលប្រឡូកក្នុងឆាកនយោបាយអាហ្សង់ទីនក្នុងឆ្នំា ២០០៣ និងដែលកាន់តែមានឈ្មោះបោះសម្លេងខ្លាំងឡើងៗនាពេលដែលលោកបានជាប់ឆ្នោតក្លាយជាចៅហ្វាយក្រុង Buenos Aires ក្នុងឆ្នំា ២០០៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ