ភាពចម្រូងចម្រាសជុំវិញគម្រោងសាងសង់ព្រែកជីកនៅនីការ៉ាហ្កា
អស់រយៈពេលជាច្រើនខែមកហើយ ដែលចលនាតវ៉ាប្រឆាំង នឹងគម្រោងសាងសង់ព្រែកជីកដ៏ធំមហាសាលមួយ នៅប្រទេសនីការ៉ាហ្កា បានរីកធំឡើងៗ រហូតក្លាយជាបាតុកម្មហិង្សា និងឈានទៅដល់ការប្រឈមមុខដាក់គ្នារវាងប្រជាជន និងអាជ្ញាធរប៉ូលីស។ តាមការរាយការណ៍ នៅក្នុងហេតុការណ៍ កាលពីថ្ងៃព្រហស្បតិ៍ម្សិលមិញ មានបាតុករស្លាប់ពីរនាក់ ដោយសារគ្រាប់បែកផ្សែងរបស់នគរបាល ប៉ុន្តែអាជ្ញាធរបានបដិសេធព័ត៌មាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
មានប្រជាជន ដែលភាគច្រើនជាកសិករក្រីក្រ ជាច្រើនរយនាក់ បាននាំគ្នាមកធ្វើបាតុកម្ម នៅក្នុងខេត្ត Rio San Juan ប្រទេសនីការ៉ាហ្កា ចាប់តាំងពីថ្ងៃអង្គារទី ២៣ ធ្នូ។ បាតុកម្មនេះ បានឈានទៅដល់ការប្រើប្រាស់អំពើហិង្សា នៅពេលដែលអាជ្ញាធរនីការ៉ាហ្កាព្យាយាម បំបែកក្រុមបាតុករ។ ប្រជាកសិករទាំងនោះ នាំគ្នាមកធ្វើបាតុកម្ម ដើម្បីប្រឆាំងនឹងគម្រោងសាងសង់ព្រែកជីកមួយ កាត់តាមប្រទេសនីការ៉ាហ្កា ពីខាងមហាសមុទ្រប៉ាស៊ីហ្វិក ទៅដល់សមុទ្រការ៉ាអ៊ីប។ ប្រជាជនទាំងនោះ កំពុងមានការព្រួយបារម្ភជាខ្លាំង ថាអាជ្ញាធរ នឹងរឹបអូស យកដីធ្លីរបស់ពួកកាត់ ទៅធ្វើ ព្រែកជីកនេះ ។
តាមការរាយការណ៍របស់អ្នកតំណាងក្រុមបាតុករ ក៏ដូចជាថ្នាក់ដឹកនាំគណបក្សប្រឆាំង នៅក្នុងហេតុការណ៍ហិង្សា នៅថ្ងៃព្រហស្បតិ៍ មានបាតុករស្លាប់ពីរនាក់ ដោយសារតែត្រូវគ្រាប់បែកផ្សែងរបស់នគរបាល។ ចំណែកខាងអាជ្ញាធរវិញ បានរាយការណ៍ថា បានចាប់ឃាត់ខ្លួនបាតុករ៣៣នាក់ ហើយថាមានមនុស្ស២២នាក់ រងរបួស ដោយក្នុងនោះ ១៦នាក់ជាមន្ត្រីនគរបាល។ ប៉ុន្តែអាជ្ញាធរបានបដិសេធថា មានបាតុករស្លាប់។
ទោះបីជាយ៉ាងណា អំពើចលាចល និងការតវ៉ារបស់ប្រជាជននីការ៉ាហ្កា បានរីកធំឡើងកាន់តែខ្លាំង។ សូមបញ្ជាក់ថា រដ្ឋាភិបាលនីការ៉ាហ្កា បានចុះហត្ថលេខាលើគម្រោងសាងសង់ព្រែកជីកដ៏ធំនេះ ជាមួយក្រុមហ៊ុនចិនមួយឈ្មោះ HKND។ ព្រែកជីកនេះជា គម្រោងដ៏ធំមិនដែលមានទេ នៅទ្វីបអាមេរិកឡាទីន។ ព្រែកជីកនេះ នឹងធ្វើការប្រកួតប្រជែងជាមួយ ព្រែកជីកប៉ាណាម៉ា ដែលនៅមិនឆ្ងាយប៉ុន្មានពីនោះ។
តាមការគ្រោងទុក ព្រែកជីកដែលនឹងសាងសង់ដោយក្រុមហ៊ុនចិននេះ មានជំរៅ៣០ មែត្រ ហើយដែលអាចឲ្យនាវាធនធំទំងន់ ៤សែនតោន បើកឆ្លងកាត់បាន ហើយអាចទទួលនាវាដឹកទំនិញ បានច្រើនជាងព្រែកជីកប៉ាណាម៉ា។ គម្រោងនេះ គិតជាទឹកប្រាក់ ស្មើនឹង ៥០ពាន់លានដុល្លារ។
ប៉ុន្តែអ្វីដែលជាការព្រួយបារម្ភរបស់ ប្រជាជន ក៏ដូចជាអង្គការនានា គឺថា គម្រោងនេះ នឹងប៉ះប៉ាល់យ៉ាងធ្ងន់ធ្ងរ ដល់ដីស្រែចំការរបស់ប្រជាជន។ រដ្ឋនឹងរឹបអូសយកដីរបស់ប្រជាជន ហើយបណ្តេញប្រជាជនប្រមាណជា៣ម៉ឺននាក់ ឲ្យចេញពីតំបន់ដែលត្រូវសាងសង់ព្រែកជីកនេះ។ បញ្ហាមួយទៀត ដែលចោទធ្ងន់ គឺថាព្រែកជីកនេះ នឹងធ្វើកាត់តាមបឹង Cocibolca ដែលជាបឹងទឹកសាប ដ៏ធំបំផុតនៅតំបន់អាមេរិកកណ្តាល។ បើសិនជាគេធ្វើព្រែកជីកនេះមែន នោះវានឹងនាំទឹកប្រៃពីសមុទ្រ ចូលទៅក្នុងបឹង ធ្វើឲ្យត្រីនិង ជីវចំរុះផ្សេងទៀត ស្លាប់ផុតពូជអស់មិនខាន។
យ៉ាងណាក៏ដោយ រដ្ឋាភិបាលនីការ៉ាហ្កា បាននិយាយការពារគម្រោងនេះថា វាជាការអភិវឌ្ឍន៍ ដើម្បីស្រោចស្រង់ប្រទេស ឲ្យរួចពីភាពក្រីក្រ។ ប៉ុន្តែប្រជាជនគ្មានជំនឿចិត្តទេថា ព្រែកជីកនេះនឹងជួយកាត់បន្ថយភាពក្រីក្រ ព្រោះថា មើលតែប៉ាណាម៉ា ជាគំរូទៅដឹងហើយ គឺកាត់បន្ថយភាពក្រីក្រ តែពួកមន្ត្រីពុករលួយ និងក្រុមហ៊ុនឯកជនគ្នាគេតែប៉ុណ្ណោះ ឯប្រជាជនវិញ បាត់បង់ដីស្រែចំការ បរិស្ថានធម្មជាតិត្រូវបានបំផ្លាញ។ បាតុករខ្លះមិនខ្លាចនឹងស្រែកទេថា គម្រោងនេះ ហាក់ដូចជាចិន មកដាក់អាណានិគមនៅប៉ារ៉ាហ្កាអញ្ចឹង ព្រោះរយៈពេលសម្បទាន អាចឈានដល់ទៅ៩០ឆ្នាំឯនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ